沈星，你对《羊城地铁报》有几了解呢？

卢总

　　之所以冇将呢篇文章列入“广州怒人专插地带”，系因为卢总有爱美之心，但凡靓女通常都会爱护有加，因此亦不忍将沈小姐……

　　

　　寻日嘅《广州日报》大字标题话美女沈星代言《羊城地铁报》。

　　

　　本来靓女出咗名，接下广告，揾下真银都系无可厚非嘅事。但今次沈美人代言嘅却系本地一份恬不知耻嘅报纸，我就觉得有必要提醒一下沈美人嘞！

　　对于一个甚少搭地铁嘅人嚟讲，对于一个从未真正睇过《羊城地铁报》嘅人嚟讲，《羊城地铁报》的确系几陌生嘅——据闻呢份报纸以前系免费派发嘅，呢个系旧年嘅事，今年如何我唔清楚，亦冇兴趣了解。

　　因为觉得《羊城地铁报》呢份报纸应该都可以归类为本地嘅垃圾传媒之一。

　　点解？大家不妨睇下旧年１１月２７号，《羊城地铁报》Ａ１２版登咗啲咩出嚟就知嘞！

　　匿名荒唐狗屁文章：《广州文化　从乡土狭隘到大气磅礴》

　　既然广州文化系如此不堪，作者点解要留喺呢个连“文化沙漠”——香港都不如嘅城市呢？甚至要喺呢个城市嘅地铁喉舌里面做嘢，唔觉得自己好卑贱嘅咩？

　　难怪佢连自己嘅署名都唔敢登出嚟咯！事关如果畀一班热爱广州嘅人知道嘅话，我谂佢一定死无全尸！

　　网友嘅愤怒：!!!十恶不赦!!!强烈谴责今日羊城地铁报A12版作者！

　　有垃圾嘅评论员，更有垃圾嘅编辑——咁冇水平嘅文章都够胆死登出嚟，系咪打算挑起一场恶斗呢？但系胡老总话要建设“和谐”社会噃，你容许呢种癫狗出嚟吠，系咪打算同佢老人家作对呀？我哋系咪都可以将你一并关起嚟，问你嘅错、治你嘅罪呀？

　　《羊城地铁报》我就肯定唔会买嘅——除非佢哋就以上事件公开道歉，并且将罪魁祸首及有关人等处决，我或者会考虑一下，否则真系难平民愤！

　　我喺庶呼吁下咁多位嚟踩场嘅朋友：如果《羊城地铁报》系要畀钱买嘅话，请你哋悭番都得嘞——事关咁垃圾嘅架构，会有咩好嘢畀你哋睇？畀钱买嚟睇，真系嘥钱嘥时间嘥心机！

　　所以在此敬告沈小姐一声：如果对你所代言嘅产品并冇真正深入、透彻嘅认识，最好就唔好乱接嘞。因为佢好可能会影响你辛苦建立返嚟嘅美好形象！

　　

　　所以千祈就唔好耳仔软，误信咗谗言，为咗嗰些少嘅利益而败坏咗自己嘅名声——得不偿失就唔好啦！

　　可能有人而家会问：卢总，你对《羊城地铁报》有几了解呢？

　　我可以好老实噉回答：我其实对《羊城地铁报》系冇乜了解嘅！因为我连摸都未摸过呢份垃圾报纸！

　　不过我见微知著嘅功夫就几了得嘅！

　　希望沈小姐能够指出我嘅不足之处——事关张德江同志最近又再强调要开展批评与自我批评！

原文出处：

http://www.blogcn.com/user25/general_lo/blog/51483455.html

写于２００７－０１－２３

Wai

條女都唔靚嘅。襯晒份報紙喇。

neo

前幾日有個同學從地鐵出來揸著呢份嘢，佢話係免費派咖，證明重未收錢。

卢总

QUOTE:

以下是引用Wai在2007-2-1 5:01:23的發言：
條女都唔靚嘅。襯晒份報紙喇。

都算饮得杯落咖嘞！

你睇下章子怡、巩俐、张小莉……嗰班“骑哩怪”啦，重肉酸啦！

卢总

QUOTE:

以下是引用neo在2007-2-1 11:59:14的發言：
前幾日有個同學從地鐵出來揸著呢份嘢，佢話係免費派咖，證明重未收錢。

敢收钱先得嘎，要钱真系揾鬼买先得咯！

我上星期六喺一间发廊里边睇过一份，基本上系摘抄《广州日报》嘅内容，冇厘新意！

九时用茶

估唔到喺我经常潜水嘅论坛会出现评论《羊城地铁报》嘅帖，因为我一位朋友呢家正就係任职于呢份报纸。

对于《广州文化　从乡土狭隘到大气磅礴》(其作者就係鼎鼎大名嘅易中天)呢篇文章，同样身为广州人嘅我的确对佢提出嘅观点不敢苟同，但係，新闻自由最重要嘅一样嘢就係可以保障各种唔同嘅声音可以得到保护，你可以唔赞同文章嘅观点，但係你冇权剥夺呢篇文章出现嘅权利，况且，文章并唔係作为该报嘅社论呢种形式出现，而只係属于个论，作为广州人嘅我哋，可以从各个方面加以辩驳，但係如果要求人哋“佢哋就以上事件公开道歉”，噉试问我哋同佢，又有乜嘢分别呢？

Wai

問題係畀人講啲唔講啲嗰度先弊。

畀得人講乜叉鄉土乜叉大氣。

就唔畀人講母語教學，我手寫我心。

卢总

QUOTE:

以下是引用九时用茶在2007-2-15 2:52:17的發言：

估唔到喺我经常潜水嘅论坛会出现评论《羊城地铁报》嘅帖，因为我一位朋友呢家正就係任职于呢份报纸。

对于《广州文化　从乡土狭隘到大气磅礴》(其作者就係鼎鼎大名嘅易中天)呢篇文章，同样身为广州人嘅我的确对佢提出嘅观点不敢苟同，但係，新闻自由最重要嘅一样嘢就係可以保障各种唔同嘅声音可以得到保护，你可以唔赞同文章嘅观点，但係你冇权剥夺呢篇文章出现嘅权利，况且，文章并唔係作为该报嘅社论呢种形式出现，而只係属于个论，作为广州人嘅我哋，可以从各个方面加以辩驳，但係如果要求人哋“佢哋就以上事件公开道歉”，噉试问我哋同佢，又有乜嘢分别呢？

叫你朋友做嘢最好就醒醒定定，否则杀无赦！

我够知原文系易中天若干年前嘅作品咯！

不过《羊城地铁报》唔署名，又冇头冇尾，重要喺地铁呢种公开场合免费派发，其行为无耻，其居心叵测——令到不明就里嘅人义愤填膺，造成社会分化，唔通就唔应该就事件及所引起嘅误会或者不满而作出合理嘅解释，并致歉咩？

卢总

QUOTE:

以下是引用Wai在2007-2-15 18:42:55的發言：

問題係畀人講啲唔講啲嗰度先弊。

畀得人講乜叉鄉土乜叉大氣。

就唔畀人講母語教學，我手寫我心。

我哋讲嘅系“闻煮”——你哋做“闻”，我就做“煮”。

人哋讲嘅系“民主”——我哋做“民”，佢哋做“主”。

monfan

听讲喺边个论坛有人话，篇嘢系断章取义，分开几个时间攞出嚟 刊登0架，睇嚟有啲嘢

kmark

无听过呢个人窝！！！！！