|
我覺得粵語權益嘅保護係多方面嘅，措施亦都係多方面嘅，即係多條戰綫同時開展。
人大政協方面係需要嘅，其實呢方面嘅工作早就開始嘞。就好似對上嗰次政協，就有唔知么嘢民主黨派提出「保護方言」，但係隨即就有另外一啲政協委員話「語言係發展交融嘅，到到邊一日方言真係消亡嘞，噉都係語言發展嘅結果，冇么嘢奇怪」，所以話，政協人大宜家唔係冇做嘢，而係做嘢都係噉，作用唔大。
其實噉樣係意料之中嘅，試諗下，就連全國民間呼聲極大嘅一啲問題，好似醫改反腐呢啲，人大政協作用都好有限，更何況係維方維粵，呢啲民間仍然未有共識嘅問題呢？民間喺方言問題上，分歧仍然係好大嘅，部分認爲應該由其發展部分就認爲應該保護，更加激進嘅觀點重有政府應該加大推普力度，消滅方言。每個方言區都係噉，就以粵語方言區為例，好多以粵語為母語嘅人對於粵語嘅危機除咗表現出一種驚訝嘅感覺之餘，都係「冇所謂」啦嘅感覺。所以，宜家方言嘅好大一個障礙，不在政府（其實政府已經唔多理嘞），而係民間嘅啓蒙。而喺呢個過程裏面網羅就發揮咗直觀重要嘅作用，佢係一把雙刃劍，我哋利用得好，可以好好噉樣宣傳「維方思想」，但係如果我哋唔爭取好呢個難得嘅話語基地，失去話語權嘅話，網絡呢把劍就會倒戈傷害我哋，進而導致滅方知起碼對方言麻木嘅思想喺全社會蔓延，到時，呢種思想就可能進一步上升到政策層面，噉樣就真係災難來臨嘞，而可怕嘅就係，宜家嘅網上就係出現呢種情況，可惜嘅就係，粵人居然重係自動放棄。
所以，正確表述應該係，理性宣傳（人大政協），網絡辯論多方面齊頭並進先至得。當然，人大政協唔使吵到面紅，容易好多，但係我哋唔可以因爲難就唔去做，只要呢樣嘢係必要嘅。
重有，我不溜都贊成全面維方，我話保護粵語唔代表我只係贊成保護粵語，其實，我係贊成保護所有方言，我恨不得樣樣方言都可以好似粵語咁有生命力添，只係，我喺道將佢具體表述為「維粵」。 | 
發表於 2009-6-14 03:04:35
發表於 2009-6-14 13:41:53