|
好多时，我都会遇到以下呢啲情况——
我：你知唔知阿边个嘅电话啊？
Ｘ：吾知。
我：讲我知呀，我有事揾佢。
Ｘ：话咗吾知。
我：「吾」就即系「我」，「吾知」就即系「我知」，既然你知，我梗系要问你啦！
Ｘ：……
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
我：识唔识搞呢只嘢啊？
Ｘ：吾识。
……跟住等咗良久，见冇反应。
我：重未舍得话我知呀？
Ｘ：头先都话咗吾识啦。
我：「吾」就即系「我」，「吾识」就即系「我识」。既然你「唔识」，就唔好话识啦嘛！
Ｘ：你睇得明就得啦！
我：我就系睇完觉得你识，你明唔明啊？
Ｘ：……
系唔系睇得明就得呢？系唔系觉得呢啲情况好常见呢？你有冇试过噉样畀人质问过？我就冇嘞，因为我从来都唔会犯啲噉嘅错误。
「吾」就系「我」，「唔」就系「不」，以后唔好再搞错！
有时会见到啲人将个「晤」字当咗「唔」字嚟用，应该多数都系因为形近而搞错，但有啲人以为系因为两者读音相同而搞错，其实系佢哋搞错咗就真！「晤」读「误」，第六声，例如「会晤」；而「唔」则读「ｍ」嘅第四声，「误」嘅音标系「ｎｇ」，因此两者系好唔同嘅！
有时会见到有人打个「悟」字，「悟」字同「误」字同音，都系读第六声，例如「悟出道理」、「觉悟」、「感悟」、「开悟」等。
「梧州」个「梧」，即系「梧桐」个「梧」，同个「吴」字同音，呢两个字同「吾」字、「蜈」字都系一样读「ｎｇ」，第四声，意思应该唔使我多解释嘞。
最过分系见到有啲人整个「五」字或者「５」嚟代替个「唔」字，个音唔啱，意思就更加系离天隔丈远，正一系９５Ｄ８－－「九唔搭八」！所谓嘅「网络语言」有时真系害人不浅！
其实重有其它类似嘅情况，在此就唔一一列举赘述嘞！ | 
發表於 2007-11-26 10:57:43