[原創]有一單監控工程，求合作

芬1012

我一直都話，我哋要互相關照嘅。呢次我接到一單監控工程，雖然唔係好大，但係都想關照返自己友，唔知有冇人有興趣？

另外，建議粵協組織大家認認真真開一次會，睇下可唔可以成立一間綜合股份制公司，集合所有人嘅力量同埋信息，壯大我哋嘅實力。大家都係同文同種、同聲同氣、有共同目標嘅，相信會合作得好好嘅。

卢总

监控工程以前做唔少，咩料？

如果今个月我搞聚会，你会唔会出嚟？

（呢张帖发错版，稍后将移过去闲情吹水版嗰边）

卢总

系统内部问题，回复唔到，现将回复内容发表于此：

======在 2007-8-6 13:14:23 您來信中寫道：======

我需要嘅係有資質嘅公司咖，你有冇辦法？

如果有聚會我一定到。

另外，可唔可以將“酷哥”改成“靚仔”或其它啊？

======================================
点先为之“有资质”先？同我合作关系嘅公司都系攞正牌嘅。

今个月打算再搞多次聚会，请你留意最新公告！

“酷哥”呢啲咁核突嘅字眼我晨早就插过。不过眼下正更换服务器同升级系统，睇过改完之后点先再讲啦。多谢你嘅意见！

芬1012

呢間係正規嘅大公司，先后會有兩單工程嘅，而家係第一單。

由于係正規公司，所以人家要求有安防施工證書，當然重要合同、發票之類嘅嘢。

材料要求係原裝Sony或者三星攝像機。

cantonian

阿芬嘅提议好好, 我地应该有自己嘅经济实体, 积蓄力量, 等待时机....

芬1012

可能有人會話，就算兩兄弟合作都會反面啦。正因為只有兩兄弟，所以好容易反面，如果係十兄弟、二十兄弟、三十……一百兄弟，反而唔容易反面。因為要兩個人反面，只需要兩個人嘅力量，而且只要一個人離開，就玩完。而要一百個人反面，就要一百個人都想反面至得。

美國啲前人可以一齊搞個國家出嚟，我哋就搞個公司、搞個社區出嚟。

點解美國人做得到？因為佢哋喺上岸之前就已經做好一份詳盡嘅、民主嘅協議，每個人都必須以此為準。而且當時佢哋都面對共同嘅問題、相同嘅利益，同我哋而家嘅境遇好相似。

況且，我哋都需要一個一落腳點，只要有咗呢個落腳點，我哋要碰頭，就好似返屋企咁簡單、咁自然。而唔係好似而家噉流落街頭。

可能有人會話：唓，如果我揾到生意，我自己都揾到人做啦。冇錯，你或者可以揾朋友做，但係你啲朋友并唔一定支持你而家所做嘅事嘅。亦即係話，你同你朋友做完某單嘢之后，你依然係一個人。

我已經有一啲構思，譬如：資金、決策、經營、人力、做事、利益等等，希望9月9號見面嘅時候有機會同大家商討。

 

補充一下，上述工程而家我重hold住嘅，跟住落嚟重會有幾單，都比較大，但係我冇能力做，又唔想讓畀外人。

所有嘢都要實力，都要爭取。

卢总

睇嚟，你都有睇《大国崛起》！

芬1012

《大国崛起》？聽過呢個名，不過冇睇過。

細細個就聽香港臺，后嚟上網，再加上自己思考，頭頭尾尾都二十年啰。

cantonian

好贊同阿芬嘅意見. 我哋心目中有個遠大嘅目標, 心照不宣, 從一個細嘅經濟實體開始, 逐漸發展....一切皆有可能.....

护粤人士

阿芬嘅idea好好. 有咗經濟實力, 我哋就可以辦粵語學校、粵語傳媒、推動粵語流行文化. 粵語學校同粵語傳媒又可以帶來利潤, 咁越滾越大......

芬1012

有冇人有打印機咖？

芬1012

原帖由 cantonian 於 2007-9-8 03:58 發表 好贊同阿芬嘅意見. 我哋心目中有個遠大嘅目標, 心照不宣, 從一個細嘅經濟實體開始, 逐漸發展....一切皆有可能.....

冇錯。

如果成事嘅話，嗰啲十日都唔上嚟一次嘅網友就會日日都上嚟，睇下公司有乜嘢新發展。

失業嘅網友可以上嚟睇下公司有冇乜嘢可以幫手。

我哋會為自己嘅事業、自己嘅歸宿東奔西走，幾辛苦都覺得開心，因為我哋知道自己做緊乜嘢。

以后我哋可能相約去睇廠房，睇設備，一齊開會。

所有已經心灰意冷嘅朋友都會返嚟我哋身邊。

喺網上，我哋會為每一個項目成功完成互相祝賀，一齊歡呼，分享每一個項目執行過程嘅甜酸苦辣。

感覺就好似，一班同胞兄弟姊妹一齊建造自己嘅家園。

余OK

　　早有此想法好耐，單靠一腔熱情搞網站論壇，冇一個實體存在，粵協永遠冇大發展。若能成事，善莫大焉，搵個機會出嚟好好詳談。

芬1012

好啊。

認為有冇必要搞一個經濟實體呢？大家不妨先表一表態啦，至于點樣搞，大家坐落嚟詳細傾下啦。

[ 本帖最後由 芬1012 於 2007-9-12 22:33 編輯 ]

外外星人

移去供求版啦！