|
有啲嘢係避無可避，要嚟嘅始終要嚟。——G肉佬（2007-8-17）
連日嚟嘅不安好似預示咗我嘅預感將要成為事實。呢排市场附近成日有架黑色跑车停喺度，透过车前嘅挡风玻璃，可以清楚见到车前嘅「タチコマ」公仔。雖然車牌係一堆陌生嘅數字，但我好肯定，嗰個人終於揾到嚟。
由於長期處於精神緊張狀態，又加上唔夠瞓，令我神不守舍，有生意都冇心機做。只要一見到市場裏面有著住黑衫嘅女人行過，就會用三星鉤上嘅肉排遮住自己塊面，啲街坊見到我噉，重以為我傻咗。
於是今日決定休市，順便去芳村買茶葉，賣茶葉嘅福建佬重係冇點變，可能識飲茶嘅人都識得養生啩。幾嚿水嘅茶葉其實冇幾多嘢到，福建佬攞住啲一百文紙，用閩南式嘅廣州話講：「兮，以前四個，依家剩返一個！」我笑吓，話：「所以家吓呢張嘢都唔多見使嘎咋!」
大街上面，幾隻流浪狗喺度揾緊下一碌不幸嘅柱狀物體；一個鞋抽面男人同一個哨牙女人喺度通街打車輪，就好似兩個咬合嘅齒輪噉；唔知邊度走出來嘅傻仔對住小區綠化帶嘅雕像敬禮，神情重好嚴肅；然後唔知聽到邊個講，芳村呢度家陣屬荔灣區……
攤喺屋企亦都係百無聊賴，我十足一個失業青年噉一下子變得好頹廢。好耐冇剃須喇，樣有啲殘。攞住個遙控不斷轉臺，電視上面唔係啲又長又臭嘅電視劇，就係啲爛鬼豐胸整形廣告，賣藥同賣樓嘅都唔少，有啲廣告實在太樣衰，我見到幾乎想掟爛部電視機。
冇嘢做真係好無聊！我喺度諗，聽日都係返去開襠好啲……
[ 本帖最後由 gboss 於 2008-11-13 14:47 編輯 ] | 
發表於 2007-8-28 08:34:48
