G肉佬之日常：Quality-assured Meat

gboss

　　生意難做，奸商就咩招數都出齊。——G肉佬（2007-7-7）

　　「喂，係唔係買嘎？唔買唔好咗住晒啊！」

　　今日好難得先有幾個師奶嚟我度買瘦肉，竟然有條白粉仔想喺我檔口前面偷嘢，真係屙屎唔識風向！咪喝住距囉，啲師奶都馬上醒水，嗱嗱聲睇吓個袋。

　　喺呢啲貧民窟，奮發向上嘅人唔多，自甘墮落嘅人反而唔少。好似我咁老實兼且有正義感嘅人，真係越來越少喇。就攞做生意嚟講啊，就算呢排生意咁難做，我都唔會攞私宰肉嚟賣嘅。最多係呃吓稱，哈哈！但都係一二兩，唔多覺，而且個公稱整返好之後我都呃少咗喇。做市場嘅唔呃稱，就好似廚房佬唔偷食一樣，都會畀雷劈嘎。所以呃稱事少，最緊要嚟我度買嘅都係放心肉。老實講，雖然肉價升到咁高，但其實我哋啲豬肉佬真係賺得好微嘎咋！

　　無論生意幾難做，做人都要對得住天地良心。嗰啲私宰嘅注水豬肉分分鐘食壞人。每頭豬多賺嗰兩三百蚊又點？我唔會咁蠢，做壞自己個生招牌嘅！

　　呢排啲工商佬成日嚟查私宰肉，聽講啲奸商將放心肉同私宰肉溝埋一齊賣，噉就比較難發覺。不過我哋行家一睇就知，啲私宰肉都係注過水嘅，一切就會成張豬肉台都係水，而且肉質冇乜彈性，多數係啲病豬死豬。新聞都有播過出嚟啦，嗰啲咩「私宰窩點」，劏豬嘅地方真係好鬼邋遢，睇到都唔開胃。

　　好喇，工商佬呢頭查完，記者佬嗰頭又嚟採訪，煩到死！嗱，我賣嗰啲全部都有紅印嘎！

[ 本帖最後由 gboss 於 2008-11-13 15:15 編輯 ]