[轉貼]《我喺长堤做登场—“劈酒部”的日子》 (1)

superjill

本作品由woodcotton[辛宜文]轉載于大洋論壇，并為其作序

代序：

同住羊城，每人都有自己嘅故事。当你去浮嘅时候，有冇谂过喺嗰度打工嘅红男绿女，又过住一种点样嘅生活？下面，就系Kathy讲嘅古仔。

原著：欺霜傲雪（Tiffanyho）


PART 1

我，叫KATHY，一个20岁嘅靓妹,职中毕业。从前喺一间电信公司做紧客户服务主任嘅职位，返紧日班，其实我都谂过早上返呢份，夜晚就去做登场嘅啦，特别我呢啲贪玩嘅人。例如：BBF，426，MINI426，CATWALK，FEELNET，YES, DMC，新冶，以前嘅F4，紫星阁，唔会少咗我嘅身影啰。有得浮又有钱赚，简直正啦，人就梗系趁后生嘅时候揾多啲钱嘅啦。

但系，最衰我日头嗰份工净休息一天。登场起码最少一星期要做3日。并且我早上份工又要打醒十二分精神嘅。所以都冇继续想话去做啰。后屘点知道真系去咗做登场。。。。。

本身我做紧嗰间公司都有固定嘅收入，份粮嘅数目亦都唔差，话晒都系香港公司。 但最衰系因为某个原因，所以先辞咗份工，我喺呢间公司都做咗成1年08个月，差唔多都有2年,连老世都挽留我，叫我唔好走，话做得好好地，走乜嘢啊？

但系，我话要读书，所以先走，其实我都冇讲大话，我的确系一路读书一路做嘢。 我屋企人唔畀钱我读书，同埋我想靠自己，所以学费完全系自己交。

但到最屘，我都系辞咗份工。除咗我之外，我身边好多同事都辞咗职，无论系新人定旧人，都有人走。讲真，喺呢啲电讯公司成日有人走都唔出奇，流动性比较大。

[此帖子已經被作者於2006-10-25 23:15:02編輯過]