|
扁鼻（慢条斯理）：唔使急，食饱饮够，我哋就松松个裤头走人。噉嗰啲店员、企堂会话：喂！你哋未曾找数，请快啲畀钱。我哋就问：点解要我哋睇数畀钱啊？企堂就会问：你哋食完咁多嘢，点解唔畀钱啊？我哋答：本来我哋根本就唔想食，系你哋叫我哋食。
众人：哗！噉都得？
扁鼻：你哋咪激动，听我嚟补充。企堂发恶话：你哋眼盲嘅咩，系我哋叫你入嚟食，周围都挂住食嘢嘅价钱，瞪大只狗眼睇下啦！
扁鼻：我哋次次食完晒嗰啲嘢，店员都系咁讲，但系佢哋始终讲我哋唔赢。
众人：点解？
谷能：我哋一齐上前又讲道理兼发恶。上高系有写明价钱，但系冇讲清楚系你畀我，定系我畀你，又系你叫我哋食。讲咗好耐数口之后，多数经理都话：好啦，咪嘈啦，算我哋行衰运啦，走啦。唔使你哋畀钱喇。盲四就大声夹恶：乜嘢话！头先唔畀我哋走，而家又叫我哋走，我哋系贵客，唔係系儿。我哋架私家车开走咗咯，快啲畀搭车钱，唔系我哋几大都唔肯放过你哋。最后店主怕阻住做生意，好快就会畀车钱，我哋咯……咯……嘻……嘻……哈……
众人：系噃，真系使得嘎，呢条屎计喺边度学返嚟嘎？
马面：哈……哈……呢啲计梗系屎坑计。我以为有乜嘢高明正气、点石成金之法，原来系噉。如果讲得客气啲，我就送你八个大字。
众人：八个大字，系点样写嘎，客气啲讲啦。
马面：最客气嘅系噉样讲，听住喇。
众人：好……
马面：刁民食饭，免费供应。
众人（大叫）：咁刻薄。
马面：点算刻薄啊？实事求是就真。
阿丙：马记，你头先系客气讲咗八个大字，系免费白食，噉如果唔客气讲法又点？
马面：佢哋第一要落得面，要不知人世有羞同耻；第二仲恶劣过偷，同明抢差唔多，係欺负嗰啲老弱幼小嘅群体。
谷能：当今世界系有力在上，冇力就在下，啱唔啱啊？
马面：如果噉样讲，我有枪，一枪一个将你杀咗，得唔得呀？呢个世界有法律嘎，我哋大家都系人嚟嘎，都系有老母生嘎。
阿丙：谷能讲，有力者喺上层，冇力者喺下层，应该系讲能力、知识系力量，唔係靠凶恶奸偷强抢，唔好搞错啊。
谷能、扁鼻、盲四齐讲：总之，我哋唔系偷，又唔系抢，又唔系骗，我三样都唔算，话我哋乜嘢，睬你哋都发毛。系唔系想打交开片。一个对一个，有本事出嚟打过。（拍枱又拍凳）
阿丙：你哋系变相明抢。不过讲说话唔好搞成噉个样，我哋起码系朋友一场，天大嘅事都好商量，大家说话千祈唔好搞得咁僵。唔够嘢食就加码，添酒加肉快啲上，通通入我阿丙账。
众人（一齐叫）：因为有得食，噉我哋通通变晒样，乜事都有商量！
大细眼：饮酒歌我先唱。请各位即出题目。
众人：用「丙哥」两个字啦。
大细眼（唱）：丙哥够义气又情长，个个饮酒食肉入晒佢荷包嗰盘数目账，我哋畀面丙哥，乜嘢事都唔好计较论短长，我哋食肉重要加啲调味酱，今晚呢度差啲大打出手又变成战场，有酒有肉真系喜气又洋洋。三杯落肚乜事都唔好记旧账，出口说话要思想，朋友感情唔好伤。开晒！ | 
發表於 2007-10-16 05:33:28
