「傍」晚個「傍」點讀？

李四

講左幾十年都係講成「旁」晚，但係香港電台讀成「磅」晚，應該點讀至係呢？

auyeung

今晚嘅新聞讀“磅”晚？抑或係其他？

JUMPSEY

我習慣讀“旁”晚。查《康熙字典》嘅結果係“旁”“磅”兩讀都可以：

【唐韻】步光切【集韻】【韻會】蒲光切。??通旁。【說文】近也。【廣韻】側也。又【廣韻】【集韻】【韻會】【正韻】??蒲浪切，音??。【正韻】倚也。【集韻】亦近也。或作並?

其中嘅“蒲光切”即係“旁”音，係“近旁、側邊”嘅意思。“蒲浪切”即係“磅”音，除咗有“倚靠”嘅意思之外，亦有“挨近”嘅意思。睇嚟“傍晚”係兩個音都可以，但係我習慣讀“旁”晚，“倚傍”就習慣讀“磅”。

[此帖子已經被作者於2007-8-5 11:01:57編輯過]

highyun

“磅晚”又係何博士“推廣”出嚟嘅所謂正音。

歐陽博士名言：“去港臺見工講‘磅晚’，去商臺見工講‘旁晚’”。

卢总

噉去新城、无线、亚视、有线同“捞”台见工又咩晚啊？

廣州人喺圖盧茲

我都係鍾意用「俟晚」多啲!!

Wai

“挨晚”“傍（旁）晚”

JUMPSEY

我都係講挨晚(aai1maan1)，傍晚(pong4maan2)只係要嚟「讀」嘅。

馬萬千

「近傍」「傍住你」「依山傍水」等等詞語都證明咗「傍」理論上係讀磅~

本來應該讀磅, 不過讀成 旁晚 都好耐歷史, 成為咗約定俗定

 

[此帖子已經被作者於2007-8-4 0:06:10編輯過]

JUMPSEY

「傍」喺廣州話中有兩個常用嘅音應該冇乜分歧，喺有啲詞當中一般係讀(旁) ，比如「傍晚」；有啲詞就多數讀(磅)，比如「近傍」「傍住你」「依山傍水」；有啲詞重可能兩個音可以任讀，比如「傍身」。

由常用詞嘅數量嚟講，似乎讀「磅」嘅詞比較多，但係以此就話「傍」本應讀(磅)，(旁)係後嚟習非成是、約定俗成嘅話，就有啲武斷喇。由我喺《康熙字典》查到嘅結果嚟睇，「傍」嘅去聲讀法（磅）只出現喺宋代以後成書嘅韻書當中，而平聲讀法（旁）則可以追溯到東漢嘅《說文解字》，似乎“傍”讀（旁）嘅歷史更為悠久一啲。

白色情人魚

樓上好PRO噃~