|
花街，系广州之所以被称为「花城」嘅一道特色风景——每年春节前夕，广州市内都会有大大小小唔同嘅花街供人游玩、欣赏，买卖花卉、办年货。
广州最早嘅花街设喺「藩署」前，即系今日北京路财厅前面，又叫做双门底，系夜市嚟嘅，常年都开业。一年一度嘅迎春花市形成于１９世纪６０年代初，后来发展规模越嚟越大，将鲜花、盆栽、摆设、诗画都集于一身，以春节作背景，令花街变得更加多姿多彩。到咗上世纪初，「行花街」成咗广州人嘅习俗，每到除夕，食完团年饭，一家大细就会齐齐出动——行花街。
普通人家会买盆金桔，寓意大吉大利；屋企有老人家嘅就会买盆四季桔，代表四季平安；做生意嘅就会买盆朱砂桔，希望生意兴隆，一本万利，财源滚滚来；未婚男子就要买桃花返去，希望「行桃花运」；文职人员或者读书人多数会买剑兰或者鸡冠花，祈求步步高升或者独占鳌头……总之，成条花街，人如潮涌，群芳竞绽吐芬芳。清光绪年间有首《羊城竹枝词》系噉写嘅：「羊城世界本花市，更买鲜花度华年。除夕案头齐供奉，香风吹暖到人家。」
喺花街形成之后，行花街嘅习俗一路延续至今，从来就未曾间断过，而且其中重有一啲得意嘢。
一位已经作古嘅粤剧大老倌曾经教落，年卅晚行花街一定要着对新鞋去，噉就可以赶走晒啲小人——称为「踩小人」。
有一年我做嘢好唔顺，硬系诸多阻滞，又有小人从中作梗，或者半路杀出个程咬金走嚟截我糊。于是嗰年我就特登着住对新鞋走去行花街。行完返嚟第二年，果然就少咗好多阻滞，亦冇乜小人出嚟作恶嘞。
于是就从嗰一年开始，如果知道来年会遇到好多小人，或者犯太岁嘅，我都会喺年卅晚着对新鞋行花街。一路行，重一路学香港湾仔鹅颈桥桥底嗰啲阿婵噉，口中念念有词：踩你个小人头，等你有气冇碇唞；踩你对小人手，等你有钱唔识收；踩你对小人脚，等你有鞋冇得着；踩你个小人身，等你成世冇得伸……
今年年卅晚行花街，你哋都不妨试下！呢个方法，用嚟对付大洋嗰啲黑狗、白痴板、港湾、疯之龙、糊涂阿伯、鹰轮学屎、屎君子、Ｓａｉｂｅｅ、老点之流，重有经常诋毁粤人以及粤文化嘅一众缩头乌龟，应该系好有效嘅！
http://general-lo.blogcn.com/diary,13644126.shtml | 
發表於 2008-4-4 23:45:11
