粵語吸收英語better than吸收普語

余OK

　　寫呢個主題可能又會畀某啲「非常愛國」嘅同胞臭罵一番嘞，冠以「崇洋媚外之徒」、「洋奴」等罪名，但我手寫我心，始終係不吐不快嘅，故冒天下之大不韙寫下此文。

　　經常有國內人士批評港人滿口說話夾雜好多英文單詞，搞到不文不類，余亦有同感，有部分港人的而且確中英夾雜得太犀利嘞，有時佢哋講嘢講得快咗，我哋唔習慣呢種講嘢方式嘅人重要諗一諗，思考返啱先聽漏咗佢講過嘅單詞，頭腦轉換返中文嘅意思，比較「蝦人諗」，對呢部分人余亦嗤之以鼻，事關粵語表達事物嘅語素甚廣，根本冇必要搵好多外來語言嚟「搭救」。不過有時喺粵語添加一啲外語元素的確令佢生色唔少，試舉一例（呢個例子余曾經喺粵協Q群講過）：

　　我唔buy你啱先所講嘅說話。

　　假使呢句出現喺一場粵語辯論賽嘅話，想必buy比中文嘅「贊同」「認同」呢類詞更生動形象，因為英文buy重有「買」嘅意思，buy用喺呢處平添一種「我唔賣你賬」嘅味道，比「贊同」「認同」呢啲中文詞語更傳神。呢個就係英語同粵語共同擁有嘅特色：表達生動活潑、熱情奔放、富感情色彩。

　　反觀普語，唔係余貶低佢，由於歷史沉積嘅原因，好多表達方式都缺乏彈性，喺一啲場合裏邊，特別口頭表達事物時，嚴肅正規有加，靈活鬼馬永遠冇份，而且吸收外來語言嘅能力相對低下，包容性不及粵語及英語強。故依愚見，適當嘅英語詞彙混入到粵語口語中係一種催化劑，但過量嘅普語詞替代咗我哋原有地道嘅表達方法則非常唔可取。

kong2605

我唔"guer"你

大话吹水

普語代替粵語肯定唔得了，但粵語就噉樣參入外國語亦唔同意。雖話表達靈活，但係噉樣落去將會係“粵將不粵”。

Wai

我本人就唔係好喜歡用個“buy”嚟代替中文嘅“贊同”，“認同”。

“人哋唔買你帳”嘅表達好過加個英文“buy”。

其實英文都吸收國語詞。

好似

風水，英文叫Feng Shui。

陰陽，Yin Yang。

衙門，Yamen。

高嶺，Kao Lin。

算盤，Suan Pan。

道教，Tao

透明度，Tou Ming Du.

參考維基百科。

當然喇。粵語係吸收英文呢方面嚟講係幾勁嘅。

dada

我唔反對吸收外文﹐不過寫buy係寫英文﹐唔係吸收英文。我亦都唔贊成喺動詞後便加個ing。

英文都係寫Feng Shui﹐唔係直接寫「風水」。雖然英文寫rendez-vous﹐法文寫week-end﹐但英語法語混合完全唔影響和諧。

highyun

某啲場合用英文會有好生鬼嘅效果，比如《香港故事》裏面嗰位對廣州話好感興趣嘅外國人就講過“par完ty”呢個例子，你聽到會覺得好得意，甚至會會心微笑，佢嘅表達比“開完party”更簡短，呢個亦係人哋選擇呢種講法嘅原因。但有啲時候，用得太多英文確實會惹人反感，特別係有時見到啲人，諗咗好耐都諗唔到一個詞點用中文表達，最終都係用個英文講返出嚟，而且呢啲詞唔係啲學術名詞，而係好普通嘅一個詞。對呢啲朋友，我第一時間唔會覺得佢英文叻，而係覺得佢中文差。

dada

「par完ty」﹐可以用「派完對」代替。

youshangwei

我同意余OK所讲！

由于粵語吸收英語嘅話並不會俾英語所同化，而搞到冇曬粵語特色，畢竟係兩種差別好大嘅語言。

相反，如果粵語吸收咗普語過多，噉就相當于將普語逐字照搬過嚟，扼殺曬粵語特色，到時就真係“粵將不粵”喇！

而家啲學生唔係自細吸收太多嘅普語咩，搞到講嘢失去咗地道嘅廣州韻味，似足讀書本噉，大家願意聽到噉嘅廣州話咩？

Wai

“由于粵語吸收英語嘅話並不會俾 （畀） 英語所同化” “而搞到冇曬 （晒）粵語特色”

“扼殺曬 （晒）粵語特色。”

口語可以夾啲外來詞，唔單祇淨係英文。粵語係生動嘅。

余OK

QUOTE:

以下是引用kong2605在2006-12-24 12:40:00的發言：
我唔"guer"你

　　哈哈，講緊順德話，呢個係個「刮」字。

youshangwei

QUOTE:

以下是引用Wai在2006-12-26 19:39:31的發言：

“由于粵語吸收英語嘅話並不會俾 （畀） 英語所同化” “而搞到冇曬 （晒）粵語特色”

“扼殺曬 （晒）粵語特色。”

口語可以夾啲外來詞，唔單祇淨係英文。粵語係生動嘅。

“俾”同“畀”两字好似係通用嘅噃？唔通“俾”係错误嘅写法？唔该晒Wai指正！

同埋“guer”唔係广州话嚟咩，我哋不嬲有讲开嘅噃？

月影

QUOTE:

以下是引用youshangwei在2006-12-27 9:40:21的發言：

“俾”同“畀”两字好似係通用嘅噃？唔通“俾”係错误嘅写法？唔该晒Wai指正！

同埋“guer”唔係广州话嚟咩，我哋不嬲有讲开嘅噃？

查過《廣州話正音字典》，基本上在“使”、“讓”之意義上用畀俾皆可，但在“給”（動詞）一義就一定要用畀

highyun

goe4 啹：服氣、呼氣：唔～（不服氣）