G肉佬之日常：Meeting

gboss

　　講嘢做乜要噴口水呢？——G肉佬（2007年4月29日）

　　呢排廣州市話要創建咩衛生城市喔！哎，創乜鬼啊！滿城盡帶死乞兒，個個喺天橋底屙篤屎，都冇乜機會啦！

　　就因為要咩創衛，市場管理處啲賤人三頭兩日就會去市場抓人開會，話咩注意市場衛生喔！噉開一次會就阻我半日時間，做少好多生意咖嘛！今日又好唔好彩，又抽咗幾個人代表市場上去開會。我作為一個咁優秀嘅豬肉佬，梗係走唔甩雞喇！

　　上到去管理處個小會議室，等咗一陣，主持會議嘅古主任行咗入嚟喇，條友依舊咁樣衰！古主任喺呢一區除咗出名樣衰同鹹濕之外，酒量都係出名勁！管理處裏面後生嘅女職員都冇個做得長，就因為佢條友成日借住幾分酒意就抽人水，重成日喺辦公室部電腦度睇鹹網，所以辦公室嘅女性就走淨啲成面老人斑嘅阿姨。

　　至於佢開會嘅風格都係一絕，本嚟會議內容好少嘢，無非都係有啲咩部門嚟市場檢查、幾時檢查、注意啲乜噉。不過條仆街次次都揾人寫篇好長嘅會議演講稿，然後就不停噉讀，口水不停噉噴，噴啊噴、噴啊噴……每次睇佢差唔多讀完，條友又慢條斯理翻下一頁再讀，明明好薄幾頁紙，讀成世都讀唔完。會議台靠近佢嘅幾個位都係空住嘅，啲人怕晒佢啲口水，都有咁遠離佢咁遠！佢嘅口水噴到咁上下，你就梗以為佢會收聲透吓，你錯喇！呢個時候會有人行埋嚟幫佢斟返滿杯茶（我好想一刀飛死斟茶嗰條友），佢補充「彈藥」之後，噴得重勁！

　　通常佢喺上面噴口水，我哋就喺下面「噴蚊」（瞌眼瞓），當休息吓囉。等個會開完，一定會有人入嚟抹台，特別佢坐嘅位置會有勁多水珠，佢份講稿就肯定顦晒啦，呢啲人咪傳說中嘅「口水多過茶」囉！ 

[ 本帖最後由 gboss 於 2008-11-13 15:53 編輯 ]