[原創]“粵語文庫”啲文章都唔係粵文

芬1012

呢度叫“粵語文庫”，點解唔見有粵語文嘅？

殺人王

版規都話呢個版用來發其他文章

況且,你都唔係第一個提出呢個意見架喇.D高官始終都係唔會聽,你咪由佢發囉

highyun

早就有人解釋過呢個問題，請睇http://bbs.cantonese.asia/dispbbs.asp?boardID=119&ID=7219&page=1。

余OK

　　希望唔好再提呢個問題，因為經已答咗一次又一次，唔想再解釋咁多；亦都希望對此有異議者唔好譠譠打打，因為聽落好心悒，有本事嘅就嚟撐旺個場佢，而唔係一味喺處奚落人哋做得點點點唔好。

卢总

寡人再次力撑余OK！

highyun

送句話畀余ok：Do what you feel in your heart to be right-for you'll be criticized anyway. You'll be damned if you do, and damned if you don't.
再整多句中文版：自信滿心裏休理會諷刺與質問，笑駡由人灑脫地做人。

殺人王

以下是引用余OK在2007-8-14 9:21:39的發言：

　　希望唔好再提呢個問題，因為經已答咗一次又一次，唔想再解釋咁多；亦都希望對此有異議者唔好譠譠打打，因為聽落好心悒，有本事嘅就嚟撐旺個場佢，而唔係一味喺處奚落人哋做得點點點唔好。

如果有異議就係譠譠打打,咁你同我檔都無咩分別!你話"答咗一次又次",咁點會有人"一次又一次"咁問呢??係咪問你嘅都"譠譠打打"?對於粵協嘅"撑場"我自認都唔算少,係咪真係你認為用呢個方式亂放埋D唔同嘅文章喺呢個"大雜燴"版塊就可以撑旺個場???

你係超版,你可以決定好多嘢.

你唔聽人意見無所謂,但係你無咁嘅空襟同氣量接受人地意見嘅時候唔使下下都話人"譠打"你嘅.

你有本事嘅就使有異議嘅人由衷咁"無異議"如果唔係就唔好話人地"奚落".
以前我都話"刷版"無异"屠版",睇來你蒲嘅論壇太少喇,連最簡單嘅道理都唔明.

冬至

直接加係版规度唔得咩

余OK

　　欲加之罪何患無辭。應該講嘅我經已喺嗰張帖講晒，近年嚟自身養成嘅處世哲學已令我與他人爭辯嘅機會極少。而諸如「漢奸」陶傑、「千古罪人」彭定康「之流」淡然but充滿自信、話中有骨噉去面對各種責難嘅風範尤為我所欣賞佩服。試問有幾位眞係睇過啲專欄文然之後再發表高見呢？諗到呢點我就冇晒同人辯駁嘅慾望嘞。
　　其實幾日嚟一直冇出聲回應係有原因嘅，因為我深知祇要一出聲必定引來更多磚頭，今日果不其然，所以我承認我又衰多鑊，唔應該再去回應。廣東人內部虛耗喺啲無謂嘅爭詏自古已唔鮮見。而本人為粵語、粵文化做過嘅所有嘢全無私心，亦無所求且無悔，但願若干時期後，如果重有人記得到我為粵文化作過一分貢獻，噉就足夠嘞。

　　PS：Highyun嘅贈言好應景亦好符合我嘅哲學，照單收貨。協會一直能夠慘淡經營全靠三兩個從不言棄者嘅維繫（請睇上邊某仁兄之簽名檔又有此番感慨，要想成為優秀嘅會員談何容易）。
　　喺現有伺服器資源不足（廣東人內耗少啲、貢獻多啲會係噉？）情況下祇能暫厝此處安置此人家口中之「屠版物」，但遺人以「屠版」之口實，誠當遺憾。若新伺服器啓用可騰出其他版塊安置，未嘗可解決此紛爭（但世事難料，新嘅矛盾又會產生都唔定）之做法。
　　當然，話講返轉頭，我亦冇咁多精力長期去維護此「阻埞、厾眼厾鼻之物」，近半年嚟每日嘅起早貪黑摘錄「格仔文」幾近全職打工，而遭非支付人工但狀甚事頭者之繞舌，情何以堪？！或許喺某一日，我宣告「休帖」，偃旗息鼓，早死早着，屆時連畀人話你啲帖礙眼嘅機會都冇嘞，豈不痛快？！一樂也。

07-07-07

少年人洒脱地做人，继续行洒脱地做人……

芬1012

干脆改成“粵人文庫”啦，以免誤導咗人哋啊。

Wai

“粵語文庫”同“粵文”係乜呢。好多人都有自己嘅解釋。

意見實會聽，論壇啱啱起步，實有啲不足，諒解實要。

睇字面“粵語文庫”係同粵語有關嘅文章，廣東人寫嘅文章同粵語有關，都係粵語文化嘅一部份。

“粵文”係乜，可以話係用粵語行文嘅文章，又可以話係同粵語有關嘅嘢。

OK轉載嘅專欄文章，多數都係廣東人寫嘅，可以收錄喺粵語文庫。

余OK

　　查實我重有好多心裏話想講，因為鬱喺心入邊唔好受，所以縱然會引嚟磚頭掟我亦照直講。
　　我朝朝咁早起身第一件事係開機、上網、截圖摘錄專欄文、加水印、發帖，究竟係為乜？為咗公諸同好，為咗源源奉上新鮮滾熱辣嘅豆腐膶文章畀鍾意睇嘅版友。我寧願自己辛苦啲但可以惠及大眾，因為我始終堅信「施比受更有福」，我諗冇邊一個人會好似我咁傻喇啩？一直堅持咗成半年時間。希望人家體諒到我自己嘅一份熱忱同艱辛，好幾次Highyun當面問過我：你日日貼咁多，好辛苦個噃，頂唔頂得順?？我笑笑口答：冇乜嘢嘅，一日花啲時間啫，堅持得幾耐就幾耐囉。有唔少「擁躉」長期關注呢啲專欄文，係鼓勵我一直堅持嘅最大動力。
　　我並非唔接受人哋嘅反對聲音，而係接受反對得有道理嘅聲音，我亦能做到「己所不欲，勿施於人」，如果呢啲文有好多反對意見話唔值得睇嘅，我會第一時間折埋收皮。若然係洗版嘅話，使唔使日日都要洗，搏乜呢？！洗版係惡意之舉，撫心自問各位，每日update每張專欄帖都叫做惡意「屠版」？假使每日其他人發帖量足夠，呢啲專欄帖唔一定浮喺版內嘅首頁或靠前位置，我諗都唔會落得畀某啲浮雲遮眼者以洗版之口實，噉你鋪話法係咪要戒呢？
　　論壇資源有限，喺目前版塊設置眾口難調嘅情況下，最對口發呢啲專欄文亦祇能係呢個版，如果唔理解呢一點我亦冇嘢好講，祇係想講句：多啲運用邏輯思維睇問題會於人於己都好啲。新伺服器喺三幾個有心人士嘅資助下使用在即，會帶來新嘅資源分配方法定係又帶嚟新嘅矛盾呢，要拭目以待嘞。有時眞係出錢出力嘥時間嘥精力又要畀人出氣?，眞係唔到你唔寫個服字。

粵嚟粵掂

以下是引用芬1012在2007-8-12 12:36:46的發言：
呢度叫“粵語文庫”，點解唔見有粵語文嘅？

妳到底有冇睇過我嘅大作咖？我嗰啲咪純正兼標準嘅粵文嚟囉！