|
栋笃论语·述而第七
□子野专栏
【原文】子曰：「志于道，据于德，依于仁，游于艺。」
【译文】孔子话：「志立于道，行守于德，心归于仁，身游于艺。」
【栋笃】咪住，听我读下资料先：1985年，全国共青团思想政治工作会议上提出：要加强和改进新时期的青年思想政治工作，在四化建设的伟大实践中培养和造就一代有理想、有道德、有文化、有纪律的共产主义新人。从此，「做四有新人」的口号和以此为主题的活动在全国各行各业展开。
嗱，唔系我捞过界，想学阿林野王写咩「旧年旧词」专栏，确实系我读到孔Ｓｉｒ呢句说话嘅时候，心入面好自然噉就浮起咗「四有新人」呢个「旧年旧词」（其实亦唔系好旧，廿几年啫），于是我即刻就去百度度Ｇｏｏｇｌｅ下，揾到咗呢啲资料，攞过嚟同大家分享下喇。
我唔知提出「四有新人」呢个口号嘅嗰位大佬，有冇读过《论语》嘅呢一章，如果冇嘅话，「历史是这样惊人的重复」，事隔两千几年，佢同阿孔Ｓｉｒ都「不约而同」噉向啲年轻人提出咗相同嘅要求。我哋嚟睇下：志于道，即系「有理想」；据于德，即系「有道德」；依于仁，即系「有纪律」；游于艺，即系「有文化」，顺序可能有少少唔同，要求就一模一样喇。
再讲深一层，新旧「四有」喺轻重之分上边，又系不谋而合ロ架。孔Ｓｉｒ系「道、德、仁」为重，「艺」为轻ロ架。佢讲嘅另一句话可以证明：「弟子入则孝，出则弟，谨而信，汎爱众，而亲仁，行有余力，则以学文。」（1·6）重有另一句，我哋学过冇几耐：「君子博学于文，约之以礼，亦可以弗畔矣夫！」（6·27）即系话，仁义道德，系最重要ロ架，「博学」嘅人，要用「礼」去约束佢，先至唔会乱嚟。而新「四有」之中，「有文化」嘅排名虽然上升咗一位，排喺「有纪律」嘅前边，但系就仍然要受到「理想」、「道德」嘅制约。至于「四有」提出之前嘅六七十年代，全国学习「白卷英雄」，「又红又专」嘅「专」就完全唔要，一於「红」就得，而嗰啲被评为「白专」（思想「反动」嘅专业人才）嘅，就受到咗残酷嘅批判、打倒喇。
图：
「四有古人」系要有道、德、仁、艺，点解「四有新人」变咗要有道、德、艺、仁嘅？
有道德嘅艺人好难揾啫！ | 
發表於 2007-11-3 03:32:32
