“亞”定“阿”？

殺人王

dada在2006-7-22 6:09:55說道：[br]「非洲」係「亞非利加洲」嘅縮寫。「亞洲」有優先權﹐唯有叫「非洲」。 「澳」同「歐」﹐我哋都唔讀ng。小學時候﹐一個先生同我哋介紹廣州話。佢喺黑板寫「歐洲人唔食鴨」﹐話廣州人讀「ngau1洲人唔食ngaap3」。我哋個個都笑﹐因為我哋讀「au1洲人唔食aap3」。

你地嘅懶音好嚴重

dada

《廣州話方言詞典‧廣州話音系說明‧聲母》﹕ 「從歷史上看﹐廣州話有一個零聲母（即古影母開口一二等的字﹐現在有些人讀作元音開頭）﹐廣州有部分人習慣把它讀成舌根鼻音ng﹐如『丫』a1、『埃』aai1、『坳』aau3、『晏』、『罌』、『鴨』、『壓』、『鈪』、『歐』、『庵』、『鶯』、『握』、『疴』、『澳』、『安』、『骯』、『惡』、『甕』、『屋』等字﹐又可以讀成nga1、ngaai1、ngaau3……﹐這種讀法又是一個普遍的趨勢。 與上述現象相反﹐廣州和香港有部分人（特別是香港的青少年）把ng聲母的字（主要是來自中古疑母陽調類的字）讀作零聲母﹐如『牙、牛、偶、眼、我、外……』。」 按﹕係我將廣州拼音改為粵拼。 應該讀ng聲母嘅字﹐讀作零聲母﹐叫做懶音。 本來應該係零聲母嘅字﹐廣州人因為某種原因加個ng聲母﹐而我哋冇跟廣州呢個趨勢﹐繼續讀零聲母﹐係咪叫懶音呢﹖

itxu2k

非洲我见到更多嘅系译"阿非利加",唔信可以去问下谷哥哥... [ng]唔[ng]嘅事情又唔可以一言"懒音"以闭之,只不过如果一个中文字嘅读音要用外文译音来纠正,噉"北京"(peking)系咪以后读[peijing]好啲?

dada

我不過用英文原名證明「亞」有（或有過）aa3音﹐唔係要用外文糾正。北方人一樣讀「jia拿大」﹐冇人要糾正﹐明白點解譯為「加拿大」就得。 至於「北京」﹐亦都冇話要糾正。peking不過證明係南方人譯嘅名﹐pe king不過係今日粵拼嘅bak1 ging1。

itxu2k

dada唔好劳气,我不过系想讲: 唔理"亚"有冇[ng],"亚细亚"呢个翻译都不足为据啫... 我都冇正音嘅习惯,大家中意点就点啦,反正我哋讲紧嘅粤语肯定同先辈讲嘅系有差别嘅. 法语死守佢嘅纯洁亦都唔见得就发扬光大...

dada

我完全冇勞氣啊。我查過《廣州話方言詞典》﹐「勞氣」係費神﹐不過我諗你好似話我有啲唔妥嘅意思。如果你有噉嘅感覺﹐真係對唔住。 我講嘅唔係正宗粵語﹐唔敢爭發音正﹐不過冇懶音就真。

highyun

歐、鴨 都可以讀零聲母或者ng聲母，所以讀零聲母並唔係懶音，讀ng聲母亦唔係錯。粵語陰聲字唔需要ng聲母開頭，例如 安 啱 亞 鴨，但陽聲字就就一定要ng開頭，所以 牛 牙 呢啲字絕對唔可以省略ng聲母。

winfield

安 啱 亞 鴨 需要ng聲母開頭的

余OK

殺人王講順德話懶音重，我完全反對，順德話本來就冇ng＋韻母嘅音，何來懶音？即使好耐好耐之前確實存在，但而家祇可以講係蛻化咗，唔好下下用廣州話嘅標準嚟衡量其他方音，未必作準。順德人雖然方音重，但咬字普遍都比較實，好少會出現廣州香港新一代嗰種軟綿綿嘅語調而導致嘅懶音，又或者而家所謂嘅廣州話懶音以後好可能成為以後嘅正音。。。

殺人王

余ok在2006-7-23 2:10:19說道：[br]殺人王講順德話懶音重，我完全反對，順德話本來就冇ng＋韻母嘅音，何來懶音？即使好耐好耐確實存在，但而家祇可以講係蛻化咗，唔好下下用廣州話嘅標準嚟衡量其他方音，未必作準。順德人雖然方音重，但咬字普遍都比較實，好少會出現廣州香港新一代嗰種軟綿綿嘅語調而導致嘅懶音，又或者而家所謂嘅廣州話懶音以後好可能成為以後嘅正音。。。

我絶對反對你話我講順德話懶音重,你邊只眼見到我講順德話懶音重? 我係根據dada嘅"佢喺黑板寫「歐洲人唔食鴨」﹐話廣州人讀「ngau1洲人唔食ngaap3」。我哋個個都笑﹐因為我哋讀「au1洲人唔食aap3」。"呢句話而覺得佢地懶音重啫.我本身唔知道dada係邊度人,一直以為佢係廣州人,講嘅係純廣州話. 佢話讀"鴨"為"aap3"咁我反應梗係"懶音"

dada

我無意中睇到下便一篇文章﹐畀大家參考﹕《曼殊新考》﹐華岡佛學學報第4期 http://www.guoxue.com/sms/lw/smsxk.htm 「曼殊，姓蘇，名戩，字子穀，一書子谷(註1)。」 「(註 1) 子谷是子穀一音之轉，『潮音跋』﹕『又號子谷』。又據『蘇曼殊之真面目牋註』云﹕戩是譜名，又是乳名，傑生次妾陳氏稱曼殊為『亞戩』，廣東人喜叫人阿某，又作亞某，阿與亞應該是一音之轉吧。」

dada

我又睇到另一份資料﹕清朝時候﹐廣東人寫「亞」﹐唔係「阿」。

《清稗類鈔．經術類．俗字之訓詁》﹕「各地通行之俗字頗多，今略舉之。……廣東人所用者如下：『亞』，音阿，阿俱寫作亞。……廣西人所用者如下：……『亞』，音阿，阿字俱寫作亞，與廣東同。」

Anl

講咗咁耐都冇人有結論，等我引述《廣州話詞典》做結論引證：Page 397
……
（七）附加式。
? 1。加詞頭的。
? 例如：亞孻 亞奀 第屘 第九 老公 老襟
? 廣州話所用的詞頭基本上與普通話同，僅將“阿”改用“亞”而已。
……

陰聲字元音起音冇聲母，陽聲字元音起音要喺元音前加ng聲母。但爲咗避免懶音及陰陽不分，統統唔理陰陽字，均加上ng聲母。但陰聲字仍然以零聲母爲正。

魚旦

我係香港人,但係其實大部份香港人都係用"阿",冇乜人用"亞".......

Anl

QUOTE:

以下是引用魚旦在2006-11-4 16:17:33的發言：
我係香港人,但係其實大部份香港人都係用"阿",冇乜人用"亞".......

呢個原因唔難解釋，因爲普通話作爲書面語嘅時候，用“亞”就係錯字。而粵語做書面語嘅話，“亞”先係啱嘅。而喺實際應用當中，因爲應試、文書、學習、教學等統統接受嘅係“阿”，用“亞”嘅情況實在少之又少。所以咁多人對呢個“aa3”進行討論。

其實睇我上面引述《廣州話詞典》就已經好明白啦。

highyun

《廣州話詞典》唔一定係啱晒嘅。其實唔需要為咗同普通話以示區別，故意唔用“阿”而用“亞”。

首先，“亞”可讀ngaa3，有可能誤導人哋嘅發音；
另外，既然普通話、書面語都係用阿，而粵語裏面“阿”亦係讀aa3，點解唔講其用之？
第三，“阿”呢個用法自古就有，木蘭詩就有“阿爺無大儿”，所以並唔係普通話嘅産物。

Anl

作爲“亞”係粵語專用嘅稱呼。“阿”另外有個發音，讀“柯達菲林”個柯音。又例如“阿膠”就係讀呢個“柯”音。

外外星人

到底边种讲法先啱？

 

我而家暂时信住「亚」先。

h0429636

原帖由 winfield 於 2006-7-23 08:46 發表 安 啱 亞 鴨 需要ng聲母開頭的

 

 

 

 

我個名入面有個安字，由細到大都係讀ｏｎ，出世紙都係落ｏｎ

 

之前讀過一篇文章，都講過使唔使讀ｎｇ音嘅問題，好似樓上有人咗有啲字本來無ｎｇ，但係唔知點解會被人話係錯讀，我相信係因為近年成日都有批評懶音問題而被「矯枉過正」．

 

我只係知亞細亞（アジア）應該係日本首先譯過來

http://dic.yahoo.co.jp/dsearch?enc=UTF-8&p=%E3%82%A2%E3%82%B8%E3%82%A2&dtype=0&dname=0na&stype=0&pagenum=1&index=00273200252100

畀個ｓｏｕｒｃｅ你哋睇睇

 

重有亞唔一定只係讀ｎｇａａ，參考下下面個ｓｏｕｒｃｅ

http://humanum.arts.cuhk.edu.hk/Lexis/lexi-can/

 

應該咁講，而家零聲母同有－ｎｇ呢個問題分歧幾大，所以都好難話邊個啱定錯，或者咁講，可能兩個都啱，所以唔好亂話人哋讀懶音

 

我只係知道「愛」應該係讀ｏｉ，唔係ｎｇｏｉ

 

卢总

原帖由 winfield 於 2006-7-23 08:46 AM 發表 安 啱 亞 鴨 需要ng聲母開頭的

如果「安」字系要「ＮＧ」声母开头嘅话，噉「永安公司」、「永安旅行社」……咪要屎畀你睇？