[原創]G肉佬之日常：Misunderstand

gboss

　　如果唔係世人鍾意自作聰明，就係我太蠢了。——G肉佬

　　今日嘅豬肉都係10蚊斤，豬肉臺上除咗豬肉重有豬雜，腰包裏面嘅散紙都係嚴重缺乏，但係唔找散紙會畀啲師奶鬧一餐，重要好毒嗰隻。

　　以前賣豬肉，都會同啲師奶吹下水，等佢地畀錢畀得爽啲，有時重有貼士收。好衰唔衰隔離街阿陳師奶以為我想溝佢，我衹係講咗句：「你個樣好後生噃」，佢就回敬我一句：「你冇機會了」，重叫佢未婚夫來找我晦氣。之後我都唔賣豬肉畀佢，條冚家祥重周街唱，搞到好長一段時間都係啲阿伯來買豬肉。所以之後每聽到「你冇機會了」呢句話我都會打冷振。好在後來啲好心嘅街坊幫我澄清，呢個係個誤會，生意先好返啲。

　　人哋話我鹹濕，我認咖，但我個人都好有原則，唔係見親女人就會起痰嗰隻。有啲真係一睇到就咩欲望都沒曬，簡直好似食咗過期偉哥噉。最斃嗰啲人自己唔知，有時直頭想打鑊佢。

　　誤會幾時都會發生，但有啲係自作聰明引起嘅，又或者係我太蠢啦，成日搞到人誤會，人嘅心理真係奇怪，就連弗洛依德都幫我唔到。

　　「喂，豬肉佬！啲豬肉點賣啊？」

　　「10文斤啊，靚姐！」我要做生意啦，唔想個銀包「幹硬化」，聽日先講啦！

(編者注：G肉佬之日常係本人原創嘅一系列故事，已經喺其他論壇發過，反映唔錯，特意與大家分享。)

 

[ 本帖最後由 gboss 於 2008-11-13 15:23 編輯 ]

huang

唔错?? 不过有不足嘅地方係?? 有啲字词用得唔係好精准。??

卢总

如果唔係世人钟意自作聰明，就係我太蠢嘞。——G肉佬

今日嘅豬肉都係10蚊斤，豬肉臺上除咗豬肉重有豬红。腰袋裏面嘅散紙都係嚴重缺乏，但係唔找散紙會畀啲師奶鬧一餐，重要好毒嗰只。

以前賣豬肉，都會同啲師奶吹下水，等佢地畀錢畀得爽啲，有時重有貼士收。好衰唔衰隔篱街阿陳師奶以為我想媾佢，我只係講咗句：「你個樣好後生噃」，佢就回敬我一句：「你冇機會喇」，重叫佢未婚夫嚟找我晦氣。之後我都唔賣豬肉畀佢，條冚家祥重周街唱，搞到好長一段時間都係啲阿伯嚟買豬肉。所以之後每聽到「你冇機會喇」呢句話我都會打冷震。好在後來啲好心嘅街坊幫我澄清，呢個係個誤會，生意先好返啲。

人哋話我鹹濕，我認咖，但我個人都好有原則，唔係見親女人就會起痰嗰只。有啲真係一睇到就咩欲望都冇曬，簡直好似食咗過期偉哥噉。最弊嗰啲人自己唔知，有時直頭想打鑊佢。

誤會幾時都會發生，但有啲係自作聰明引起嘅，又或者係我太蠢啦，成日搞到人誤會，人嘅心理真係奇怪，就連弗洛依德都幫我唔到。

「喂，豬肉佬！啲豬肉點賣啊？」

「10蚊斤啊，靚姐！」我要做生意喇，唔想個銀包「干硬化」，聽日先講啦！

gboss

QUOTE:

以下是引用huang在2007-5-10 22:50:47的發言：
唔错 不过有不足嘅地方係 有啲字词用得唔係好精准。

多谢你嘅意见，但我想更口语化，有啲句子甚至没讲究语法！

gboss

「豬肉臺上除咗豬肉重有豬红」呢處卢总誤會喇，賣豬肉嘅一般唔賣豬紅，因為新鮮豬肉都有啲豬血黐住嘅，所以應該係豬血。

 

後嚟諗吓改成豬雜可能會好啲，冇咁容易誤會成「豬紅」

[ 本帖最後由 gboss 於 2008-11-13 15:26 編輯 ]

smallcat2006

支持G肉佬

羊城惜花人

我想去你博客直接睇~

大陆灿

一个稀嘘嘅豬肉佬。