|
每日，祇要閣下細心留意，喺廣州城入邊會發現以下發音不絕於耳，聽唔到嘅話恐怕需要急移玉步去睇五官科：
「廣州」講成「港州」、「中國」講成「中角」、「過往」講成「個往」、「光榮」講成「剛榮」、「陽光」講成「陽江」、「水果」講成「水嗰」、「郭富城」講成「各富城」……
呢啲林林總總嘅懶音現時喺廣州、香港街頭巷尾屢聞不鮮，民眾自視見怪不怪，一句「溝通得嚟就OK」大過天，一向對正音抱無所謂嘅態度，似是無可厚非。不想身為「靠把口搵飯食」嘅城中電視節目名主持人、電台名DJ，尤其是播新聞節目擔正大旗嘅主角，本嚟最基本之要求即為字正腔圓，卻竟對自己嘅「搵食架撐」亦疏於執拾，毫無嚴謹之作風，大量充斥住各種懶音甚至怪音，於老廣州及粵協眾愛粵同仝之心有戚戚然。
以下先旨聲明，舉例旨在搵出箇別典型人物，並非對其本人進行人身攻擊，還望鑒諒。本期「大張撻伐」之對象即為廣州電視台晚間六點半首席男新聞主持人林剛先生。Mr. Lam主持電視節目，而且係喺市級最聞名之電視台，兼且身為黃金時段新聞主持，按理係全廣州市廣播界發音之楷模，做得好者肯定成為見賢思齊之表率，否則上樑不正下樑歪祇會引領更多人講錯廣州話。
再觀其look、聽其言：此君面相甚得人心，然開口埋口都講「港州電視台」、「港州新聞」、「港東省長」、「中角政府」……似有身處其位而忘其主子之名，抑或久安於此需增加些少情趣，揶揄逗弄主子乎？眞不得而知也。然於我等對廣州話正音執着者耳中，總有一絲「哏耳」之感，還望林大俠有幸見此文，請高抬貴口，還我等耳根通暢之權利，否則電視遙控每次轉過廣州電視台，我等耳仔神經又開始扎扎跳，搞到要索賠大家面左左就無謂嘞。
一個典範做好咗，樹立好形象，筆者亦相信同行更有一份講好母語嘅責任感喺心中，本地廣播之音更趨「和諧」悅耳。
[ 本帖最後由 余OK 於 2007-9-27 14:15 編輯 ] | 
發表於 2007-9-24 21:39:22
發表於 2007-9-24 22:01:12
