探討之二：「唔該」 「唔該晒」 「多謝」 「多謝晒」

香江白丁

說話適當運用字詞，不但可促使講聽兩者之間傳情達意，也能顯示講者的涵養、令聽者產生美感。遣詞用字，若恰如其分，好比美女打扮得宜，去街市是淡掃娥媚，出席盛會則濃妝抹艷；反之，詞彙貧乏，就好像女士不懂打扮，令人乏味。在下繼三月廿四日之帖，以下我仍想同大家探討一下「唔該」 「唔該晒」 「多謝」 「多謝晒」等詞之用法。


不知是我記錯抑或忘記了，我強調，是可能記錯也不定，粵語的詞尾「晒」是「煞」的音轉。查字典，「煞」字多解，其中一是「結束」之意，如「煞科」引申至「煞車」「煞停」，另一是「極、很」之意，如「煞費苦心」「兇神惡煞」，而粵字的「晒」可能由此而來，其用法也一樣，如：

作「結束」之意：「做晒功課」
作「極、很」之意　：　「你大晒呀」

在實際用法上，「晒」比「煞」還多一義，就是「全部」，例如：

甲：個雪櫃有冇食物？
乙：有雞、牛肉、冷飯、餅乾
甲：我好肚餓，攞「晒」出嚟，我「晒」食佢

這時，「晒」作「全部」解。現在我就想跟諸位探討一下，時下「不少人」對「XX晒」之用法，以去食肆用餐為例：

1. 對於人家簡單的幫助，如侍者為你開門，應以簡單的「多謝」或「唔該」，講「唔該晒」是過於隆重

2. 侍者帶客人就坐，應講「請」「請坐」「呢邊請」，講「唔該呢度」則不通

3. 客人點菜，侍應接「柯打」簡單講「多謝」便可，講「多謝晒」則過於隆重，「唔該晒」則大錯

4. 久候食物不至，催促侍應，應說：伙記，請你／麻煩你，幫我追一追的食物。「唔該，我點嘅餸咁耐都未上嘅？」是沒禮貌，不宜用。

5. 侍應端菜上枱，陪隨的一句，我常常聽到的是「多謝」，「多謝晒」也有 「唔該」，少聽到「請起筷」 「請慢用」而這卻是恰當的說話

6. 客人要求多多，侍應一一服侍妥當，客人最後應該說：「麻煩晒」 「勞煩晒」，這時的「晒」是對應「侍應全部的服務」 講「唔該晒」未嘗不可，但屬不講究。

7. 老闆見客人有涵養，對他必恭必敬，又送糖水，又打九折，客人滿意，埋單畀多啲小貼士，說日後再幫襯，老闆「回贈」了現金券，送客出門。臨別，老闆講「多謝晒」（客人之光顧、貼士、好話），客人也可講「多謝晒」（服務、折頭、現金券）。


各位，你們日常生活裏是怎麼應用上述粵人詞語呢？

香江白丁

剛發現一補充資料例子，請參考以下錬接：
http://bbs.cantonese.asia/frame.php?frameon=yes

二千零八年四月，某網友甲上載一帖子，是公開發佈的，即不是專登給予一特定人的。網友乙看了，作出以下回應：唔该晒，已收藏。

在下認為，網友甲發帖之意圖不是應網友乙之約，即網友乙得了這帖，非網友甲刻意的，故不算「刻意的幫助」。 網友乙恰當的回應是：多謝，帖已收藏。說「多謝晒」屬過份，「唔该」或 「唔该晒」都不恰當。

衣不稱身，沒美感可言；不恰當之說話，則矯情。

UngooChan

研究本字非我專長，「晒」、「煞」嘅轉換關係，不便插嘴。
白丁君所舉七個用法，就本人使用習慣回應如下：
1、我會講「唔該」。
2、同意
3、同意。不過聽到「多謝」嘅機會好少，多數接咗單重複一次就走咗去。
4、唔同意，另一帖已有詳細討論。
5、低級食肆，夥計一般都係重複一次餸名，唔會多謝你；高級餐廳，會聽到「請慢用」，至於「請起筷」，係食客相互之間先會講。
6、「麻煩晒」 「勞煩晒」極少人噉講。此外食飯過程係不斷要求侍應服務，好難界定幾時服務完畢，所以「唔該」同「唔該晒」唔可以噉分。只可以講一般小事講「唔該」，付出好大努力幫你就講「唔該晒」。
7、出外食飯收到coupon，我都會講「多謝」嘅。

另外再回應下第二帖，發帖者發帖係為咗共享某啲信息或資源，得到資源嘅網友，當然應該講「多謝」。

香江白丁

回覆 3# UngooChan

〔至於「請起筷」，係食客相互之間先會講。〕
在下同意閣下之見，拙文第５項的「請起筷」是畫蛇添足。


另補充一點，拙文第７項，老闆說「多謝晒」，客人可回應「好話！好話！」
我就常聽到上一輩這麼說，我認為很恰當，兄台認為呢？

UngooChan

「好話（喇）」而家好少聽，上一輩確係時常講呢句。由於冇乜語感，我唔敢講係咪恰當。

余OK

　　「好話好話」相對於北人「哪裏哪裏」，又約莫相當於英人回敬讚言或謝言「Thanks」。

a_qi

「唔該」有分事前同事後
事前講, 相當於「麻煩你」,  即係英文please, 唔係thank you.
例如「唔該幫我打個電話」

所以「唔該，我點嘅餸咁耐都未上嘅？」呢句, 我覺得冇問題

事後, 可以講「唔該」或者「唔該晒」, 我覺得兩個冇乜分別

呢類日常用語, 似乎應以應用為主, 「跟大圍」, 字眼上毋須太斟酌

香江白丁

回覆 7# a_qi


當然，陳老師所舉之例句，講『唔該』大家都能明白。用『唔該』是冇『乜大』問題，祇是我以為『唔講究』而已，我稱之為『扁平足』語言（香港陳雲先生寫書謂詞彙貧乏、一詞多用為『扁平』式，不才加一『足』字，以形象化其不足）。

陳兄有否都看過拙帖系列之帖一，探討相關的『唔該』與『多謝』？若然是看過了，仍作以上評語，則我更清楚兄台之觀點矣。

若果人人都以『唔該』作開首詞，而你能先講出對方尊稱，才以『麻煩你』道出要求，有教養者聽到，其感覺會是如何呢？

在下非食古不化，我懂得『大圍』，但就未必跟『大圍』。多謝閣下意見。