|
考下各位乡俚啲智商，不过千祈唔好当真！都係闷过头，揾番啖笑啫。
呢十一条题，听讲话好深嘅，成日流流长至做到一题，仲话要智商成二百咁高先至可以全部解画，係定唔係，
试过就知啦！
第一题
有三条友去住客栈，三人房要三十蚊一晚。呢三条友每人畀十蚊，凑够三十蚊交畀老板，准备好好地瞓番晩。老板见佢哋斯斯文文又咁爽手，就同佢哋讲：今晚卖大饱，畀廿五蚊就搞惦，跟住拎返五蚊出嚟叫个后生畀返佢哋。点知个后生贪心，自己落咗格两蚊，净係畀返三蚊呢三条友，每人分返一蚊。
依家问题嚟喇：开头每人畀十蚊，后尾退返一蚊，十蚊减一蚊即係每人畀咗九蚊，三个人每人畀九蚊即係总共廿七蚊，加埋个后生自己落咗格嗰两蚊，总共係廿九蚊。咦，仲有一蚊去咗边度？
呢条题，听讲话喺新西兰都考起好多人，咁各位乡俚边个知道呢？
第二题
有个成日袋住十三撗算盘嘅老友去趁墟买葱。见到个卖葱佬担住担葱，就问佢点卖法。个卖葱佬话，啲葱一蚊斤，呢度有一百斤。呢条十三撗又问，咁样葱白同葱绿得唔得分开卖？卖葱佬话，得，点解唔得啫？葱白七毫一斤，葱绿三毫一斤。呢条十三撗话，咁我买五十斤葱白、五十斤葱绿，找数。嗰个卖葱佬计一计条数，葱白七毫一斤，五十斤总共卅五蚊，葱绿一斤三毫，五十斤总共十五蚊，两条数加埋啱啱五十蚊。
十三撗掟低五十蚊，阴阴笑担住啲葱走路。嗰个卖葱佬就惨咯，点计都唔明：嗰担葱有一百斤，明明卖得一百蚊，点解分开咗卖，虽然都係卖咗一百斤，点解会水瓜打狗唔见一截，得番五十蚊？
咁各位乡俚，帮佢解下画，咪返到屋企都唔知点样同领导汇报噃！
第三题
有个井成七公尺咁深，有只蜗牛就唔想坐井观天，一于向上爬睇下个花花世界。日头爬咗上嚟三公尺，夜晚又线返落去两公尺，唔知呢只蜗牛几肘爬得出个井呢？
咁各位乡俚边个知道呢？
第四题
一个桃一毫，三个桃核换一个桃。依家你楂住一蚊，咁你食到几多个桃？咁你又係点食呢？
第五题
呢度有十二个乒乓波，个样、颜色同大细都相同，不过其中有一个重量同其它嗰十一个唔同。依家畀你一部冇砝码嘅的天秤，净係准称三次，睇下你有冇计将嗰个重量唔同嘅波揾到，之不过仲要知道佢係轻啲定係重啲。
咁各位乡俚边个知道点样称呢？
第六题
有个生意佬，骑住一只驴，要行成千公里咁阔嘅沙漠，去卖三千条胡萝卜，依家知道呢只驴一次可以驮一千条胡萝卜，不过每行一公里，只驴就要食一条，咁样嗰生意佬行出沙漠之后仲有几多条胡萝卜卖呢？
第七题
讲古佬话有一日，有只海盗船畀天上边跌落嚟只牛耷到正，嗰五个时运低嘅懵佬冇计，净得游水去到一个孤岛。呢个孤零零嘅岛上边净得一棵椰子树，仲有……一只马骝！
嗰五个时运低嘅懵佬夹手夹脚摘晒啲椰子落嚟，又冻又攰又肚饿，咁咪拍扁个头瞓啰。
半夜有个以为自己冇咁懵嘅懵佬静静鸡起身，将摘落嚟嗰堆椰子分成五份，仲剰番一个，咁就顺手畀咗只马骝，自己就偷偷鸡收埋一份，剩低嗰啲又捞埋一堆放番喺原来嗰度，又静静鸡扮冇嘢走返去瞓。
冇几耐，另外一个又係以为自己冇咁懵嘅懵佬静静鸡起身，将摘落嚟嗰堆椰子分成五份，又係仲剰番一个，咁就顺手畀咗只马骝，自己就偷偷鸡收埋一份，剩低嗰啲又捞埋一堆放番喺原来嗰度，又静静鸡扮冇嘢走返去瞓。
冇几耐……
冇几耐……
总之，呢五个时运低嘅懵佬都静静鸡起过身，做过同样嘅事。
卒之捱到天光，呢五个时运低嘅懵佬都一齐起身，都以为自己做咗件醒过其他人嘅事，个个阴阴笑又将嗰堆椰子又分成五份，点知呢只马骝真係行运行到脚趾公：今次分椰子又係仲剩低一个。咁就好似令狐冲话不戒和尚斋，理所当然不可不戒咁又将呢个椰子畀埋只马骝。
咁各位乡俚边个知道呢堆椰子一共有几多只？
第八题
讲古佬又话，有一个海岛，上边收藏咗好多好多宋朝最拉尾嗰个皇帝（即係陆秀夫孭住跳海嗰个）留低嘅金银财宝，仲留低好多人嚟守住。
过咗好耐好耐好耐，耐到嗰班人嘅后代都係剩番三个，嗰名就叫做阿大、阿二同阿三。
你知阿大知道啲金银财宝收藏喺山顶定係喺山脚，之不过佢纸下巴口轻轻，讲嘢时真时假。净得阿二知道阿大係讲紧真话定係讲紧假话，不过阿二有铺瘾，佢知道阿大讲紧真话，佢就讲真话，如果阿大讲假话，佢就跟住车大炮。
阿大同阿二都唔仲意讲嘢，佢哋两个都係好似依家举手选举咁，用举左手或者举右手嚟讲畀你听係定唔係。不过你就唔知佢哋用边只手表示係，又用边只手表示唔係。
剩得阿三知道阿二讲真嘢定係讲流嘢，佢知道举左手係乜，举右手又係乜。阿三唔用动作，而係直接讲畀你知係定唔係，不过阿三就死牛一边颈，一係就句句真，珍珠都冇咁真，一係就句句假，仲假过贾雨村。不过你仲係唔知佢依家係珍珠都冇咁真呢定係假过贾雨村。
咁各位乡俚边个知道点样用最少嘅问题问到啲金银财宝收藏喺山顶定係喺山脚呢？
温馨提示：如果你问阿三知唔知道啲金银财宝收藏喺山顶定係喺山脚，呢条友一定会问返转头点先至可以知道啲金银财宝收藏喺山顶定係喺山脚？咁搞法真係唔知边个问边个。
第九题
喺公司嘅礼堂开大食会。
行政科长因为博爱，同佢太座搞紧你死我活嘅阶级斗争，冇讲畀总务科长听有几多个人参加大食会。
总之，如果三个人坐一围枱，咁就多咗两个人。如果五个人坐一围枱，咁就多咗四个人。如果七个人坐一围枱，咁就多咗六个人。如果九个人坐一围枱，咁就多咗八个人。如果十一个人坐一围枱，咁就啱啱好。
总务科长挠晒头……阴功，佢个头本来就差唔多「亮了」。
咁各位乡俚边个知道有几多人参加大食会？又摆咗几多围枱？
第十题
阿茂喺屋企请客，食西餐，所以想买番几套刀叉。
佢去咗阿寿间餐具铺睇货。
阿寿嗰间铺头啲嘢几齐全，直情可以讲係平夹正，阿茂心惗买熟唔买生，决定就喺阿寿间餐具铺买。
佢计咗下数，发觉自己带嚟嘅钱可够买廿一把叉同廿一只汤匙，或者买廿八把餐刀。不过，如果佢买嘅叉、汤匙同餐刀数量唔同，就配唔到套，所以佢要用尽带去嘅钱嚟成套买。
咁各位乡俚边个知道阿茂带去嘅钱够买几多套餐具呢？
第十一题
有个贼仔偷嘢被差佬睇到，差佬就追嗰个贼仔，贼仔梗係走甩裤都唔理啦！走下走下，前边有条河仔拦住条路。呢条河仔有十二公尺阔，喺贼仔同差佬呢边岸有棵枯咗嘅树，树叶都冇晒。有咁啱呢棵树又係有十二公尺高，贼仔围住嗰条颈巾有六公尺长。
咁各位乡俚边个知道个贼仔点样过河走甩？
温馨提示：啲差佬係冇颈巾发嘅。
| 
發表於 2010-11-21 05:22:56
