|
重有一个礼拜，一年一度嘅西方情人节就到嘞，为咗贯彻“寂寞的心有聊／撩俱乐部”助人自助嘅宗旨，
现特决定将卢总本人于当日出租，为大家提供优质嘅舒心服务。 出租分两种，一种系面向女士，另外一种系面向男士，各有不同，请各位小心阅读细则。 面向女士嘅，又分为有拖拍同冇拖拍两种——有拖拍部分包括已婚人士。 有拖拍女士，包括已婚女士，想侦查对方当日有冇越轨行为嘅请提前两至三日预约面谈。收费系每个钟头
１００蚊起，最低消费３个钟头，期间一切交通、饮食、娱乐场所消费实报实销。因为若果你哋之间的确存在
有第三者，情人节前后系最容易发现嘅，为免将来后悔，都系早啲揭穿为好。唔信嘅可以参阅一下我几年前嘅
《令四个人终生难忘嘅情人节》。必须于行动之前支付不少于２／３嘅基本费用。 冇拖拍嘅女士可以考虑以下各种服务，但有先决条件，限３０岁以下女性（以下价格均按每个钟头计费，
并以人民币结算，超时唔够半个钟头嘅按半个钟头收，超过半个钟唔够一个钟嘅按一个钟头收），３０岁以上
女性可以酌情处理，但费用起码上浮３０％： 陪 倾 偈：３８／ｈ ３个钟以上（唔包括３个钟）按３０／ｈ计，期间饮品由女方提供，倾谈嘅内容
唔包括排八字、睇掌相、上门摆阵睇风水——呢啲要另外收费。 陪 行 街：４８／ｈ ３个钟以上（唔包括３个钟）按３８／ｈ计，期间可以帮女方讲价、提货、畀钱
（但事前女方要先畀钱笮袋），每个钟头至少要有５分钟休息时间。 陪 食 饭：１６／ｈ ２个钟以上（唔包括２个钟）按１２／ｈ计，本人唔食辣，不嗜肉，唔识饮酒，
盒仔饭亦可，餐费由雇主支付，如须由本人埋单嘅，请提早畀定钱。 陪 睇 戏：２０／ｈ 睇３场送一场，包括演唱会，当日有效。绝对唔睇用普通话配音嘅港产片、卢总
所厌恶嘅人参与演出嘅表演，戏票或者演唱会门菲由雇主搞掂，期间零食、饮料
等杂项均由雇主预备。 陪出席聚会：６６／ｈ ２个钟以上（唔包括２个钟）按６０／ｈ计，危险地方唔去，需要特别着装嘅，
由雇主提供。 如果系靓女，可以享受以下一啲私人嘅服务：拖手每次３蚊（两分钟之内，过时照计），全日唔限次数，
随拖随放１００；拥抱每次８蚊（两分钟之内，过时照计），全日唔限次数１８８；打车轮（即系接吻）则须
面议，视女方嘅情况而定，未必会接受申请。至于靓女与否，由本人亲自裁决，卢总拥有最终解释权。 惠顾满３８８，送神秘礼物乙份；惠顾满６８８，再加送健康丰富正餐乙份。调查行踪者唔可以享受此项
优惠。 面向男士嘅，都分为有拖拍同冇拖拍两种——有拖拍部分包括已婚人士。 有拖拍男士，包括已婚男士，想侦查对方当日行踪请参阅上面有拖拍女士部分。 如果要送花、送礼物，就有３８、６８、８８、９８、１０８、１２８、１６８、１９８、２３８、
２６８、２８８、３３８、３８８、６６８、８８８、９９８同１０８８套餐可供选择，详情请向卢总垂询。 至于策划惊喜、意外、求爱、求婚等行动则面议商讨，面谈费每３０分钟１００，行动费用须于行动进行
前全额缴清，而且唔包一定成功。求婚成功者可获婚礼策划优惠待遇，卢总拥有最终解释权。 以上价格仅限广州市区，而且不含税，如需发票，须另外加收９％嘅税金及手续费。外地客户必须包来回
水脚、全程食宿及通讯等额外费用。 为免向隅，欲租从速。请即致电“寂寞的心有聊／撩俱乐部”垂询，或者以ＱＱ、电邮等与卢总联系，亦
可以喺庶留低联系方式，将会有专人回复你。欢迎中介，犒酬定必不薄。预祝各位有个开心嘅情人节！ | 
發表於 2007-2-10 00:38:15
發表於 2007-2-10 00:45:26