廣東話 定 廣州話

ray

我記得歷史老師話過廣府系廣州一個別名，即廣府=廣州

后來上wiki查過一查，廣府好大范圍，包括埋廣西南寧--

甘我覺得絕對唔系 廣府話啦

都系講順左 廣州話，（本人為廣州人，所以我講廣州話就絕對冇錯)

maybe廣東話喺有不同地方口音嘅廣州話嘅總稱.

應該喺d撈b費事分,作齣來嘅,久而久之,就叫開了

 

反正,始終覺得廣州話標準d,冇咩地方口音

 

bajatvj

原帖由 南汉 於 2008-12-4 09:36 PM 發表 你又錯了，我就認識很多廣州客家人不會說粵語。

 

有無搞錯呀，唔識講廣州話，都話係廣州人，你估佢係陳揚咩

OmniBus

原帖由 顺德水蛇粥 於 2008-9-3 04:00 發表 广东人觉得以前太睇得起香港人，于是就有咗「港灿」一词，搞到近几年港人都自嘲「港灿」。

港燦呢個字係香港人造來笑自己，我起碼聽過十年以上。因為香港舊時電視劇廖偉雄做阿燦角色，深入民心，阿燦由大陸初時來到香港乜都未見識過。香港人就叫呢類人做阿燦。後尾又分唔同地方。有時會叫大陸燦。後尾大陸變咗好多，香港人就笑自己上到大陸未見識過，好似大鄉理出城，就叫自己港燦。香港交返畀中國之後，到家下就更加啦。

OmniBus

原帖由 gboss 於 2008-12-9 10:26 發表 呢句好毒，搞到我都唔知笑好定喊好。不過，貌似係事實。 呢個就係point喇，問題就係好多人都唔知：好大啫係有幾大先？By the way：香港人之所以咁多懶音，有時唔係佢哋想嘅，睇下嗰度幾多誠哥嘅親戚先啦。不過都因為佢哋鐘意粵語， ...

懶音唔係今時今日先有，我發覺有啲上百年嘅對譯，都有n-l不分嘅情形。其實都唔知叫唔懶音，因為音變係有佢嘅社會原因。

如果你睇舊片，啲人講嘢慢吞吞，先至講得咁字正腔圓。如果講得快，咁個字音必然係會有變。加上雖然大家講嘢都算大聲，但比起老一輩，我哋講嘢聲量係細好多。我哋唔使隔條街講嘢，嗌到對面樓，家下有電話嘛。口無開得咁大，呢個都會影響字音。

OmniBus

好多人都中意將學術用字當係生活用字，但生活上通常都唔會跟學術咁分。世上有樣嘢叫直觀，有樣嘢叫約定俗成。

例如講太陽喺西便落山，但讀科學都知，太陽根本唔係落山，係地球自轉。但個個咪一樣咁叫落山。例如單邊開嘅係戶，雙邊開嘅係門。家下個個都叫門，車又係門，屋企單邊開嘅又係門。咁我地會又要唔要，唔叫開車門，改叫開車戶。

火車家下無火，鐵路係鋼，路唔一定畀人用腳行。

大家又唔係生活係學術世界。有好多嘢學術點叫，生活唔一定要跟。學術係研究萬物，可以玩到好精細，但唔係萬物倒轉要跟住學術點玩點叫法。語言係人生活嘅反映，用到自然有佢嘅分法。

廣東話，粵語，廣州話，廣府話呢啲名，查實都唔知有無出現一百年。本地人，喺乜嘢地方就叫乜嘢話。圍頭叫圍頭話，西鄉就西鄉話，西關就西關話，順德話就順德話，大良話就大良話。外地人來到廣東省城一帶，就梗係叫最通嘅話做廣東話，同其他話分出來。大清時廣州係廣州府，府有十四縣。廣州同廣府。廣府話同廣州話，其實同一樣嘢，都係想指民國時嘅廣州。迄今嘅字典，叫廣東話又好，廣府話又好，廣州話又好，都係同一樣嘢，無論聲韻調都係嗰套嘢。

廣東人聽到客家人講嘅話，就叫佢客家話。老實講，客家呢個名，原本係廣東本地人叫，因為喺大清放鬆海禁後由三省交界搬入。客家人有乜理由叫自己做客家，叫自己講嘅話做客家話。

英文都唔係限於英倫。英倫內唔同地方，都有好多隻話。都無人會拗英文個名啱唔啱。

名呢啲嘢，都只能約莫咁講，每個名都有佢背後原因。如果咁睇重政治界綫。咁每次變一變咪又要重新改名？世上唔係得黑同白，重有好多隻色交雜，尤其係人文社會嘅嘢。拗廣東話定廣州話好，根本就多餘。人哋嘅習慣，除非有國家機器強制，係唔會受一班人所變。

嶺南散人

原帖由 OmniBus 於 2008-12-24 11:33 發表 懶音唔係今時今日先有，我發覺有啲上百年嘅對譯，都有n-l不分嘅情形。其實都唔知叫唔懶音，因為音變係有佢嘅社會原因。如果你睇舊片，啲人講嘢慢吞吞，先至講得咁字正腔圓。如果講得快，咁個字音必然係會有變。加上雖然大家講嘢 ...

非也，四邑話就算講得幾快，都唔會[n]、[l]唔分，一旦[n]讀成[l]嘅話，就連自己都聽唔明白自己講乜。

OmniBus

原帖由 xVa 於 2008-9-2 21:25 發表 在下新仔一名, 剛才看到個帖 似乎這裡的不少高手都認為"粵語"可說是"廣州話",對"廣東話"一詞不甚應同.   為甚麼呢?   先說我是認為"廣東話"正是這個討論區的主題(英文都說cantonese), 至於"廣州話"嘛... ...

首先要認清楚你想用響邊度。如果你講生活上所見所聞到嘅，人哋寫住粵語、廣東話、廣府話、廣州話，你會預期聽到啲乜？咪又係嗰隻，殊名實同歸。每個名本身，只係有各自原因，造唔同名出來。有人認為咁叫好啲，有人認咁叫唔好，要畀過另一個名而已。之後又有人見咁名，又想重新定義個啲名，有啲會擴大，有啲會縮細。係好主觀，唔同人有唔同睇法。

語文本身就會流動而定唔實，同其他人文科學一樣，就算語言學家自己都成日拗餐死，更何況流動更大嘅社會。

世界係點行點叫，唔係任何一兩個人就可以改得了，除非出動到國家機器。就好似國語改名做普通話咁。國家機器都只係做到某範圍內，再出啲又未必聽使。

OmniBus

原帖由 嶺南散人 於 2008-12-24 12:34 發表 非也，四邑話就算講得幾快，都唔會[n]、[l]唔分，一旦[n]讀成[l]嘅話，就連自己都聽唔明白自己講乜。

咁的確連百年拼音一樣有n,l不分嘅情況。n,l不分，亦唔只係香港出現，唔係獨例。

唔單單係快慢，講嘢嘅方式，文化習慣都會影響。例如講嘢大聲細聲，開口度，活動幅度，音一定會變。

嶺南散人

原帖由 OmniBus 於 2008-12-24 13:05 發表 咁的確連百年拼音一樣有n,l不分嘅情況。n,l不分，亦唔只係香港出現，唔係獨例。唔單單係快慢，講嘢嘅方式，文化習慣都會影響。例如講嘢大聲細聲，開口度，活動幅度，音一定會變。 ...

總言之，我該大個仔都吂試過亦吂聽過講四邑話恁時有某種方式可以令到[n]變成[l]嘅。