第二節後提示: 喺第二節中,最富我哋粵民族傳統儀禮嘅片斷莫過於新娘子揸筷子入門同多仔龍鳳被兩幕喇!呢啲咁古舊嘅習俗喺城市粵民族裡頭經已失傳咗好耐,喺呢度睇得到真係既感慶幸又感失落。 喺呢一節裡頭,我其實對鄉郊粵民族嘅好多習俗儀軌仲係一頭霧水,唔知佢哋噉做嘅個中因由同傳統含義係咩嘢。譬如:點解要有一個男家嘅親屬點著支大香導引一對新人返回男家?呢裡頭係咪有香燈有繼嘅寓意呢?又譬如:新娘子入門前點解要用大扁篩遮頭而唔係用遮呢?點解放係龍鳳床上嘅吉慶之物要用竹籮嚟裝著而唔係用其他器皿呢?新娘子手裡頭除咗拎著筷子之外,仲有嗰抽到底係乜嘢嚟嘅呢?係咪真係慈菇丫?男家嘅長輩點解要扶新娘子企喺張高腳凳度呢?為婚床晾蚊帳嗰陣,點解只大扁篩會事前畀人拎咗上床頂嘅呢? 喺下一節:拜見高堂,一對新人將會為老爺同安人敬茶。不過一拜天地,二拜高堂,夫妻交拜呢種情節並冇出現,甚至連夫妻齊拜祖先神位都唔見有,我唔知僅僅係呢個個案嘅特例丫?定係呢種古舊嘅儀禮真係喺我哋粵民族之中普遍失傳! 未完待續!
|