|
好多節日，對於我嚟講，都係沒咩意義嘅啫。——G肉佬（2007-7-15）
今日係我新曆生日，但同好多節日一樣，我都要開檔。所以其實每一日都冇乜唔同，除咗喺檔口，就係喺屋企，兩點一線，幾乎日日如是。
悶熱嘅天氣令人心情煩躁，呢個月因為豬肉價一直冇乜點降，所以生意麻麻，成個人都冇乜心機。嚟買餸嘅人都話我又瘦咗，嗯，乜我有肥過咩？
一個以前嚟我度買豬肉嘅特困戶經過我個檔口，呢位阿姨係個賣胸圍嘅走鬼，呢排城管趕得犀利，都好耐冇見佢擺攤喇，佢個仔重讀緊小學。只見佢望住我檔口嘅豬肉，一直冇行埋嚟，連走都係一步三回頭……
話時話，講起走鬼，已經好耐冇見嗰個街口嘅牛雜佬喇，都好耐沒聞到撲鼻嘅牛雜香。牛雜佬講嘢好鬼抵死嘅，幫襯過佢嘅街坊都話佢唔去做講故佬嘥晒，唔知佢衣家點呢？
「我返來喇！」收擋返到屋企，習慣噉叫，唔記得老母老竇去咗旅行。前嗰排係自己提議出錢畀佢哋去玩吓嘅，唔知佢哋玩得開唔開心呢？食完飯，數咗吓今日收嘅錢就去洗白白喇，電視都冇咩心機睇，新聞猛咁炒游珠江啲嘢，啲人講嘢又冇水平，唔通得陳Sir識講嘢？
完全冇過生日嘅感覺，但第日一瞓醒，又大一歲喇。喺張床度輾轉反側，右眼一直眼眉跳，可能我一直擔心嘅事要發生喇……
[ 本帖最後由 gboss 於 2008-11-13 14:59 編輯 ] | 
發表於 2007-8-28 08:25:19