|
老字号留低消失嘅时光
冯璐赟专栏
照片提供、口述:邓嘉乐
拍摄地点:广州北京路京士照相馆
拍摄时间:1950年1月
1950年,妈妈带住我去到永汉北路嘅京士照相馆影相,嗰时候我先八个月。爸爸有个好老友嘅中学同学叫莫乃荪,喺澳门度工作生活,即使分隔两地,都成日写信联系「口架」（㗎 ）。佢知道我出世之后,专程去到我哋万福路嘅屋企睇过我,祝福我哋屋企人。等到我八个月嘅时候,爸爸就谂住影张相留念,寄畀喺澳门嘅好朋友。
听我妈妈回忆话,当时由屋企行过去京士照相馆,行咗大半个钟头,抱住我行,其实都会攰。去到一共影咗三幅一组嘅相,有两张我嘅单人相,一张妈妈抱住我影嘅。细路仔影相系有啲麻烦,大人要系（喺）侧边睇住佢,等佢乖啲,尽量多啲表情。其中一张单人相,我仲（重）好得戚添,喺度「及及猪」(即系上唇包下唇,发出声音嘅一种趣怪动作)啵（噃）,大人都畀我凼（氹）到好开心嘞。影出嚟嘅相,仲（重）有「京士(KING’S)」嘅水印,话明系名楼出品。之后爸爸就喺呢张我同妈妈嘅合照背面,用钢笔写上「送给莫乃荪仁兄惠存 弟济海 1950.1.15」字样。以前嘅人都好兴以照片相送,一嚟知道大家嘅近况,二嚟又系值得留念嘅嘢。所以,细路仔隔几年,都会去一次影楼影相,记录低每一个时期嘅样貌,一家人又会影下全家福。女仔同女仔之间,都好中意互相送自己嘅相,然后喺背面度写上类似嘅字句。
宁愿行咁远,都要去到「京士」影相,系因为「京士」嘅名气好大,老字号,当时泊得住「艳芳」嘅,只有「京士」,加上影出嚟效果好,水印标记好精致,所以好多人影全家福,一定都系去呢两间「口架」（㗎 ）,一张全家福留传子孙啊（吖）嘛。呢啲大嘅照相馆,鼎盛时期员工都有几廿人,店面都有几百上千平方。「艳芳」同「京士」仲（重）开度（到）去其他城市添,亦都成为其他城市嘅老字号。
不过,依家行过北京路,已经唔见有「艳芳」同「京士」嘅大名嘞。原先嘅「京士」,系喺北京路向西转出中山五路嘅转角位,依家已经变成咗商业城,「京士」早就了无踪影。而「艳芳」,当年因为地铁拆建嘅原因,搬出中山五路旺地,加上后嚟影楼竞争激烈,已经好景不再,依家偏于朝天路一角。
岁月无痕,摄影可以留低时光嘅魅力,抓住容易消逝嘅嘢,将佢永久保存。不过依家,仲（重）有几多人会去老式影楼度影全家福呢?仲（重）有几多人会去老式影楼影婴儿相呢?大概,如果要出去影,多数人都会选择可以影艺术相嘅新式影楼,再唔系嘅,喺依家数码相机普及嘅时代,自己喺屋企影。讲句唔好听嘅,可能,只有老古董先至会去老影楼嘞。现实远比怀旧强大。 |
發表於 2008-4-5 16:37:04
