|
鑒於當今社會錯字使用現象「遍地開花」，粵協與一般民眾對文字使用諸如「求祈係啦、使乜咁執着喎、搞啲古靈精怪嘅字體噉先夠潮呀」嘅從眾態度「背道而馳」，其中一個宗旨係倡導大家正確使用漢字，呢點亦係粵協能夠傲視於一般網站或論壇嘅可貴之處。 國內有一本對漢字語言文字探討比較出名嘅雜誌《咬文嚼字》，曾連續多期舉辦《向我開炮》嘅欄目，等讀者嚟指出該雜誌以往文章有文字使用失當嘅地方。雜誌社嘅目的就係：既然我《咬文嚼字》嘅口號就係倡導淨化語言文字，我就好應該作為楷模起表率嘅作用，適時噉畀人「咬」吓「嚼」吓未嘗唔係一件好事，有則改之，冇則加勉，編輯同讀者共同進步。 粵協亦一樣，都唔怕畀人開刀捉字蝨。歡迎廣大粵語愛好者參與呢個「向我開刀」嘅行動。具體流程（初稿）如下：
1. 選取一啲較代表性嘅資深粵協成員發嘅文章或帖子嚟執佢錯。因其他成員一時未能對粵語規範用字好掌握，所以執佢哋嘅錯會「不忍卒睹」，故選取對文字使用比較嚴謹嘅成員發嘅文為上上之選。可以一段時期祇針對某一成員發嘅文進行專題「手術」，然後「換刀」醫治下一個「病號」。
2. 其次選取一啲喺外面轉帖返嚟嘅文章，特別係網友自己將本來係簡體字但轉為傳統字嘅文章，指出其錯誤之處。
3. 對一啲爭議性較大嘅字詞，專門攞出嚟大家討論，若然冇權威嘅資料則任何一方都不分對錯，但粵協喺總結各人意見後應選取其中較多數人同意嘅一組詞作為本協會規範用字免得以後再進行過多無謂嘅爭詏。
4. 關於正字或本字使用孰是孰非嘅問題，結合多人意見，本協會基於噉樣嘅原則：「考證要逐本索源，日用則棄雅從俗」，如果有一個廣為接受嘅字，而所謂嘅本字經已冇人認識，呢個時候就唔應該用嗰個本字，喺其他情況下則鼓勵使用本字。
5. 為避免各人各自發帖過於分散。我哋規定每一專題都喺同一張帖進行回覆，以方便管理及統計。
6. 定期進行總結，對一啲積極熱心、提出寶貴意見嘅成員給予獎勵，獎勵辦法待粵協「高層」商討後宣佈。 為諸君共勉，粵協喺各人大力支持積極參與下定能更好噉發揮佢嘅優勢之處，越辦越出色。
[此帖子已經被作者於2006-10-13 23:32:00編輯過]
| 
發表於 2006-9-30 18:36:02
發表於 2006-10-2 23:08:03
?
發表於 2006-10-19 07:31:19
多謝！