|
凌晨时分，从咖啡沙龙嘅聚会返到嚟“寂寞的心有聊／撩俱乐部”，同粤语协会班人讨论咗一下有关杂志嘅问题，又安抚咗一个经常凌晨时分帮趁“寂寞的心有聊／撩俱乐部”嘅人，我就返归睇电视——因为我知道翡翠台有《风尘三侠》做。 《风尘三侠》系我比较钟意嘅电影之一。  程仁（梁家辉饰）、陈大文（梁朝伟饰）、同毛周朱（郑丹瑞饰）合称“风尘三侠”，共同住喺香港市区嘅一间唐楼里面。程仁放浪不羁，女友多不胜数，但基本上都系有性冇爱，唯一感情同关系都比较好嘅就只有相识六年嘅惠芳（袁咏仪饰）——而实际上，惠芳只系佢解决生理需要嘅工具。陈大文性格内向，有个拍咗拖十年但极之势利嘅女友Ｊｏｙｃｅ（刘锦玲饰），将于三个月后结婚。毛周朱就胆小怕事，唔敢识女仔，所以一直都冇女朋友。 一日，陈大文嘅妹妹珠珠（朱茵饰）从美国返嚟，住入呢个三口之家，一时间搞到程仁心猿意马。陈大文认识咗任职夜总会公关嘅阿Ｃａｔ（柏安妮饰），但系又慑于Ｊｏｙｃｅ嘅雌威，唯有一脚踏两船。毛周朱喺介绍所嘅安排下，认识咗失婚嘅Ｍｉｃｈｅｌｌｅ（周文健饰），两人甚为投契，后来毛周朱先发觉佢原来系个同性恋者。 惠芳因为忍受唔到程仁嘅风流成性，终于把心一横，决定嫁去美国。喺中秋节晚上，正系陈大文准备结婚前嘅一个礼拜，惠芳向程仁提出咗分手，程仁喺极失意之下强吻咗一直心仪自己嘅珠珠，陈大文见到，遂与之大打出手，并且离家出走，去咗阿Ｃａｔ屋企逃避，到结婚当日先返屋企。毛周朱好认真噉学习佢一直以为系英文嘅法文，因而结识咗酷似周慧敏嘅Ｆｒａｎｃｉｓ（周慧敏），并得到Ｆｒａｎｃｉｓ嘅青睐。 珠珠见程仁心情惆怅，遂开解之，使其明白心中真正爱嘅系惠芳，于是赶去惠芳屋企，希望可以挽回呢段感情，点知最后都系缘悭一面。程仁睇完惠芳留畀佢嘅信之后，终于明白爱情系点样一回事。于是就赶去教堂点醒陈大文，解除婚约而选择同阿Ｃａｔ一齐。毛周朱则爆冷抱得美人归，娶到貌美如花嘅Ｆｒａｎｃｉｓ。 真系令人慨叹人生如此奇妙，如此出人意表！ 我最喜欢惠芳向程仁提出分手前，敬告珠珠嘅一段说话：佢有好多缺点，如果你包容唔到佢呢啲缺点嘅，就唔好畀呢段感情发生——真系道出咗爱情嘅真义！ 面对呢个人欲横流嘅社会，无论系对金钱、权力嘅渴求，抑或系对肉体上欢愉嘅追求……都充斥喺我哋嘅身边，我哋又点能够唔睇下呢部《风尘三侠》呢？ 虽然系１９９３年嘅作品，但人类对肉体、情感嘅追逐，又何曾停止过，改变过呢？ 再过几日就到情人节嘞，有啲嘢系唔系应该由得佢发生，各位自己思考！个人十分钟意《风尘三侠》里面嗰首《ＪａＪｕｍＢｏ》——堪称改编歌曲嘅经典，完全表达到部戏嘅主题同好多人嘅心声，我去亲卡拉ＯＫ都钟意揾呢只歌。 | 
發表於 2007-2-25 22:36:08
發表於 2007-2-25 22:52:58
發表於 2007-2-26 00:19:30