２００７年１０月３１号《南方都市报》

卢总

 

http://www.nanfangdaily.com.cn/southnews/dd/dsb/B14/200710310350.asp

卢总

　　栋笃论语·述而第七　　
　　
　　□子野专栏　　
　　
　　【原文】子之燕居，申申如也，夭夭如也。
　　【译文】孔子喺屋企得闲冇事嘅时候，个样系好舒展ロ架，神色系好愉悦ロ架。
　　【栋笃】嗱，一句笑话系噉讲嘅：样衰唔系你嘅错，出嚟吓人就系你唔啱嘞。讲老实话，孔Ｓｉｒ个样，照史书嘅记载睇嚟，系好肉酸ロ架。好彩，佢畀佢嘅学生、支持佢或者反对佢嘅人留低嘅印象，一啲都冇「吓人」嘅感觉。点解呢？
　　用依家嘅话嚟讲，孔Ｓｉｒ有「大家风范」。大家风范，唔单止系表现出「阿Ｓｉｒ」或者乜乜「大成至圣先师」应有嘅样，重包括埋佢平时喺屋企、喺家人面前或者独居嘅时候，表现出嚟嘅嗰种舒展、怡然自乐嘅仪容。
　　系咩令到人可以咁「申申如也」、「夭夭如也」呢？答案就系：心平气和。孔Ｓｉｒ后生嗰阵，系一个咩都睇唔顺眼嘅「愤青」，因为喺佢心目中，呢个世界简直人心不古、礼崩乐坏，见到咩都有「是可忍孰不可忍」嘅愤怒。但系，「四十不惑」之后，开始「知天命」，开始「耳顺」，开始识得点「忍」，好自然噉，内心就会逐渐归于平和。呢种平和，唔系话佢放弃咗恢复周礼嘅努力，而系知道咗「谋事在人，成事在天」，从一个向诸侯推销仁政嘅理想主义者，过渡到一个教书育人、传播文明嘅现实主义者。［「过渡」用得啱，不过有时啲人就会将「度过」同「渡过」搞乱，连带将「过度」同「过渡」都搞乱埋。］
　　喺依家呢个竞争激烈嘅社会入边，现代人最缺乏嘅，就系呢种「申申如也，夭夭如也」嘅平和嘞。冇错，竞争使人进步，但亦都容易令到人心浮气躁。呢种心态，唔单止喺公司、喺社交场所、喺公众场合出现，亦都会带返屋企，就算喺独居嘅时候，亦都冇办法有一种平和嘅心境。最常见嘅「资讯焦虑症」呢一类心理问题，就系噉出现ロ架。
　　为自己嘅健康谂下，为社会嘅和谐谂下，读下《论语》，学下孔Ｓｉｒ嘞：）

卢总

 

http://www.nanfangdaily.com.cn/southnews/dd/dsb/B14/200710310352.asp

卢总

　　食在广州　　
　　
　　□陈明　　
　　
　　1946年，喺广州嘅城隍庙前有一家宁昌饭店（即原嚟中山四路东江饭店），招牌菜系盐焗鸡。东江饭店嘅招牌菜盐焗鸡采用清远鸡做原料，按照白切鸡制作后，用淮盐、味精、沙姜粉、芝麻油等佐料涂喺鸡腔内，然后用涂上生油嘅纱纸将鸡包封住，再包一层素净嘅纱纸，将鸡放入砂锅用盐封盖，焗番十五分钟，蒸汽将盐味慢慢向鸡渗透，等盐嘅温度降低后，再将盐炒熟，将鸡反转，再焗七分钟，制成后嘅盐焗鸡皮色油润，保持鸡嘅原汁和营养，鲜嫩爽口，味道甘美。因盐焗鸡起源广东东江一带，所以叫东江盐焗鸡。［严格嚟讲，应该叫「砂煲」，广东人极少叫「锅」。］
　　有一日，一位警官预订咗一只盐焗鸡，但系晚黑十点钟重未见嗰位警官嚟，老板一位老友从外地光临，想试下招牌菜盐焗鸡，老板以为嗰位警官咁夜唔会嚟，就将嗰只盐焗鸡攞嚟请老友食。点知盐焗鸡先食咗开头，警官就带人嚟，催老板上盐焗鸡食。老板好惊噉谂，重新做过只盐焗鸡要个几钟，警官又唔可以得罪，点算？老板急中生智，马上将一煲滚热辣嘅上汤放上好多盐，再将鸡放入去浸，熟咗就将鸡过冷河，再将鸡头、鸡皮、鸡肉、鸡骨分离，然后用沙姜粉、淮盐、芝麻油等味料调好，拼好一个鸡形状，亲自攞到警官面前，话系新创嘅盐焗鸡，免费请长官食。警官高兴噉夹块鸡皮一试，就大声叫好，话系味道一流，鸡皮爽滑，肉鲜骨嫩。［「滚烫」呢啲字眼并唔系广州话嘅讲法；「挪」只系移动，并冇「拿」嘅意思，应该系「攞」先啱。］
　　后嚟，老板将呢种做法叫「汤浸盐焗鸡」。所以广州人要食盐焗鸡必去老招牌「东江」，可惜依家东江饭店已经冇再经营，好在依家广州好多酒楼都出品盐焗鸡，所以爷爷上酒楼食饭仍然会点盐焗鸡嚟食。 ［「无」读「毛」，「冇」读「母」；喺呢类文章里面出现「吃饭」真系…… ，要戒！切记！切记！］

卢总

《南方都市报》从善如流，子野嘅栋笃论语同阿展专栏冇再将个「係」字用错，值得称赞！

卢总

 

http://www.nanfangdaily.com.cn/southnews/dd/dsb/B14/200710310353.asp

 

《背影》（选段）

 

　　经典粤读　　
　　
　　□粤语协会供稿　　
　　
　　原文
　　那年冬天，祖母死了，父亲的差使也交卸了，正是祸不单行的日子。我从北京到徐州，打算跟着父亲奔丧回家。到徐州见着父亲，看见满院狼藉的东西，又想起祖母，不禁簌簌地流下眼泪。父亲说：「事已如此，不必难过，好在天无绝人之路！」
　　粤读
　　嗰年冬天，阿嫲过咗身，阿爸份工亦转埋畀人跟，真系黑开头有条路。我由北京趯去徐州，谂住跟埋阿爸返归送殡。去到徐州见到阿爸，睇到天阶七国咁乱，又谂返起婆婆，忍唔住ｂａａ6　ｂａａ6声眼泪掂流。阿爸讲：「都定局啦，唔好咁难过嘞，好彩船到桥头自然直！」
　　点评
　　「天无绝人之路」一句，虽然系众所皆知嘅讲法，本来可直接照搬，但作者翻译时使用咗「船到桥头自然直」呢句更为地道嘅广东俚语，目的系营造一种与原文有异曲同工之妙嘅感觉，既无偏离原意，亦更好噉体现咗目标语——粤语嘅特色。