|
加、加、加！又加價！——G肉佬（2007年5月23日）
市場呢度嘅豬肉檔唔止我一檔，但呢兩日都講緊同一個話題：豬肉加價！今日嚟我度幫襯嘅師奶唔止一隻，但都會講同一式嘅話：再加價就唔鬼幫襯你！有啲講完重搣人，哎呀，痛嘎！
記得上年年底就已經試過一次豬肉大加價，啲新聞重話咩七年以來最高啊噉。嗰次嗰個噉嘅李大嬸重幾乎要用詠春拳嚟對付我，話我食水咁深，該打噉話……冤枉啊！加價都唔係我定嘅，加得價，就梗係攞貨價高咗先加啦！如果我可以亂咁加，街坊們肯過我，工商都唔肯過我啦！
廣州早就沒人養豬嘎喇，家陣我哋食緊嘅九成以上都係外省豬，今次加價都係因為外省毛豬嘅貨源少咗之嘛！沒嘢嘎，貴咪食第樣囉！我又沒逼你買我嘅豬肉，而且呢排雨水多，菜都加價啦！使乜大驚少怪啫！
查實五一過後豬肉價就開始有些微變動，呢兩日稍微犀利啲啫，報紙同新聞就猛咁講，驚死我哋有金執噉。大部分市場嘅瘦肉同排骨平均都加咗兩三蚊左右，老實講十幾蚊斤瘦肉係貴咗啲。不過鬼叫你要食人啲外省豬咩！睇來我去搞返個養豬場都有得諗喔！
話時話，今日賣魚彪啲生意好似唔錯。哎，啲師奶真係識計數。沒計啦，呢幾日唯有入少啲貨，費事賣唔晒！
[ 本帖最後由 gboss 於 2008-11-13 15:12 編輯 ] | 
發表於 2007-7-27 22:35:41
