谭校长无与伦比妙趣语录 ＠ 「不见不散」广州演唱会

卢总

　　虽然睇完谭校长嘅「不见不散」广州演唱会已经一个月嘞，但硬系觉得意犹未尽，佢啲歌声仍然绕梁，佢讲过嘅说话言犹在耳。

 

　　所以，今日趁新年，特登将佢喺广州演唱会上面嘅精彩语句辑录上嚟，与同好一齐欣赏、回味。

 

　　原文系《谭校长无与伦比妙趣语录　＠　２００７「不见不散」广州演唱会》：

　　http://general-lo.blogcn.com/diary,12534248.shtml

 

　　凡转载者，务请注明出处！

 

　　下面提供埋录音对照，特别鸣谢Ｃｈｅｒｉｌｙ！

 

　　最后都系嗰句：永远支持谭咏麟！

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

 

　　唔好意思啊，扣一扣条裤先……因为佢成日食住我啊（开场第一首《你知我知》唱完就……）

 

　　大家好！广州嘅朋友好耐冇见喇！有几耐啊？有几耐啊？好耐喇系嘛？噉你哋想唔想玩啊今晚？系咪想玩啊？系咪想跳舞啊？如果想跳舞就一齐起身先啦，后面啲朋友全部都可以企起身跳咖！

 

　　大家好！哇，我睇到好多朋友喎！坐到呢便呀？坐到咁边啊？哇，犀利啊！上高嘅朋友大家好！Ｈｅｌｌｏ，后便嘅！嗰便对面嘅，哈，多谢晒！哇嗨，今日犀利啊今日，座无虚席啊！Ｔｈａｎｋ　ｙｏｕ！好嘞，嗱，大家呢想唔想今日睇得开心啲啊？坐低，坐低，跳完舞嘞就坐低呀，大家听话呀！乖呀，乖呀，坐低嘞！（好似氹细路噉样。）

 

　　哇嗨，买咗唔少喎，噉就发达嘞，如果全部啲人都好似你哋噉样买原版嘅就好嘢啦！吖，好啰，吖，好喎，噉啲公司就真系开心啰！

 

　　又多个花名系咪啊？多个花名，叫做咩？普通？普通伦？哇，呢个好难听喎！　　花名就真系多，由细到大呢，我都有花名，一出世呢就叫做「肥仔伦」，但系后来就好瘦嘞，但今日个名讲下讲下又好似啱返噉嘞。跟住就「靓仔伦」，跟住好多，重有唔记得咗嘞，记唔记得啊？幸运伦啦，风火伦啦，校长啦，但重有一个名呢，我就最开心嘅，呢个名，对我呢系一种荣誉，一种——听到都会，吖，知道，曾经系有一啲嘢发生过，呢个名就系叫做「金马伦」。「金马伦」，点解「金马伦」啊？因为金马奖呢，我曾经喺好多年前，ｅｒ……唔记得几多年，好细个，童星嗰阵时就已经攞咗咖嘞。今日喺呢度，将呢只歌，喺呢个演唱会入面，大家可以重温一啲片段，系我曾经做过嘅嘢，亦都系我攞过金马影帝嘅《假如我是真的》……

 

http://blog.ku6.com/2413636/playsong/1689746有得听

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

 

　　其实，喺我嘅演艺生涯，喺我嘅歌唱界入面，我真系可以叫做好好运，因为我系碰到好多好歌，今晚大家嚟到呢度，都系想听一啲我嘅好歌，系咪呀？畀啲反应嚟听下系唔系？……噉就啱嘞！睇嚟呢啲歌真系好啱大家听嘅！送畀你哋！（全场一齐合唱《情凭谁来定错对》。）

 

　　（全场一齐合唱完《情凭谁来定错对》，跟住就唱《雨丝、情愁》。）
　　好唔好听啊？啱唔啱听啊？够唔够喉啊？……梗系未够喉啦！今晚嚟听好歌吖嘛，听金曲吖嘛，系咪？大把在手！嚟，继续！（跟住就到《水中花》。）

 

　　我哋又嚟玩啰喎！我哋又嚟精神一下，跳下舞好唔好啊？你哋又可以喺你哋个位嗰度企起身跳下舞嘞！嚟，Ｃｏｍｅ　ｏｎ！一齐嚟拍下手，将对手举高！（大家于是跟住又跳又唱《我心如雷》同《千年埋藏》。）

 

　　多谢晒大家合作，又可以坐返低嘞！啊，真系好乖噃你哋！

 

　　哇，好热啊，揾件薄啲嘅，揾件薄啲嘅。（即场换衫，大家可以大饱眼福。）

 

http://blog.ku6.com/2413636/playsong/1689758　有得听

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

 

　　多谢晒大家合作，又可以坐返低嘞！啊，真系好乖噃你哋！

 

　　哇，好热啊，揾件薄啲嘅，揾件薄啲嘅。（即场换衫，大家可以大饱眼福。）

 

　　好唔好玩啊头先？头先跳完舞喇，而家又可以唱歌啰噃！我哋今晚一于将佢变为一个大型嘅卡拉ＯＫ，将我哋以往所识嘅歌，我今晚喺度唱畀你哋听，而家开始一齐唱，好唔好？一齐拍下手，要齐咖下！（开始唱《今夜情为证》，全场好有节奏噉拍晒手大合唱。）

 

　　呢只歌好想大家一齐唱先得！（《小风波》大家当然会一齐唱啦！）

 

　　其实，今晚喺呢度呢，喺呢个演唱会呢度呢，我真系准备咗好多经典嘅歌送畀大家嘅，跟住落嚟呢一只，亦都系可以勾起大家好多回忆嘅一只金曲，送畀你哋，你哋听下就知咖嘞。（《爱的根源》又再掀起全场大合唱，真系激荡人心。）

 

　　（唱完《爱的根源》之后就到《孩儿》。）
　　多谢！Ｔｈａｎｋ　ｙｏｕ！一只讲出父母对子女嘅心情啊，亦希望大家做仔女嘅，听咗呢首歌之后真系要孝顺啲啊！

 

　　睇下今晚个天，大家有冇见到有星啊？好似冇喎，知唔知点解呢？因为今晚天上高嘅星全部落晒嚟呢度吖嘛。大家将手里面嘅电筒仔或者光管仔一齐开着佢好唔好啊？如果冇，就将你哋个手提电话一齐打开啦，跟住开着个手提电话，系，然后照一照，似唔似啲星啊？一齐点着佢吖，睇下场面有几壮观？睇睇先……哇！好正啊！嚟！（全场大合唱《雾之恋》：天边一颗小星星、海边一颗闪星星，或睡或现，闪烁不停……）

 

 

http://blog.ku6.com/2413636/playsong/1689768　有得听

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

　　其实大家成日都话听住我啲歌成长、长大，究竟知唔知我喺娱乐圈有几多年吖？噉又冇咁多，又冇五十年咁多！廿五年又唔止，其实真系成日讲，话畀大家听廿五岁，你估真系廿五岁咩？你都信？

 

　　喺我咁多年嘅歌唱生涯入面，其实有好多歌呢，都系我嘅作品。所以今次喺我嘅演唱会里面呢，选歌比较系，即系费神啲啦。亦都发现呢，其实有好多作品呢，系我自己写嘅，喺今晚呢度，我希望将一部分嘅歌，系我自己写嘅作品，攞出嚟同大家分享，如果大家系钟意我以往写过嘅歌嘅，不妨系畀啲反应畀我，等我知道日后，我喺创作方面，系应该跟住边个方向去写，好唔好？

 

　　其实做呢只歌呢，就系比较早期啲嘅作品，但我系觉得最振奋人心嘅，今日送埋畀你哋！（就系好考唱功同气魄嘅《傲骨》。）

 

　　得唔得啊？系咪有「食力」啊？我哋讲「食力」咖！

 

 

http://blog.ku6.com/2413636/playsong/1689775　有得听

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

 

　　得唔得啊？系咪有「食力」啊？我哋讲「食力」咖！

　　其实我系骑墙派啊，我系偶像派同实力派呀！

 

　　系咪要换衫啊？想换衫做咩喺度装下装下？

 

　　舞蹈编排呢就系Ｗｅｎｄｙ，Ｗｅｎｄｙ　Ｃｈａｏ。冇出嚟呀？唔紧要啦！

 

　　服装设计同埋头先出嚟嗰个，走上走落，同我换衫嗰个就系我个服装形象设计，Ｖｉｖｉａｎ，Ｖｉｖｉａｎ　Ｃｈａｎ，及所有台前幕后嘅工作人员。辛苦晒！

 

　　重更加要多谢嘅就系一班，喺多年前，我喺广东一带开演唱会嗰阵时，我话，希望有一日，日后我再开演唱会嗰阵时，我哋系有一个约定，就系，不见……不散！今晚喺呢度将一班不见不散嘅朋友聚首埋一齐，亦都系正好勾起一啲无限无限嘅回忆片段。（歌词啱晒而家嘅广州：古老的建筑已一一
迁拆……）

 

　　有一首歌喺演唱会呢度系要特别鸣谢嘅，因为有呢一首歌，先将我带到全世界，有华人嘅地方，今晚特别好隆重噉样，将呢首歌送返畀你哋，《爱在深秋》。

 

　　有一只歌，喺每一次演唱会入便呢，其实，你哋系好唔想听到嘅，但系每一次呢，唱嗰阵时呢，你哋又会跟住唱，送畀你哋今晚演唱会最后一首歌。（音乐响起，正系《讲不出再见》。）

 

　　好多谢，亦都好感动，咁多年嚟嘅约定，大家都系咁坚守。我亦都会紧守我嘅岗位，继续同大家唱歌，第日有机会再见。Ｂｙｅ－ｂｙｅ！

 

http://blog.ku6.com/2413636/playsong/1689800　有得听

卢总

谭校长无与伦比妙趣语录　＠　２００７「不见不散」广州演唱会
http://general-lo.blogcn.com/diary,12534248.shtml

 

　　（ＥＮＣＯＲＥ部分）
　　哇，重未走呀？你哋食咗饭未咖？唔肚饿呀？真系唔肚饿？系咪呀？系咪重想玩先？大声啲话畀我听系咪，系唔系？重想玩咩呀？跳舞唔够喉啊？噉一齐出嚟跳舞，嚟！

 

　　（唱完《夏日寒风》之后，林子祥突然现身舞台。）
　　谭咏麟：点解你会喺度咖？哈？

　　林子祥：我啱啱喺隔篱食紧嘢，听到你话喺度唱歌，噉我咪行入嚟啰。

　　谭咏麟：噉呀？哈哈哈！你喺出便嗰度食嘢呀？

　　林子祥：系呀！

　　谭咏麟：哇，咁好啊？你就好啦，你有嘢食！我未食嘢啊！

　　林子祥：噉就顺便嘞，送朵花畀你。

　　谭咏麟：送朵花畀我？多谢！多谢！多谢！啱啱几日前上个礼拜我先见完你呀，系咪先？

　　林子祥：系呀。

　　谭咏麟：我喺香港呢，我呢就攞咗个音乐成就奖。喺呢个音乐成就奖上面就得到阿Ｌａｍ呢嚟捧我场。哇，唱嗰啲歌呢，我呢生人呢，从来未试过噉演绎过嘅歌嚟。而家哈哈哈哈……今晚得唔得先？今晚喺度再唱一次得唔得先？畀所有朋友再听一听。

　　林子祥：可以试下噉啦。

　　谭咏麟：可以试下噉啦。（学佢噉讲嘢。）

　　林子祥：不过我呢度我呢度嘅人声要大番啲。

　　谭咏麟：系咪呀？哦，哦，哦。

　　林子祥：即系听音乐啲声。

　　谭咏麟：好，唱，唱，唱咩啊？

　　林子祥：我，我转咗佢几只，几只歌嚟唱下，唱畀你哋听下，好唔好？

　　谭咏麟：唱啰！我想，再近距离听！

　　（开始唱林子祥版嘅《爱情陷阱》＋《夏日寒风》。）

 

　　犀利呀！系咪犀利啊？但系点犀利都好，我哋点都唔会就噉放过佢咖，唱咗一只歌就噉走咗去，系咪先？你哋最钟意听阿Ｌａｍ唱咩歌啊？咩呀？《男儿当自强》？好！你哋呢？《男儿当自强》？好吗？喂，Ｌａｍ，呢队ｂａｎｄ呢，系同你伴奏过咖，所以我同佢哋讲咗先呢，一定要识你啲歌！得唔得？《男儿当自强》得唔得？嚟！《男儿当自强》！

 

　　多谢！再一次畀掌声多谢！多谢林子祥，喺食紧晚饭嘅时候走嚟探我！林子祥，多谢！

　　喺咁多年嘅艺海生涯入面，我其实我觉得，除咗我赚过嘅钱之外呢，最值得珍惜同埋我觉得，最能够令我系自豪嘅就系，我能够赚咗好多友谊。好多朋友真系咁多年都咁惜我，同埋咁支持我！今晚喺呢度，如果真系我朋友，同埋继续支持我嘅，一齐同我唱呢只歌，或者呢一阵同我同一个方向，将只手举起嚟摇摆一下舞动。（繁星流动，和你同路，从不相识开始心接近，默默以真挚待人……）

 

　　Ｔｈａｎｋ　ｙｏｕ！多谢晒！多谢晒所有嘅朋友！吖，头先唔记得咗，头先阿Ｌａｍ呢，呢位朋友，啱啱走咗嗰位朋友，阿Ｌａｍ好似嚟紧嘅日子都会喺广州开演唱会噃，你哋知唔知呀？你哋未知道呢？记得喇，我嘅朋友就即系你哋嘅朋友，系咪？有朋自远方嚟，一定要出力去捧场，好唔好？阿Ｌａｍ都系唱得之人吖嘛！ＯＫ？

 

　　我希望今晚每一位朋友都可以好似我噉样，永远永远都系噉廿五岁，永远永远都系咁开心嘅，好唔好？送畀你哋！亦都希望你哋能够做到最钟意笑嘅人！（非常讽刺嘅系，呢首歌其实系一首普通话嘅歌，个名叫做《最爱笑的人》。）

 

　　多谢！多谢晒！噫？点解冇人走嘅？真系，重系咁撑得住？如果你哋撑得住，我又撑得住！我话畀大家听，你哋撑得住嘅话，你哋只要听我嘅歌嘅话，我唱到八十岁，都唱畀你哋听！好唔好？

 

　　多谢晒！喺嚟紧嘅日子，我哋再见！Ｂｙｅ－ｂｙｅ！Ｔｈａｎｋ　ｙｏｕ！（「总相信，八十岁后，仍然能分享好戏，纵已失去浪漫气氛，往日情节亦记起，每一个画面里，每一个灯影里，如重播一切，有我共你……」呢次真系再见嘞，希望唔使等到八十岁后，我哋又可以再见啦！）

 

http://blog.ku6.com/2413636/playsong/1689841　有得听

卢总

谭校长同我约定：不见不散

http://general-lo.blogcn.com/diary,12481645.shtml

 

记得我同大家都系「不见不散」嘅！

http://bbs.cantonese.asia/viewthread.php?tid=9020&extra=page%3D1

王明

呵呵，阿伦真系妙语连珠。

samkong

多謝盧總！真係好有心機，將咁多譚校長嘅妙趣語錄整理上嚟同大家分享。
覺得校長同阿Lam對話嘅嗰一段就最為精彩嘞，哈哈。

卢总

谭咏麟嘅演唱会一向都系讲「食力」嘅，妙语连珠亦都系必然嘅——我卢总嘅好介绍冇错更加系必然嘅！

lilac_ly

呵呵 即场换衫－－－老谭怎么也抄别人N年前就用的手段？？

禾苗小昭

原帖由 lilac_ly 於 2008-1-22 10:09 發表 呵呵 即场换衫－－－老谭怎么也抄别人N年前就用的手段？？

 

照你咁讲法，咁呢个世界上第2、第三个开演唱会的人，都系喺度抄紧第一个开演唱会嘅人遮！

無名氏

我對依條噉嘅痰校長就冇乜好感嘞.大家可能唔知依條友公開挺董,撐孽瘤,開口埋口就話「真係......人嘅悲哀」.

hslbluesky

我仲以为是beyond的不见不散啊，我是他们的歌学习粤语的。