[原創]G肉佬之日常：Sweetness

gboss

　　你知道點先為之嗒糖嗎？——G肉佬（2007年2月7日）

　　「喂，老細，整個龜苓糕嚟吖！再嚟兩個綠豆沙同一個西米露添！」

　　重記得上兩個星期同市場班人打鋤大D，我輸左請食糖水，一坐落糖水鋪我就大大聲，好似有得食就乜都沒所謂咁，我哋通常將去食糖水簡稱「嗒糖」嘅（當然知道你哋仲有其他意思啦）。

　　一日都係街市做野好悶嘅，沒生意嗰陣，我就左手拿住支鋼（形狀有啲似七寸長釘），右手拿住豬肉刀係咁磨。如果有人提議打牌，就老規矩，輸咗請我哋去「嗒糖」。

　　但今日再想去都冇行囉！市場附近嗰間糖水鋪唔知點解執咗。講起上嚟呢一兩年都好少人幫襯，我地一個月都係嚟兩三次已經算常客嘞，不過我地又沒理由唔做生意成日走過去咖。

　　家陣啲後生仔都鍾意去埋曬啲什麽M記吖、K記吖噉，搞到啲糖水鋪、冰室、甜品店少左好多生意。又係嘅，有空調歎唔使食到成身汗（尤其係夏天），但係昔日老廣州嗰啲出名嘅甜品店好似一下子淡出歷史舞臺噉，尤其係冰室，真係買少見少。

　　仲記得細個嗰陣成日扭屋企人帶我去食糖水、食冰，我又甯舍鍾意食甜嘢，搞到成口煙屎牙，影相都仲要特登丫大個口（好在大個咗出啲牙都幾靚啫），衣家諗返都幾好笑。

　　糖水鋪、冰室、甜品店，記載住我哋幾代廣州人嘅集體回憶，但係當呢啲店鋪一間間咁離開我哋，除咗無奈，重可以做咩呢！

 

[ 本帖最後由 gboss 於 2008-11-13 16:42 編輯 ]