|
7·12 子之所慎
栋笃论语·述而第七
□子野专栏
【原文】子之所慎：齐、战、疾。
【译文】齐，同「斋」，指祭拜之前要做嘅斋戒、沐浴嗰啲嘢。
孔子小心对待嘅事有三件：斋戒、战争同埋疾病。
【栋笃】有句广告话：「男人最紧要系个肾。」噉行走江湖，最紧要系咩？又系一个「慎」。人生在世，要「慎」嘅事好多，兼且孔Sir系一个国事家事天下事事事小心嘅人，佢「慎」嘅，点止三种？系噉，朱熹嘅《论语集注》就同编《论语》嘅人补镬喇：「夫子无所不谨，弟子记其大者耳。」即系话，孔Sir咩事都好小心口架，只不过佢嘅弟子记啲重要嘅大件事啫。
噉点解「斋、战、疾」系大件事呢？嗱，斋呢，系关乎礼制嘅事。礼，不嬲都系孔Sir学说里面一个基本点嚟嘅，我哋学过，「子入太庙，每事问」，孔Sir对祭礼本来就好熟嘞，但系佢入咗太庙助祭，仲要事事问下先，你睇，几「慎」啊：)仲有一点，佢又话斋，「敬鬼神，而远之」。鬼神呢味嘢，话之佢有冇，总之，敬畏佢系冇错口架。「举头三尺有神明」，先至会「克己」，唔会乱嚟。噉「斋」呢，就系敬鬼神嘅一种态度，因为你如果带住污糟邋遢嘅身体同埋思想去拜神，神会嬲口架。所以，就要「斋戒三日，沐浴更衣」喇。提前三日，唔好食肉，唔好行周公之礼……咩，你问咩叫做「周公之礼」，点解唔行得？呢个问题……我哋留返广告之后再讲得唔得啊？噉我换另外一种讲法得嘞啩？即系话，做三日和尚，然后净身——嗱，又乱谂嘢喇——系冲咗凉，然后先至可以拜神。咩？忍唔住点办？超，乜你咁多问题口架，呢位同学，今个月你交咗学费未啊？
噉战争呢，因为关乎国家嘅存亡，梗系要「慎」喇。春秋无义战，战事一起，生灵涂炭，梗系要慎之又慎喇。身体健康，关乎自家生死，更加要「肾上加慎」喇。
好喇，讲完。咪住，我仲要留返少少作业畀大家谂谂佢：孔Sir呢三慎，第一慎，唔使讲，佢不嬲都系坚持要「遵礼」口架；第三慎，疾病，系人都要「慎」，点止阿孔Sir？第二慎，战争，喺鲁国又好，佢周游过嘅列国又好，慎唔慎，几时轮到佢话事啊？佢喺鲁国有咗少少权嘅时候，因为坚持「堕三家」(即系将掌权嘅孟孙、叔孙、季孙三家嘅城墙削低，抑制佢哋过分扩张嘅权力)，就引发咗鲁国嘅内乱——噉样过激嘅行为，慎定唔慎呢？仲有一次，齐国嘅陈成子杀咗国君齐简公，当时只系「享受大夫待遇」嘅孔Sir，即刻要阿鲁哀公出兵讨伐齐国——人哋嘅内政噃，使乜你插手呢？仲有，以当时鲁同齐嘅国力相比，大概相当于古巴同美国。噉样不自量力嘅行为，系慎定唔慎呢？
http://www.nanfangdaily.com.cn/southnews/dd/dsb/B14/200711200496.asp | 
發表於 2007-11-21 01:53:31