|
雜志中以一問一答、圖文并茂嘅形式陳述,“S”代表阿Sam,而“H”就代表《香港猛鬼集》雜志之首席記
者“喜多郎”先生。
H：阿Sam，你行走江湖咁多年，相信亦曾經遇見過一啲“鬼鬼怪怪”嘅事情，可以同廣大讀者講講？
S：我確實曾經遇到過，而且聽其他人講過嘅亦都唔少，但我係個天主教徒，本來係唔會相信有“鬼”呢
樣嘢嘅存在。不過我一直以來就確信，如果一個人做咗錯事，就必然有邪魔附於其身體之內；此外，我會
相信呢個世界上的確有靈魂嘅存在。
H：噉你曾經遇到嘅呢類怪事又係點嘅呢？
S：記得好多年以前，外出拍電影，我哋一行人入住當地一間酒店，所有嘅工作人員每人獲安排各住一個
房間。某晚深夜，正當各人熟睡之際，突然卻聽到有人高聲叫喊，仲見到四周有好多煙霧添。我當即就被
驚醒咗，開頭仲以為係發生火燭，於是第一時間沖出房間，睇睇究竟發生咗乜嘢事。我行出走廊，果然見
到煙霧彌漫。當時，同住喺酒店嘅其他工作人員及住客都跑咗出各自嘅房間嘞，你估佢哋嘅第一個反應係
點？
H：有煙就必然有火，我諗大家肯定係立即到處搵火源，睇下有冇辦法盡快撲救啦，我講得啱唔啱先？
S：哈哈，真醒目，噉都畀你諗到！大家四圍咁搵啲煙霧嘅來源，搵啊搵，終於發現，原來啲煙正係從走
廊盡頭嗰間房散發出嚟嘅！
H：哦？！
S：於是我哋走過去大力拍門，睇下有冇人應，如果冇人應門嘅話，大家就打算撞門入去。點知拍咗幾下
門啫，裏面就有個男人開門，睇佢個樣，瞓到睡眼惺鬆，仲愕咗然噉問我哋做乜拍佢門，正當我哋想問佢
屋內係咪發生火燭時，怪事就出現嘞。
H：噉你哋係咪見到有幾條恐龍正喺度噴火？又或者見到有啲半人半獸嘅怪物喺度食緊嘢啊？
S：傻嘅！唔單止唔見到有火啦，就連走廊上嗰啲煙霧都突然消失得無影無蹤，直頭好似幻海奇情噉款！
之後我哋查咗好耐，依然毫無頭緒，直到現在都仍然係一個謎啊。
H：確實又幾令人費解啵！噉除咗呢件事之外，你仲有乜嘢古怪兼恐怖嘅遭遇？
S：有啊，仲有一件怪事添！你知道啦，我係第一個喺紅館開Show嘅香港歌手，而當時（1983年）呢件怪
事就發生喺其中一晚嘅演唱會上......
H：哦？
S：你知啦，企喺臺上面演唱嘅人，要比幾百支水銀燈射住，臺下嘅觀眾睇我就當然睇得清楚，但我就因
為被強光射住對眼，無法睇到觀眾嘅樣。想知道佢哋嘅反應熱烈程度，就惟有依賴掌聲多寡嚟判斷。有一
晚，我正企喺臺上演唱，忽然發現咗一件怪事。我發覺喺漆黑一片嘅觀眾席上，竟然比我見到有一個女歌
迷，我都話咗啦，我喺臺上面唱歌，本來係睇唔到臺下嘅觀眾嘅，但真係奇怪嘞，呢個女仔，我就零零舍
舍只係見到佢一個，就算坐喺佢前後左右嗰啲歌迷，都因為臺下太黑，我只能見到佢哋個影啫。
H：會唔會係燈光師見到嗰個女仔個樣生得省鏡，專門打支燈過去比你睇佢，醒一下你啊？
S：當初我都以為係燈光師有意將燈光打埋去嘅，但都冇理由專門用燈光照足佢全場啩？而且覺得啲光都
唔似係打燈，直情就好似......係個女仔自己身上發出嚟嘅!
H：有冇咁勁啊？噉坐喺個女仔旁邊嗰啲人，如果亦見到如此情形，仲唔一早就被嚇死咩？我唔信！
S：我都有噉諗過啊，所以我趁間場換衫之際，問咗好幾位工作人員，問佢哋有冇見到呢個女仔，佢哋都
異口同聲噉答：“冇見到”。夠恐怖啩？我開始有啲心驚嘞，但跟住就依然要走出臺繼續唱歌，而嗰個女
仔，仲依然坐喺度。我當時諗，因為只係我一個人見到呢個女仔，所以坐喺個女仔旁邊嗰啲人咪唔識得驚
囉！直至唱完，我立即返入到後臺，當聽到歌迷大嗌“Encore”，我又走出臺上之時，嗰個女仔卻已經消
失得無影無蹤。當晚演唱會完畢之後，有工作人員告知我，佢話剛才佢曾經專門到該座位睇過，發覺該座
位係空置，佢又專門查詢過票務部，原來嗰一堆180元票價嘅座位，全都滿晒，惟獨只有嗰一個座位嘅票
冇人買！因此，事件就更加顯得撲朔迷離嘞！
H：噉後來你仲有冇再次見到過呢個女仔呢？
S：冇啊，我後來就一直都冇再次見過佢嘞。到底呢個女仔係人抑或係鬼？究竟件事係點嘅呢？---我都無
從解釋！
H：阿Sam嘅奇怪遭遇，的確係非常之不可思議！
請注意：該文帖所包含之圖片與文字內容，版權歸粵語協會論壇所有；未經同意，請勿隨意於其他網站上轉載.
[此帖子已經被作者於2007-6-3 2:47:55編輯過]
| 
發表於 2007-6-3 09:14:29
發表於 2007-6-3 09:17:50
發表於 2007-6-3 18:31:27
發表於 2007-6-4 05:41:10