|
新中国第一批法律人才
□冯璐赟专栏
照片提供、口述:邓嘉乐
拍摄地点:广东国民大学
拍摄时间:1950年11月
我爸爸邓济海,系喺广东国民大学(广州民国时期成立嘅私立大学,分校区旧址系而家嘅惠福西路省人民医院位置)嘅法律系毕业嘅。我爸爸系肇庆高腰人,读紧高中嘅时候抗战爆发,因战争只能够停课,等到抗战结束之后肇庆中学复课,先至完成高三课程,之后喺1947年,先考到嚟广州读大学。
喺民大读书期间,我爸爸系半工半读口架。原因系,一嚟读嘅系私立大学,学费相对嚟讲贵啲,屋企有兄弟姊妹,家庭条件唔算太好；二嚟系因为屋企有个妹妹,当时已经有对象差唔多结婚,但系我哋屋企嗰边嘅传统系细嘅唔可以爬头,所以我爸爸就比较早结咗婚,有家庭但系重读紧书,就更加要一路做住嘢,减轻负担嘞。所以我爸爸喺1946年11月到1950年12月期间,都系一路打工一路读书口架,上课系读夜堂,日头就上班。一开始喺光复南路嘅华南糖行度做,后尾就去咗泰康路嘅大来席庄度做店员,呢两间商行都喺五十年代公私合营嘅时候畀合并,就关闭咗嘞。大学期间,半工读嘅生活既系辛苦,但亦充实。
同一个系里面,有好多年龄相差颇远嘅同学,因为系抗战后招生嘅关系,大家求学心切,所以唔单止学校人数剧增,而且同一届嘅生源里面,年龄相差十几岁嘅大有人在,情况就同「文革」后恢复高考差唔多。爸爸虽然半工读,空余时间唔多,但系一有机会,都会参加下活动口架,佢钟意游水、打篮球,文娱爱好系吹口琴,都会参加下佢哋文法学院嘅运动会同埋文艺表演活动。我哋学校有一个「法律研究会」,系一个法学专业学术研究同交流嘅组织,学校嘅学术氛围相当唔错,定期都会同当时嘅中大等高校嘅法律研究会搞下学术交流会,我爸爸亦都经常参加法研会嘅活动,同啲同学都曾经听过啲好有名嘅法律专家学者嘅讲座,受益匪浅。呢一张相就系1950年底,临近毕业嘅时候,民大法研会嘅全体同学同教授嘅合影,亦都算系佢哋嘅集体毕业相嘞。我爸爸邓济海就系第二排中间嗰个嘞。
1951年1月,我爸爸正式大学毕业。毕业前,中央嘅人事部门嚟到广州招人,因为当时新中国啱啱成立冇几耐,国家用人紧迫。要通过选录并唔系一件容易嘅事情,经过学生会推荐、校方推荐再到正式考核,三日时间就决定名单。民大一共八个人畀国家人事部录用,法律系就有五个,三个喺最高人民检察署,一个喺最高人民法院,重有一个喺内务部。就系呢一年嘅春节前,我爸爸就同同学,重有其他学校同样畀国家人事部录用嘅学生一齐北上。佢哋嗰时上班系要戴襟章口架,纪律严明。我爸爸喺北京最高检察署第三处(行政诉讼同民事案件检察处)做嘢嘅时候试过乔装打扮,跟踪调查人证,搜集物证。作为一个读法律嘅人,可以喺国家最高检察机关度做嘢,系一份好理想嘅工作。但系,因为爸爸系广东人,有啲唔习惯北方嘅气候、饮食等各方面嘅条件,更重要嘅,系当时我已经出咗世,作为父亲唔可以喺个仔身边,始终唔好。所以,喺北京一年未够之后就申请调返嚟广州嘅人民检察署嘞。1957年,全国都成立法律顾问处,我爸爸调去法律顾问处,成为新中国第一批律师。
http://www.nanfangdaily.com.cn/epaper/nfds/content/20080416/ArticelB12002FM.htm |
發表於 2008-4-16 18:00:36
——好似系圣经讲嘅。