《撥亂反正》之十六：去 Vs 上

highyun

　　“上”讀soeng5音時，爲動詞，表示往一個比當前更高地方，如“上山”、“上樓”、“上車”等，此外，“上”亦可以表示往地位比較高或尊貴嘅地方，如“上朝”、“上訪”……無奈，有啲廣東人唔知從幾時開始，跟埋人哋講“上厠所”、“上朋友屋企”……莫非厠所更尊貴？莫非你朋友實住得高過你？
　　“去”就係go，go to toilet就係“去厠所”，“go to a friend's home”就係去朋友屋企，粵語同英文一樣，冇必要講成go up/on to toilet。
以前香港有句話好流行，“行路上廣州”，點解呢度係“上”唔係“去”呢？因爲地理“上北下南”嘅關係，對於港人嚟講，羅湖橋以北嘅一律稱爲“上邊”，通常港人返大陸都會講“返上去上邊”。
　　順帶區分兩個詞：“上街”同“去街”。官話裏面，只有“上街”，而粵語裏面，兩詞意義唔同，“去街”即係“出去外面”，可以出去食飯、行街、睇戲……而“上街”，通常同“示威遊行”有關，各位和諧公民都係少做爲妙。

卢总

港人系因为地理纬度高低而称罗湖桥以北为“上边”，而非“上北下南”嘅关系－－事关喺港人笃信嘅风水学里面，“北”系在“下”嘅。

余OK

以下是引用卢总在2007-7-7 21:54:27的發言：
港人系因为地理纬度高低而称罗湖桥以北为“上边”，而非“上北下南”嘅关系－－事关喺港人笃信嘅风水学里面，“北”系在“下”嘅。

　　噉都得？不過去香港就肯定係「落」香港，而唔係「上」香港，呢個我信緯度界定多啲噃。但有時廣東人民眾有時都分唔清「上」定「落」某個地方。

HUIHUIKAKA

喺我鄉下廉江嗰度我理解就係：“上”就代表從細嘅地方去大嘅地方，而“下”就啱好相反，好似去“湛江”，“廣州”，“東莞”噉樣，我哋都係話“上”嘅，唔知重冇第度係噉樣理解嘅呢。如果分南北嘅話，我鄉下嗰度都差唔多算最南架喇，如果去香港嘅話，係咪應該話“上”呢