[轉貼]《只想轻轻孭住你, 再走一次东川路》

superjill

剧名:《只想轻轻孭住你,?再走一次东川路》（上集）?

剧本：紫月无痕?

男主角：紫月无痕[PP]?
特邀女主角：KATHY[2仔]
女配角：兔兔
特别客串：雨云、小狼、无忌、鬼妹仔、小史?

为咗加强故事嘅可阅读性，我揾咗几位浮版红人来做故事嘅主角。?
本故事纯属虚构，请大家切勿代入。如有雷同，实属不幸！！！?


适逢小周末，紫月约埋雨云、小狼、无忌、鬼妹仔、兔兔同小史去新冶浮。期间，兔兔带咗佢个妹妹过来：“嗱，呢个就系我个妹--KATHY,你哋叫佢’2仔’就得嘅喇。”?有新人加入,大家当然枪口一致对外嘅喇。于是，2仔响呢晚畀人劈到天昏地暗。但最令人意外嘅,竟然系佢啲酒量大到得人惊，就连号称千杯不醉嘅兜兜、同色盅小王子雨云都畀佢劈冧咗。?

当众人走出新冶门口嘅时候，兜兜第一时间“大”字型噉摊咗响地铁口，再望雨云，佢已经趴响自己架车旁边表演紧“喷泉”，而兔兔一早就已经好似一坺烂泥噉，畀小狼同无忌抬咗上的士。净返紫月望住坐响烈士陵园台阶上嘅2仔，只见2仔双手抱住膝头，已经”藕”下”藕”下噉……。?

紫月走过去：“2仔，你点啊？有冇事啊？你饮咗咁多，不如呕出来啦??呕出来会舒服啲嘅。”

2仔拧咗拧头。紫月又问:“噉你行唔行到啊？我打的送你返屋企啊?”

2仔抬起头：“我屋企响东川路，好近嘅咋，唔使打的，我有啲晕啫。PP,不如你扶我行返去喇?”

于是，紫月就扶起2仔，慢慢噉行过东川路。?突然，2仔成个人侧咗一下，坐咗响地度。紫月一望，原来佢踩到个水氹：“你点啊？有冇扭亲啊？”

“噉点啊？你重行唔行到啊？算喇，反正唔系好远，不如,我孭你返去喇!”?紫月讲完，就孭起2仔：“点行啊？”

2仔：“你一直向前行就得喇。”

行咗好耐，已经差唔多行到白云路，“PP转右喇，白色嗰栋楼就系喇，不过,我住9楼，冇电梯喎!”

紫月敕晒气噉：“你唔早讲！……,不过,好彩唔系19楼冇电梯，如果唔系，我条命都畀埋你！”?2仔听到，”咭”一声噉笑咗出来。

终于紫月好辛苦噉爬到九楼:?“好喇，你慢慢落来啊，小心只脚。”

2仔好小心噉落咗地，打开屋企个门，紫月话：“我走喇，你自己小心啲，揾啲药酒捽下只脚喇。”

2仔笑笑：“嗯，我会嘅喇，辛苦晒你啊，下次请你吃饭补数。”

紫月一边抹汗一边讲：“重有下次？！你谂下好喇，孭你上9楼,重惨过爬白云山啊!”

话音刚落，2仔突然惜咗紫月一下：“嗱，噉得未啊？好夜喇，你快啲返屋企喇。”讲完就关埋门，行咗入屋。

紫月笑咗笑：“傻妹!”?跟住转身落咗楼梯。?

事隔两晚，正当紫月浮紧嘅时候，突然收到条短讯：我响新冶，头好晕，过来接我。紫月望住条短讯：“唔好喇啩!大姐,你又揾啲噉嘅嘢来搞啊？”

讲还讲，紫月重系好快噉坐上的士去到新冶地牢。落到卡9，见到2仔已经醉到趴咗响张沙发度：“2仔，你又做咩鬼饮到咁醉啊？来喇，我送你返屋企喇。”?

凌晨3点钟，月光下嘅东川路了无人烟，只有一个男仔孭住一个已经醉咗嘅女仔，慢慢噉行响条街度：“哗！2仔，人仔细细,乜鬼咁重嘅你，镶铁咩你！”

2仔冇出声。原来,佢已经趴咗响紫月嘅膊头度瞓咗。

superjill

剧名:《只想轻轻孭住你,?再走一次东川路》（下集）?

剧本：紫月无痕?

隐藏男主角：紫月无痕[PP]?
特邀女主角：KATHY[2仔]
女配角：兔兔
特别客串：兜兜、雨云、小狼、无忌、鬼妹仔、小史?

为咗加强故事嘅可阅读性，我揾咗几位浮版红人来做故事嘅主角。?
本故事纯属虚构，请大家切勿代入。如有雷同，实属不幸！！！?

今日又系小周末，依然喺新冶卡3，依然都系兔兔、2仔、兜兜、雨云、小狼、无忌、鬼妹仔、小史同紫月无痕。兔兔举起酒杯：“嗱，我个妹听日就走喇，可能大家以后都冇乜几何再见，今晚就当同我个妹饯行喇！饮胜！”?众人欢呼，一齐举杯饮性，唔知点解，紫月觉得2仔今晚有啲唔开心，可能系因为要走嘅原因喇。?

到咗3点几，大家尽兴而散，当紫月扬停部的士想归家嘅时候，2仔扯住佢只手：“送我返屋企啊！”

紫月望住佢：“你今晚唔系饮咗好多咋喎，你自己行到返去啩？”

2仔听到之后开始扁嘴。

“啊，好喇、好喇，我送你返去好未？”

2仔咭声笑咗出来：“噉就差唔多，你男仔来嘅嘛，梗系要负责送女仔返屋企嘅喇。”?

两个人行行下,“PP，你拧转身先喇。”

紫月望住2仔：“咩事啊？又想我做免费劳工啊？你做下好心,放过我喇！”

2仔：“唔制，我要你孭我返去。”

紫月望住佢，叹坐口气拧转身。2仔一跳就趴咗上紫月嘅背脊。行到半路，紫月突然膊头一痛：“喂，你傻Q咗啊？！做乜咬人啊？”

2仔笑住讲：“我钟意啰!”?

终于，紫月第3次来到呢个令佢呕血嘅门口：“你听日下午就走喇，早啲休息喇，我返去喇。”

2仔耷低头：“你今晚可唔可以陪下我啊？我今晚屋企冇人，我好惊一个人嘅。”?讲完就拖住呆咗嘅紫月,走咗入自己屋企。?

2仔拧转头,静静噉望住瞓响佢旁边嘅PP:?“噉你究竟爱唔爱我啊？”

PP双眼望住窗外嘅月光:“我哋识咗几耐啊？我哋大家又对对方了解咗几多呢？虽然你听日就要离开呢度，但我唔想呃你。事实上，我答唔到你呢个问题，但我可以话畀你听，我对你呢分感情系真嘅。”

2仔冇再出声，佢转过身揽住PP，好实、好实。佢只希望今晚嘅时间,可以过得慢啲,再慢啲。

坐响离开广州嘅车上面，2仔默默噉望住车窗外不断飞逝嘅景色，过去一个星期所发生嘅片断,就好似啲景色噉，一幕幕响佢脑海里面闪过。手里面依然拎住，嗰封PP响临上车前畀佢嘅信。望住淡紫色嘅信封，就好似一种淡淡嘅忧郁穿透心中。?

2仔慢慢拆开信封，揭开折得好整齐嘅信纸。信纸好大张，但只有短短嘅一句：2仔，只想轻轻孭住你，再走一次东川路。祝一路顺风!?

2仔睇住呢短短嘅一句嘢，好耐、好耐。唔知道几时，双眼经已模糊，佢用手揞住自己嘅口,耷低头，抽泣起身，眼角一滴晶莹嘅泪珠随之滴落喺信纸上，散开嘅泪花,仿佛一朵稚气嘅百合,响信纸之上悄然盛放。?

呢个事实话咗畀广大浮仔浮女知道：
?
响浮场，可能未必会有天长地久嘅真爱，但一定会有令你毕生难忘嘅真情，亦都再次印证咗我嗰句名言：浮场冇真爱，但浮场确有真情在！