每日一句與粵語有關之古詩詞

dada

往時 = 過去。

《國語辭典》﹕「往時﹐昔時、從前。漢書．卷八十二．史丹傳：『左將軍丹往時導朕以忠正，秉義醇壹，舊德茂焉。』文選．朱浮．為幽州牧與彭寵書：『往時遼東有豕，生子白頭，異而獻之。』」

《後漢書》卷三十三《朱浮傳》﹕「伯通自伐，以為功高天下。往時遼東有豕，生子白頭，異而獻之，行至河東，見群豕皆白，懷慚而還。若以子之功論於朝廷，則為遼東豕也。」

《全唐詩》卷四百五十 卷450_11? 白居易 《歸履道宅》﹕

往時多暫住，今日是長歸。

余OK

　　「舊時王榭堂前燕」、「明月幾時有」、「問君能有幾多愁」……呢啲朗朗上口嘅古詩詞均帶有至今仍經常掛喺母語為粵語者口邊嘅詞彙「舊時、幾時、幾多」。有感於粵語蘊含嘅古語元素為當今漢語各方音之翹楚，亦知道唔少行家裏手對粵語本字研究極之深入，考本字過程中週不時引經據典，令唔少晚輩大開眼界擴展知識。本人好想蒐集多啲呢類古詩詞，以將中國經典文化及粵語文化共冶一爐，並希望不斷有更新，成為一個特色欄目，還有賴各位平時刮多啲料嚟「贈慶」，此為關鍵。

　　今日樓主本人就先「開吓齋」啦：「鳶飛戾天者，望峯息心；經綸世務者，窺谷忘返」。呢句係我哋大陸高中語文課本古文篇目《與朱元思書》中最具哲理嘅一句。其中「鳶」、「戾」兩字，可能一般人唔太熟悉，但如果你曉粵語，且當你聯想起「紙鳶」、「狼戾」時，係咪倍感親切呢？原來我哋不時會講到嘅詞語喺呢句詩詞搵到咗影子。

　　註：
　　「紙鳶」，一作「紙鷂」，就係風箏，「鳶」粵音jyun1，老鷹之義，個人認為喺「紙鳶」中「鳶」可讀作jiu2。例：放紙鳶（放風箏）。
　　「狼戾」，係指橫蠻無理地發脾氣，「戾」粵音lai2。例：發狼戾（蠻不講理）、戾橫折曲（歪曲事實）、冤戾（冤枉）。

--------------------------------------------------------------------------------

　　冇錯，就係上面嗰個例子噉，覺得點？係咪好有意思都有衝勁想一試身手呢，噉就嗱嗱冧行動幫手整理多啲資料出嚟喇，每日一句「噏噏噏」，唔係齋口噏噏啊，係up、up、up——講緊呢張帖啊，快快手mark低你哋嘅所得所知，補充原料每日up帖，一日一句就夠晒數，慢慢搣，常up常有！

　　ps：重有啊，記得嗌埋你哋識得嘅細路仔細路女多啲用粵語嚟唸詩，自有一番更高層次嘅韻味。

[此帖子已經被作者於2007-6-9 21:21:33編輯過]

dada

我搜集同粵語有關嘅古文﹐唔淨係古詩詞。 李煜《柳枝》﹕ 風情漸老見春羞， 到處芳魂感舊游； 多謝長條似相識， 強垂煙穗拂人頭。 http://bowen.chi.cuhk.edu.hk/wee ... pic-view.asp?id=179 多謝 　　原指慇勤問候。《漢書．趙廣漢傳》：「為我多謝問趙君。」師古曰：「多，厚也。若今人言千萬問訊矣。」也有感謝之意。如李煜〈柳枝〉詞：「多謝長條似相識，強垂煙穗拂人頭。」今粵語所言「多謝」，即取後一義，相當於現代漢語的「謝謝」。

余OK

古詩詞、古文都無任歡迎，最緊要有「point」，同粵語相關。dada第一個up帖，今日就按此「多謝」為update啦，聽日有新嘢請各位再up，其餘嘅今日可以齋「噏」而唔「up」住，祇要保持一日一句經已心滿意足也。。。

dada

元稹《送崔侍御之嶺南二十韻》﹕ …… 逸翮憐鴻翥，離心覺刃劖。聯遊虧片玉，洞照失明鑒。 …… 「劖」讀caam5。例﹕畀簕劖親隻腳。 《說文》﹕「劖，斷也。从刀毚聲。一曰剽也，釗也。鉏銜切。」 《段注》﹕「剽﹐砭刺也。」砭﹐古時用來治病的石針。 《廣韻》﹕「劖﹐刺也。」 《國語辭典》﹕「劖﹐刺﹑割。唐．元稹．送崔侍御之嶺南二十韻：『逸翮憐鴻翥，離心覺刃劖。』」

dada

得閒 屈原《楚辭．九歌．山鬼》﹕ …… 怨公子兮悵忘歸，君思我兮不得閒 …… 注釋﹕「言懷王時思念我，顧不肯以閒暇之日，召己謀議。」

余OK

dada眞係唔話得，咁捧場，感激之至。當然希望有更多嘅網友參與啦，等我哋對自己嘅母語有越嚟越多嘅認識。。。

dada

對唔住﹐我唔應該一早發帖﹐好似搶頭位噉。

余OK

dada，點會啊，可能你唔發帖其他人都唔發㗎，我知你呢方面嘅料都幾多吓，繼續keep住發啦，唔好鬆手。特別係等咗成日都冇人up帖就記得要拍硬檔幫手up，我唔想張帖沉落去，日日保持新鮮，成爲論壇嘅一個特色帖！拜託嘞。。。

dada

「晏」讀aan3/ngaan3﹐意思係晚、遲﹕咁晏重唔去上班、瞓晏覺、晏晝。 《論語．子路．第十三篇．第十四章》﹕「冉子退朝﹐子曰︰『何晏也？』」 屈原《離騷》：「及年歲之未晏兮，時亦猶其未央。」 唐韋應物《園林晏起，寄昭應韓明府、盧主簿》﹕ 田家已耕作，井屋起晨煙。園林鳴好鳥，閑居猶獨眠。 不覺朝已晏，起來望青天。四體一舒散，情性亦忻然。 還復茅檐下，對酒思數賢。束帶理官府，簡牘盈目前。 當念中林賞，覽物遍山川。上非遇明世，庶以道自全。 宋陸游《新晴出門閑步》﹕ 一夜風號作快晴。披裘扶杖出門行。 青山繞舍雪封盡，丹葉滿街霜染成。 廢寺僧寒多晏起，近村農惰闕冬耕。 窮人旋畫膨脝計，自買蹲鴟煮糝羹。

highyun

我古文水平唔高，搵唔到粵語字本字嘅證據，所以暫時攞白居易首《長恨歌》頂住先： 玉容寂寞淚闌乾，梨花一枝春帶雨。 含情凝睇謝君王，一別音容兩渺茫。 睇，喺詩中係“看”嘅意思，同而家粵語“睇”嘅意思完全一樣。邊個敢講粵語唔可以上大雅之堂？

殺人王

我曾經於q群上發過 生在陽間有散場，死歸地府也何妨？ 陽間地府俱相似，只當漂流在異鄉。 此詩為唐寅絶筆詩,世宗嘉靖二年（1523）十二月初二，唐寅孤獨地逝世，但做夢也想不到，自己會被後世謠傳為一生衣食豐足，家中有八個靚老婆...... em14: em14: em14: 此處有白話常用嘅"散埸"不知算否?

余OK

好心唔好一係冇回應，一回應就打孖嚟啦，我諗目前準備啲資料唔係十分之足夠，驚住到咗一段時間就冇人幫手up帖，所以平時要慢慢搣。得嗰三分鐘熱度唔要都罷，希望有人某日見到冇人有新料up帖都幫吓手撐場啦。。。

superjill

劉宋范曄《樂遊應詔》“睇目有極覽，游情無近尋” “睇目”解作遠看，遠望

dada

superjill補充highyun個「睇」字﹐算唔算新句呢﹖

superjill

哈哈～唔算新字啫～ 左近 北魏酈道元《水經注．夷水》：“縣東十許里至平樂村，又有石穴，出清泉，中有潛龍。每至大旱，平樂左近村居輦草穢著穴中。龍怒，須臾水出，蕩其草穢，傍側之田皆得澆灌。” 《南史．夷貊傳》：“後東行漲海千餘里，至自然大洲。其上有樹生火中。洲左近人剝取其皮，紡績作布，以爲手巾。” 白話文，明朝凌濛初《二刻拍案驚奇》卷二十八：“這游僧也去不久，不過只在左近地方，要訪着他也不難的。”

dada

既然補充唔算﹐我就補充一下。戰國時候已經有「睇」字。 屈原 《楚辭．九歌．懷沙》：「離婁微睇兮，瞽以為無明。」或「瞽謂之不明」﹖ 《楚辭．九歌．山鬼》：「既含睇兮又宜笑，子慕予兮善窈窕。」

superjill

無錯啊 “睇”呢個字古已有之，不過嗰時嘅意思未係而家嘅“看、望”，而係有“微微斜視”嘅意思 《說文》︰“南方人稱眄爲睇”，“眄”就係斜視嘅意思，因此“睇”都有斜視之意 余生講咗“狼戾”乃係古語，我都補充兩個例子 《戰國策·燕策》︰“夫趙王之狼戾無親，大王之所明見知也。” 《漢書·嚴助傳》︰“今閩越王狼戾不仁，殺其骨肉，離其親戚，所爲甚多不義。”

dada

後生/後生仔=年輕人。 鮑照(?～466)，南朝宋文學家。 《代少年時至衰老行 》﹕ 憶昔少年時﹐馳逐好名晨。結友多貴門﹐出入富兒鄰。綺羅艷華風﹐車馬自揚塵。歌唱青齊女﹐彈箏燕趙人。好酒多芳氣﹐肴味厭時新。今日每想念﹐此事邈無因。寄語後生子﹐作樂當及春。

dada

「菢」讀bou6﹐意思係禽鳥孵卵。 《國語辭典》﹕「禽鳥孵卵。唐．韓愈．薦士詩：『鶴翎不天生，變化在啄菢。』明．徐光啟．農政全書．卷四十一．牧養．六畜：『養雞不菢法：母雞下卵時，日逐食內夾以麻子餵之，則常生卵不菢。』」 《說文通訓定聲》﹕「雞伏卵﹐北燕謂之菢。」