|
重記唔記得嗰個萬寶路嘅經典廣告呢？——G肉佬（2007年5月21日）
放眼望過去，喺一條廣闊嘅馬路上面，有啲嘢揚起咗好多沙塵……係咩呢？係豬！一群跑得好快嘅豬！只見豬群裏面有一隻零舍膘壯嘅黑豬，有個好英偉嘅靚仔攞住個繩圈騎喺上面，好明顯，我就係嗰個人！呢個時候，音樂響起，路人甲出嚟旁述：「呢個，係～豬肉佬～嘅～世界！」
但因為塵實在太大，我個鼻好唔舒服……哈啾！就噉醒咗。哇，乜原嚟成7點嘎嗱！於是嗱嗱聲刷牙洗面就跑去檔口……
呢排都唔知做乜鬼嘢，成尻日發埋晒啲好騎呢嘅夢，頭先講呢個都可謂經典喇！情景好似N年前嘅萬寶路廣告，但唔知點解會發個噉嘅夢呢？我都唔食煙嘅！係咪好乖仔呢（其實係因為鼻敏感）？
諗起上嚟，可能呢排成日同啲兄弟出去劈酒，兼且又租咗好多碟返屋企煲，基本上都沒點休息好，所以先至發埋晒啲咁怪雞嘅夢啩！重搞到沒咩時間寫日記……弊！又生咗幾粒暗瘡添。睇嚟今日黃振龍又有生意喇！
「喂，今晚再去劈過囉！」蝦佬走過來嘍我。
「唔喇，琴晚飲咁多，今朝幾乎唔知醒，都係返屋企煲碟好過！」
「又煲鹹碟吖？」
「錯，係後現代主義情色輕喜劇！」
不過諗落今晚都係早啲瞓好啲喇，唔係今晚又唔知會發啲咩夢！
[ 本帖最後由 gboss 於 2008-11-13 15:35 編輯 ] | 
發表於 2007-7-27 22:34:20