指正错字却得到噉嘅回复：使唔使咁啊，睇得明就得喇！

waha234

寻晚睇咗个朋友嘅 blog中嘅一篇文章，发觉超多错字，用咗成半个钟头嘅时间帮佢改正，点知今朝却得到咁嘅回复：「洗五洗感啊～～～看得懂就行啦」。hurt 啊！回复嘅11个字都错咗6、7个！

唔知大家点睇呢？系咪真系：睇得明就得呢？

[ 本帖最後由 waha234 於 2007-11-5 21:25 編輯 ]

卢总

已经留咗脚毛，批评咗有关言论，稍后得闲会专门帮佢正一下字。

好似呢啲噉嘅情况，应该尽可能团结，拉佢入嚟接受教育－－噉我哋又可以多一分力量嘞！

茗荷介

正字本身就冇錯嘅，不過人哋咁辛苦用粵語打篇日記出嚟，至少都應該鼓勵吓。

可能係你句「哇，错字百出！！！！！！！！惨不忍睹，惨无人道。。。。」嚇親人啩？

育人应该谆谆教导，介紹佢入嚟一齊學習切磋都好啊

highyun

而家啲人對漢字嘅態度好多都好求其架啦。唔好講外面，就係Q群裏面，上次我糾正某個細路嘅發音同打字，佢竟然話我煩，而且又係嗰句害死人嘅「睇得明就得」。

李四

原帖由 highyun 於 2007-11-5 18:48 發表 而家啲人對漢字嘅態度好多都好求其架啦。唔好講外面，就係Q群裏面，上次我糾正某個細路嘅發音同打字，佢竟然話我煩，而且又係嗰句害死人嘅「睇得明就得」。 ...

係『求其』定『求祈』呀？

highyun

原帖由 李四 於 2007-11-6 00:11 發表 係『求其』定『求祈』呀？

我習慣用「求其」，理由：

1、未有確切證據證明「求祈」係啱

2、「求其」可以理解成「退而求其次」。

茗荷介

記得睇過粵協主頁個粵語課堂：

http://www.cantonese.asia/school/2006/200604/school_20060429212325.html

 

不過我都唔係好明點解「祈求嘅倒裝用法」可以表示「隨便」or「馬虎」。

 

waha234

「而家啲人對漢字嘅態度好多都好求其架啦」
系呀，因为大家都冇正式噉学习过粤语，只系喺平时嘅生活中耳濡目染噉嚟去学习，而好多人写嘅字都系错嘅，由其系Q聊，睇得多嘞，就变得麻木、求祈冇所谓嘞。
但我相信大家都系钟意粤语嘅，因为钟意，所以执着！
[ 本帖最後由 waha234 於 2007-11-6 13:02 編輯 ]

卢总

ｗａｈａ删除咗原文网址，噉我就贴原文出嚟啦：

 

2007-11-04 12:36:00

happy weekend

呢个weekends特别开心。          星期五，大家都翻得好迟。wonnie狂食了一晚，所以翻来之后有「报应」拉，饱到要训低；wing照常加班，好沮丧感翻来；我就坐车坐到头晕晕；anyway，大家都好累，不过都是要到1点几先去训。训醒果阵已经10点拉，真是满足啊，可以自然醒，中发梦见到魔法。          中午去左小西关食野，我严重怀疑的食物放左安眠葯，搞到我地下午一边行街，一边瞌眼训，阿wing中对住我讲左好多句：「睇路啊你～～！」系北京路翻来既的时候，无收获，比较郁闷，不过系买野翻去打火锅既时候，心情好翻，因为买左好多我中意食既牛肉丸，哈哈哈哈哈哈哈          翻到去好累啊，不过大家今日特别积极，wing中负责埋斩乌鸡同煲汤（听讲第一次哦），wonnie准备材料，我负责打扫，哈哈，间屋自斯斯离开后，第一次有家既feel。因为想热闹点，我地中四处打电话叫人来，不过太夜拉，最后剩是小毛同学过左来，还买左好多金针菇同啤酒。         感岩今晚TVB台庆，所以大部分时间我地挂住煲电视，好少将注意力集中系个锅上，过来一齐食的小毛好无奈～～         食到差五多饱既时候，望望小毛，竟然训着左～～～         睇下时间，睇来他都是翻五到去拉。所以我地好体贴感将ROOMB既野搬去ROOMA，再将ROOMC既野搬去ROOMB，中帮他铺到张床舒舒服服感，电视音量关细，想笑既时候，捂住个嘴笑，洗碗既时候又轻手轻脚。（P.S今晚的乌鸡汤好好味啊）         准备去训既时候，系时候叫醒他拉，几难叫下，所以唯有响他手机，然后放去他耳仔度吵，呢个人比较烂训，都吵左几分钟先肯醒。         好耐无三个挤一间房啦，所以倾计倾到可能差五多3点几，直到无晒力讲野，不知不觉感训着。（不过可能食太多啊，成晚三个个肚轮流咕噜咕噜响）。我地从小学讲到高中，大学，讲自己的辉煌，低潮，哈哈哈，知道好多秘密啊，中倾起好多同学～～～                 其实讲真，每次念起过去，我都觉得自己系度发紧梦，只系个梦太真实，如果五系点解时间感薄？眨眼就二十几年，但是就感觉五到一点厚度，呢种情况，呢种感觉只有发梦既时候会有～～～         我都五明点解一年要有365日，而每次一过左365日，我地就要大一岁。如果一开始就无人想知自己几时出世，几时生日，感就五会有人去考虑几岁要做几岁的事，就算是50岁既人去上一年班，都五会有人惊讶～～～80岁的人因为五知自己几多岁，中可以日日幻想自己得50岁，五洗过住日日提心吊胆等住「走」既日子～～～          用广州话写完呢篇野后，发觉超五习惯，原来感难写～～

卢总

虽然作者「雨」小妹妹有畀心机写，但系写错咗就系写错咗，「看得懂就行啦」呢种比「六十分万岁」更加唔要得嘅态度的确需要纠正！

希望「雨」小妹妹从呢次事件中可以学到嘢，端正态度啦！

 

        呢个weekends特别开心。
         星期五，大家都返得好迟。wonnie狂食咗一晚，所以返嚟之后有「报应」嘞，饱到要瞓低；wing照常加班，好沮丧噉返嚟；我就坐车坐到头晕晕；anyway，大家都好攰，不过都系要到一点几先去瞓。瞓醒嗰阵已经10点喇，真系满足啊，可以自然醒，重发梦见到魔法。
         中午去咗小西关食嘢，我严重怀疑啲食物放咗安眠葯，搞到我哋下午一边行街，一边瞌眼训，阿wing重对住我讲咗好多句：「睇路啊你～～！」喺北京路返嚟嘅的时候，冇收获，比较郁闷，不过喺买嘢返去打火锅嘅时候，心情好返，因为买咗好多我钟意食嘅牛肉丸，哈哈哈哈哈哈哈
         返到去好攰啊，不过大家今日特别积极，wing重负责埋斩乌鸡同煲汤（听讲第一次哦），wonnie准备材料，我负责打扫，哈哈，间屋自斯斯离开后，第一次有家嘅feel。因为想热闹啲，我哋重四处打电话叫人嚟，不过太夜嘞，最后净系小毛同学过咗嚟，重买咗好多金针菇同啤酒。
        咁啱今晚TVB台庆，所以大部分时间我哋挂住煲电视，好少将注意力集中喺个煲上，过嚟一齐食嘅小毛好无奈～～
        食到差唔多饱嘅时候，望望小毛，竟然瞓着咗～～～
        睇下时间，睇嚟佢都系返唔到去嘞。所以我哋好体贴噉将ROOMB嘅嘢搬去ROOMA，再将ROOMC嘅嘢搬去ROOMB，重帮佢铺到张床舒舒服服噉，电视音量关细，想笑嘢时候，揞住个嘴笑，洗碗嘅时候又轻手轻脚。（P.S今晚嘅乌鸡汤好好味啊）
        准备去瞓嘅时候，系时候叫醒佢嘞，几难叫下，所以唯有响佢手机，然后放去佢耳仔度嘈，呢个人比较烂瞓，都嘈咗几分钟先肯醒。
        好耐冇三个逼一间房嘞，所以倾偈倾到可能差唔多三点几，直到冇晒力讲嘢，不知不觉噉瞓着。（不过可能食太多啊，成晚三个个肚轮流咕噜咕噜响）。我哋从小学讲到高中，大学，讲自己嘅辉煌，低潮，哈哈哈，知道好多秘密啊，重倾起好多同学～～～
       
        其实讲真，每次谂起过去，我都觉得自己喺度发紧梦，只系个梦太真实，如果唔系点解时间咁薄？眨眼就二十几年，但系就感觉唔到一啲厚度，呢种情况，呢种感觉只有发梦嘅时候会有～～～
        我都唔明点解一年要有365日，而每次一过咗365日，我哋就要大一岁。如果一开始就冇人想知自己几时出世，几时生日，噉就唔会有人去考虑几岁要做几岁嘅事，就算系50岁嘅人去上一年班，都唔会有人惊讶～～～80岁嘅人因为唔知自己几多岁，重可以日日幻想自己得50岁，唔使过住日日提心吊胆等住「走」嘅日子～～～




         用广州话写完呢篇嘢后，发觉超唔习惯，原来咁难写～～

[ 本帖最後由 卢总 於 2007-11-20 11:42 編輯 ]

neogeo

好心你地, 先拉左人過來, 再慢慢教育啦~ 因住嚇親人, 引起反效果

錯覺

我覺得罪魁禍首係我哋呢個年代根本就冇學過正正規規嘅粵字究竟係點寫.！

 

時代嘅錯，Mandarin嘅錯。！