|
情系「羡园」，寻根护祖
广州旧影
□冯璐赟专栏
照片提供、口述：李浩元(前)
拍摄时间：1952年
拍摄地点：广州东山竹丝岗「羡园」
呢张相，系先嗰排我表哥喺美国返嚟嘅时候带返嚟嘅，佢一直都放喺身边。嗰时我仲好细，三四岁左右。表哥嗰阵喺度生活过，而「羡园」亦系外公起嘅，我哋对呢度都有一种情结。
「羡园」，系我外公喺美国开洗衣馆，赚到啲钱返嚟起嘅。外公叫赵广羡，「羡园」就系用佢个名嚟命名嘅。起好冇几耐之后，都冇享受几年就抗战嘞，之后人就走晒，啲日本仔喺呢个地方养马，一楼呢度原来就系踹到笠晒嘅，上面住人。后尾日本仔走嘅时候，啲贼仔将啲嘢全部整烂晒。依家就睇唔到嘞，我哋后尾先重新整过。所以嗰阵时，啲日本仔嚟嘅时候好厉害，所有啲洋楼全部占晒口架。
后来土改扩大化嘅时候，好多华侨同埋侨房都受过一定嘅冲击。所以1949年以后，呢啲屋畀国家或者畀铁路同其他单位占用咗，后来就有好多华侨攞唔返自己间屋嘅情况。喺均益路嗰边都好多侨房嘅，嗰边啲侨房仲有一啲官僚背景，当时好多人惊惊哋就走咗去台湾，或者出咗国，佢哋啲屋就畀国家收咗。亦都有一部分属于不明资产，有啲畀国家收咗，有啲就好滑稽，畀单位占用，之后就变咗系单位嘅嘞。我哋学校有个老师，佢嘅亲戚就喺均益路有两间屋，依家搞咗好耐都攞唔返嘞。新旧政权嘅交替好多嘢好乱，我哋如果唔系有张屋契，可能都攞唔返嘞。
「文革」嘅时候，我哋都返咗乡下住咗一轮，呢间屋就畀房管局代管咗。之后我1968年就下乡，喺农场做过工人，做咗几年老师，1977年恢复高考，我先考咗返嚟广州师院(即现广州大学)度读书。「文革」结束之后我哋返番嚟「羡园」，攞返使用权，但系我哋都系得二楼可以住，因为下边畀其他人住晒，呢啲人一直到上世纪90年代先至陆陆续续搬走晒，啲人有得赖就赖住唔走。嗰时有一啲开发商想征用我哋呢度，啲人就更加谂住话可以分间屋或者攞啲拆迁费噉。后尾冇整到我哋呢度，政策慢慢稳定番，呢间屋先至完全归返我哋所有。以前呢度周围都系农田嚟口架嘛，我哋系最高嘅嘞，依家，周围起晒楼，变咗我哋系「井底」嘞。呢啲屋都系「文革」后先起嘅，以前就得我哋呢度同后面两间侨房。90年代都有啲楼起晒过嚟我哋呢度，个上盖超咗我哋个花园呢度。如估按照依家嘅《物权法》就系违反嘅嘞，征用只不过系利用一啲名义，区政府起宿舍之嘛。不过我哋依家都冇办法嘞，因为呢啲嘢好难嘅，一般人嘅思想都系「民不与官斗」。
我哋屋企啲人大多数都系知识分子，好多人都喺国外读书，攞咗学位，依家佢哋都喺海外生活。我哋嘅上一辈，系我爸爸为咗守住呢间屋留喺广州，依家就系我一直住喺呢度。以前嚟讲，华侨第一代嘅文化水平系唔高嘅，但系华裔嘅文化水平比较好，就系因为华侨会比较注重第二、三代嘅教育嘞。不过依家我哋同啲亲戚都有啲隔阂嘞，因为佢哋都返得少。虽然话依家好多华侨都返嚟发展，但系实际上好多人都对呢边嘅政策唔了解，而且政策呢啲嘢经常变，你睇90年代都仲想搞我哋呢度，所以佢哋好多人都冇足够嘅信心返嚟。
噉当然依家慢慢好好多嘞，国家开始重视保障私人利益，颁布《物权法》，政府亦都开始保护呢种洋楼，好似文物噉唔喐得口架，新河浦嗰边都系嘞，开始有保护，规划有限制。我舅父佢好想返嚟睇下口架，「文革」时候好乱就唔敢返，依家都八十几岁嘞，返唔到嘞。后生啲嘅亲戚就都会返嚟睇下，寻根问祖吖嘛。因为依家啲政策稳定落嚟，我哋先至话有心机搞番好「羡园」，又整番个牌栋喺出面。迟啲退休有时间嘞，我仲要执一执个花园，所以啲亲戚返嚟都好开心，见番「羡园」个牌喺门口，因为「羡园」两个字，一栋楼，对于我哋嚟讲系感情、根祖。
http://www.nanfangdaily.com.cn/southnews/dd/dsb/B13/200711140275.asp | 
發表於 2007-11-15 03:16:13
發表於 2007-11-15 22:06:16
