G肉佬之日常：Talented

gboss

　　有啲人，能力同成就唔係成正比嘅。——G肉佬（2007-7-23）

　　「I'm bringing sexy back（呯）. Them other boys don't know how to act（叮）. I think it's special what's behind your back ……」

　　市場唔係咁多人嘅時候，我就會係度一邊Rap一邊切豬肉，重動用一切可以打拍子嘅工具嚟和音，順便喺度賣弄吓純熟嘅刀法。唱到興起嘅時候，重會好似MJ噉用Moon Walk嘅舞步喺有限嘅空間滑兩步。呢個檔口，就係我嘅舞臺！

　　「豬肉佬，你真係幾時都咁有型個喔！」

　　「放學了咩，艇少。噉贊我，有咩要我幫手啊？」

　　「哈哈，聰明！幫我做美術課作業啦！題目係‘我嘅朋友’。」

　　艇少係我啲街坊，小學雞一個，先三年級，但人細鬼大。佢成日來我屋企打機，所以好熟。條友經常要我幫佢做作業，所以成日畀高帽我戴。見到佢我就諗起我細個，我都好鬼馬嘎。嗰時如果有人蝦我，知道唔夠人打，就用公仔紙收買啲高年班嘅同學幫我出頭，好黑社會哦可？哈哈！

　　講到畫畫，我最洒家啦，用幹布抹吓手，攞起艇少嘅蠟筆，喺畫紙上面隨便潦幾下，大作完成！艇少重托住腮，睇到入晒神。

　　「哇，好犀利啊，但點解你畫到自己咁醜樣嘅？」

　　「畫得我咁靚仔，點知你啲Miss 會唔會迷上我嘎！而且畫得太靚，就係人都估到唔係你畫嘎啦！」

　　「我唔明吖，你唱歌又似張學友，跳舞又似阿Rain，畫畫又似梵高，電腦又叻，又咁有才華，點解你要賣豬肉嘅？」

　　「因為……我要做好呢份工！話時話，噉贊我，又有咩要幫手啊？」

　　「所以話，你係至醒嘅！幫我寫埋作文吖，最多我介紹我班啲女生你識啊，個個都係處女嚟嘎！」

　　「……死僆仔！」

　　　　　　　　　　　　　　　　　　

幫艇少畫嘅畫——《我嘅朋友》

[ 本帖最後由 gboss 於 2008-11-13 14:57 編輯 ]