|
禁摩之後啲的士佬真係生意唔憂做。——G肉佬 （2007年3月25日）
朋友急Call，麻雀台三缺一，咁嚴重嘅問題一定要揾我解決噉話喔！都好，橫掂班老死好耐冇聚舊喇，順便可以過下手癮，快哉！
一睇個鐘，四點多啲，提早收檔，放低條圍裙就走人！但諗諗下，去佢度冇咩車啱添，地鐵又到喉唔到肺，冇計，唯有截的啦！點知一出大馬路，揾部空車都冇。頂你個肺，係咪好生意成噉吖？又唔見有咁多人買豬肉喔！電話又響了，好明顯啲死人頭輸唔切啦。哎，平時唔打的嘅時候都好多空車咖嘛，依家揾部都冇，有冇搞～錯！
過咗一陣，卒之畀我截到部，雖然部車舊到有啲樣衰，但開得喐就算了。一上車，個司機重要係「外江佬」，好在佢聽得明我啲唔鹹唔淡嘅「煲冬瓜」啫。
禁摩之後話就話治安好咗，但對於我啲講效率嘅人，都係冇咁方便。你知啦，廣州啲交通燈多到離曬譜，正一「三步一崗，五步一哨」；交警成日唔喺路面，而係去曬啲茶莊歇腳；又多人買私家車；啲公車又多又咗埞……一句講曬，車速慢到老鼠都撞唔死！
好艱難先到咗朋友屋企，閒話休提，四方城內論英雄！幾圈過後，個個都屈服喺我嘅「淫威」之下，一家嬴三家確係爽吖吓。不過賭場得意，必定情場失意。兮，睇嚟今年又媾唔到女喇！
夜啦，聽日重要開檔，又要打的先返到屋企，真係贏埋都唔夠畀的士錢，的士佬重要好生意到費事同你講價。廿蚊返到去，就算打個九折都係十八蚊，加埋燃油附加費先係平嗰一文！叼那星！
[ 本帖最後由 gboss 於 2008-11-14 10:34 編輯 ] | 
發表於 2007-6-8 22:36:44