[建議]

海幢闲人

闲人闲得滞，提个闲意见，请贵站试考虑增设一个栏目，既可以比有兴趣的网友，用广东话吟诗作对，又可以多些特色，多凸出另一些文化氛围。咪比果D外省佬成日当广东人无文化。兹举例，如广东话诗：廖凤舒(民国时期廖仲恺大佬)写嘅

           咏司马相如

十月天时芥菜心，突然挑起为弹琴。

姑爷卖赋钱难揾，小姐当垆酒要斟。

穷到牛头赊裤着，踫啱狮鼻打锣寻，

茂李仲想装埋艇，头白吟成无晒音。

 

 

 

又例：白话对联。 何淡如(同治元年举人)擅长用白话写谐联。

(无情对)

友吟唐诗：四面云山谁作主

何 接 对：一头雾水不知宗

 

又：有酒不妨邀月饮

       无钱那得食云吞

其嫁女自撰谐联：

        打鼓打锣，不过戥人高兴

        搬埕搬塔，总之自己破财

 

若建议唔啱，就当闲人发噏风时嘅闲言闲语。(讲单揼心嘢，十多年前在某书局看到十数种用白话写的小说，其中"我是山人"著的"佛山赞先生"套装书等，唔知乜原因，终归无买。依家揾极都唔见。揼、揼、揼、、因为书里面好多白话字呀！)

07-07-07

此建议非常好！非常好！

UngooChan

論壇更換在即，到時定會新設好多版塊。樓主保留住呢啲有益嘅建議，到時喺新論壇會專門提供空間收集新版建設方面嘅建議。

卢总

善哉！善哉！幸甚！幸甚！

卢总

以下是引用07-07-07在2007-8-13 19:47:53的發言：
此建议非常好！非常好！

直头好到加零一添啦！

[em17]

余OK

　　我講返句少少「撥冷水」亦係經常講嘅說話，開設新版一定要考慮能唔能夠保證到人氣。譬如睇睇最新設嘅外語版，有時重算有啲嘢睇，而好多時就門堪羅雀；同時得力的版主能夠坐鎮亦好重要，能夠發揮撐旺自己地頭嘅作用。

卢总

乜解究你要“拨冷水”？

余OK

　　「撥」咗「冷水」，可以令大家更好從其他角度睇問題，何樂而不為？從心底上我當然「十扑」有建設性嘅意見。

卢总

顶！我系话你点解唔系“泼”，而系“拨”啊！