|
《2047太長遠 不宜睇噃2012香港點先喇》
2047，妳同我都六七十，唔好彩嗰頭近個個都就快去賣鹹鴨蛋，妳而咖寫定唔通到時畀孫睇? 畀孫睇太無謂，咁長遠冇眼睇，50年唔變張空頭支票妳鬼知佢！
2007，行政立法雙普選好夢成空，香港民主進程又遭挫！唔緊要，莫氣餒，2012再嚟過，香港一定得！香港唔係咩貨版，唔使刻意做畀人哋睇，示範畀臺灣？唔該妳去先收皮，人哋不知幾自由，切勿貽笑全世界！ 經濟巨鱷，民主侏儒，左轆大，右轆細，到頭盞係氹氹轉得噃只桔，香港千奇唔好咁！唔想咁，民主喇！昔日老懵董，冇主張，一味淨識畀撈迷，捽之搞出大頭佛：五十萬，民主軍，齊上街，怒呐喊，要自由，反禁制，要普選，反欽點！結果嚇到撈央冇聲出！七一從此變咗爭取香港民主自由嘅鬥爭召集日。 曾特首，親撈派，信耶穌，不過撈同耶穌唔啱瓦，唔通妳會唔知道？妳同啲撈講耶穌佢真係會蘇咩？咪到時人哋唔蘇之余仲畀啲撈篤噃轉頭就太無謂，結果變咗老懵董第二，成世英名一朝喪！ 十一五，撈計劃，香港做乜差只腳？驚住畀撈邊緣化？香港幾時變得咁冇信心吖？香港人，唔使驚，要知道，妳同澳門嘅真正優勢並唔係要爭做乜中心物中心，而係因自身獨特發展歷程而遺留落嚟嘅獨特政治地位，呢種半獨立嘅政治實體地位，係國際社會一致承認嘅，香港同澳門，妳哋一定要珍惜吖！咪咁短視，同撈一味搞咩“一體化”，到頭嚟盞搞到自己連渣都冇。 香港要做就做第二個星加坡，澳門係文萊，南粵兩廣就係馬來西亞，我哋都有相同嘅祖宗，相同嘅語言，相同嘅文字，相同嘅文化，相同嘅習俗，我哋都係親兄弟！睇清楚，係兄弟吖，唔似得啲撈咁，開口埋口就祖乜前祖乜後，妳見到佢就好似仔見老竇咁一定要俯首膜拜先至得！我哋廣東絕對唔會咁，港澳中意同我哋同一屋簷下，分甘同味，我哋高興至極，假如港澳唔中意，要分灶食飯，OK冇問題，就好似當年星加坡決定退出馬來西亞咁，廣東係唔會強人所難嘅。再者，當年文萊獨立，馬來西亞並冇因佢的色嗰頭而起非分之想，呢一例完全可以套用喺粵澳關係身上。 南粵兩廣對之於香港澳門，就有如馬來西亞對之於星加坡文萊，完全係平等友善嘅兄弟加朋友嘅關係。相反睇噃當年馬來西亞立國嗰陣，印尼係點對大馬咖？佢聲言要剷除消滅大馬！話要完成馬來民族嘅神聖統一咁話喎，問都冇問過大馬願唔願！之後仲衰到悍然武裝出兵侵略吞併新生嘅東帝汶，不過好在天有眼，最後結果係點，大家有眼睇喇，咪大馬食唔成，東帝汶獨立，亞齊巴布亞同南馬魯古要同佢劃清界線，另開爐灶咯，抵佢折墮！ 好喇，念口簧講耶穌罯咗咁耐，係時候入噃正題喇，2012嘅香港會點呢？我深信，喺香港一眾熱血民主鬥士同廣大竭力追尋自由嘅開明港人不懈努力底下，到2012年，喺香港將會全面無阻礙咁實現行政長官 / 立法會嘅雙普選！假如到時真係咁，咁香港人就係開創歷史嘅一群人，佢哋將係我哋大粵民族中率先享受並展現民主魅力嘅第一群幸福嘅人！呢種示範效應對早就民主好耐嘅臺灣所起到嘅波瀾其實有限，不過對同香港血脈同根嘅南粵兩廣嚟講，呢種撼動無疑係巨大而又影響深遠嘅，唔使幾耐，南粵嘅民主化思潮同自治化運動就會風起雲湧！ 論及民主選舉，必然會有一個選民同候選人地域分佈嘅問題，劃分選區就變成相當之迫切而又必須要去解決嘅樽頸位。選區係咩嘢？選區其實就係劃定一個區域，並賦予喺該區域裏頭生活居住嘅所有年滿18歲及18歲以上民眾選舉權同被選舉權，要佢哋一人一票選出佢哋認為可以代表佢哋意願嘅行政長官候選人 / 立法會議員候選人 / 區域議會議員候選人。 選區其實係一個基層民眾嘅自治單元，佢可以係城市裏頭嘅一個街區，又可以係鄉郊地區嘅一條村落，若干相鄰選區可以聯合組成一個區域議會，該區域議會嘅所有議員均由組成該區域嘅諸選區選民一人一票選出，而絕非官式委派，無論係選區抑或係由選區組成嘅區域，喺佢哋之上都唔會有一級一級嘅官僚喺度食白飯，喺呢啲區域裏頭絕對冇乜局物局，區域議會係該區域內最高嘅質詢機構，佢可以對喺自己地頭裏面進行服務嘅政府各局署提出質詢，使之做出更符合該區域民眾所要求得到嘅更高更好質素嘅服務，為本區域民眾謀求更大便利同福祉。呢啲就係國際主流民主社會所普遍施行嘅“民本位制”地方區域自治模式，同現時中國嘅“官本位制”行政區劃模式係完全大相徑庭嘅兩碼事。妳從行政區劃呢四個字就可以感受出咩叫做“官本位制”：行者施行也，政者政令也，合起嚟解就係為咗上頭佈施號令嘅方便而對諸黎民百姓居住嘅地方進行區別劃分，呢裏頭充滿住當權者號令天下而眾奴民齊呼萬歲嘅味道，絲毫冇到一啲民本民權嘅因素喺度。所以吖，香港特別行政區呢個名本身就係對香港自由民主嘅挑釁，應該立即將佢更改為香港特別自治省或者香港自治省，而行政長官應該改叫自治省總理或者自治省主席。 雖然香港現時仲未係一個完全自由民主嘅社會，不過起碼都有噃五成喇，同由撈統治嘅南粵兩廣比就真係一個天堂一個地獄，所以吖，香港人，妳哋一定要好好珍惜而咖所享有嘅一切，即使係淨得五成嘅民主妳哋都要呐住，並爭取早日挪足十成，唔好再提咩融合一體化喇，同大陸保持劃地為界若即若離嘅政治超脫地位，係現時香港嘅明智之選，正如臺灣話齋：要融合，都要等大陸民主咗先喇！千奇咪一時興起盲錐錐咁踵埋嚟，連嗰五成民主都畀撈昆埋，咁就真係喊都無謂喇。 香港現時有一套高效率嘅政權機構，直接喺香港十八區為香港普羅大眾提供服務，十八區又有各自嘅區域議會，咁好好，好易同國際主流民主社會所普遍通行嘅“民本位制”地方區域自治模式接軌。不過現時香港嘅政制勢力仲係政府大議會細，至於司法（終審法院）同監察（廉政公署），仲尚算可以，企得幾硬。議會方面，尤其係區域議會，佢嘅權力同作用仲係細得可憐，尤其係冇一啲政府重大項目嘅財政撥款審核權，更係佢哋嘅致命傷。作為最基層嘅一級地方議會，佢哋勢力嘅強大與否，係一個地方民主化程度高低嘅重要指針，區域議會嘅進取心越濃烈，咁就代表廣大基層民眾對佢哋嘅要求越高，壓力越大，顯現出民眾對自身權利嘅高度關切，可以講，基層民眾自主性越強，咁代表佢哋嘅區域議會就會以越強勢姿態出現，地方區域自治就越成功。 香港現時十八區嘅分法對於基層選區嚟講顯然過疏，按現時香港690萬人口，平均每3萬人選出一名立法會議員計，立法會會有230席，呢個係一個適中嘅數字，過細顯示唔出代表性，過大則浪費公帑。呢230席如果都由230個基層選區一區一個選出，咁基層選區就會分得過密，造成選舉成本太高，可以考慮由115個基層選區一區兩個選出呢230席，而地域相鄰關係密切嘅每4－6個基層選區將組成一個地方區域自治聯合體，建立佢哋嘅區域議會，類似於今日嘅十八區區議會，每個基層選區一區一組（6－8人）選出規模喺30－40席左緊嘅區域議會。每一個區域嘅界定，除咗要考慮選民人口分佈之外，仲要慮及地緣歷史環境，警力配備，社區康體民政設施等因素，基本上，每一個或者每兩個地方區域，可以作為一個警政管理區 / 消防管理區 / 民政事務區。 現時香港應喺十八區嘅基礎上加設一啲新區，以免因某啲區域人口激增而造成選舉代表性不足嘅弊況出現，如喺沙田區分拆出馬鞍山區，喺西貢區分拆出將軍澳區，喺東區分拆出筲箕灣區，喺元塱區分拆出天水圍區，喺觀塘同黃大仙兩區嘅接合部析地外加舊啟德機場組成啟德區，葵青區分拆為葵湧區同青衣區。 | 
發表於 2006-11-13 05:15:22
發表於 2006-11-14 01:32:45
發表於 2006-11-14 05:11:17