《撥亂反正》之四：老細 vs 老闆

auyeung

對於生活喺粵語區嘅人嚟講，老細一詞相信都聽唔少。行喺街上邊，賣嘢嘅人爭相招徠“老細，埋嚟睇吓喇，好平好抵架！”。又或者闔家出外就餐埋單嗰時，侍應揸張單過嚟話，老細，多謝幾多幾多錢。以上情況都能夠聽到老細一詞，但係請注意，呢度所講嘅老細并唔係真正意義上嘅老細，即唔係咩大公司揸fit人，又或者高官，而係對對方嘅敬稱！聽嗰個人聽咗，就算佢唔係真嘅老細，但亦有一種滿足感，自然願意幫襯佢喇！

不過唔知從幾時開始，老細一詞逐漸減少，取而代之嘅係老闆。老闆老闆，外江佬口中嘅老細，漸漸喺粵語區風行。甚至連電視都跟風，用嘅係老闆。但係呢層可以理解，電視只係為咗對白嘅連貫性採用老闆，而非真正意義上進行推普機工作。

所以，從今日開始，見人就叫佢一聲：“老細。。。。。。。。”！

注：可能會有人話“細”應該用“世”，我用慣細所以用細！

[此帖子已經被馬萬千於2007-6-28 0:15:08編輯過]

highyun

歡迎加入“撥亂反正”，不過改返好個標題先啦。

auyeung

寫完先醒返起，梳你梳你。

即刻改返佢！！

卢总

好心你啦！话明拨乱反正，嗰个“老细”嘅“细”你自己本身都系错嘅，重讲咩“拨乱反正”先得嘎？！

你讲“老细”都一样系错嘅！应该系“老世”先啱！
日语“世带主”系指戶主。香港沦陷之后，日军查户籍，翻译就会喺门口大嗌：“世带主出嚟”——即系叫户主出嚟。后来将“世带主”简称、加个老字，成为“老世”。战后，“老世”嘅叫法就保留落嚟，作为对老板嘅俗称。

http://club.colabug.net/lofiversion/index.php?t361963.html

“老闆”嘅“闆”系“板”字嘅繁体。

“老闆”一词古已有之，根本就唔系取代“老世”嘅用语，搞清楚历史先“拨乱反正”啦！

余OK

　　標題有誤導他人使用錯字之嫌，樓主若果呢一兩日重唔改返好，惟有等在下代勞喇。

余OK

　　Boss重有舊式啲嘅講法係「事頭」，老闆娘就叫「事頭婆」。

卢总

以下是引用余OK在2007-6-28 20:47:37的發言：
　　標題有誤導他人使用錯字之嫌，樓主若果呢一兩日重唔改返好，惟有等在下代勞喇。

举埋脚支持！辛苦你喇！

auyeung

以下是引用余OK在2007-6-28 20:50:22的發言：
　　Boss重有舊式啲嘅講法係「事頭」，老闆娘就叫「事頭婆」。

既然OK你講埋出嚟咯，噉就由你寫喇。

本身諗住下一篇就係講“娘”。講講波士嘅老婆點稱呼，皆因今人都興老闆娘，毋望口中出事頭。。