Apple Daily 蘋果日報網上版－－2010-09-06
 政界中人濟濟一堂慶祝《城市論壇》三十而立，惟獨唔見民建聯中人影蹤。
曾顯華攝 港台王牌節目《城市論壇》噚日喺自己地頭、即係維園凉亭慶祝 30歲大壽。踏入三字頭嘅《城市論壇》以全新形象迎接新一季度，主持人就由謝志峰冧莊，維園阿伯同維園阿哥繼續做死硬粉絲，齊齊為《城市論壇》賀壽，相處得不知幾融洽。反而民建聯成員中，除咗以港區人大代表身份應邀嘅譚惠珠外，一個都冇到，搞到謝志峰都忍唔住寸爆嘴，話政黨中人唔出席真不該。
噚日嘅維園比閒時周日熱鬧，政府高官、行會成員、立法會議員、學者以及民間組織代表聚首一堂，慶祝《城市論壇》三十而立。現為行會成員嘅梁智鴻笑稱，當年出席《城市論壇》時仲係「 o靚仔」，估唔到咁快成為 71歲嘅維園阿伯。  毛孟靜（右）見到馬丁好似糖黐豆咁，唔怕老公呷醋。  講笑話自己係維園阿伯嘅梁智鴻都有到賀。
譚惠珠獨力撐場
馬丁以前都係《城市論壇》常客，仲係維園阿伯最 like嘅政界中人，否則佢哋個大聲公咪冇用囉。但馬丁重臨舊地冇同維園阿伯翻舊賬，可能因為佢已經晉身民主阿伯之列，反而同港台算賬，質問謝志峰點解「舉頭望明月，低頭 C Y Leung」，只搵一位疑似特首候選人梁振英做主禮嘉賓咁唔公平。謝志峰大嗌寃枉，事關佢搵過唐唐，人哋唔得閒之嘛。
查實唔得閒嘅人豈只唐唐？噚日一眾嘉賓中惟獨不見民建聯代表，主持人李小薇同謝志峰喺台上發言時都意有所指，反問唔知點樣先可以請到佢哋嚟呢？謝志峰強調《城市論壇》係屬於港人而唔係港台嘅，唔點名寸爆嘴咁話：「佢哋嚟係應該，唔嚟就係不該。」
珠姐澄清至少仲有佢呢個民記中人吖，又話黨員可能知道佢阿姐要出場，所以統統避開晒，但承諾會寄語黨友唔好放棄呢個言論平台。 個個都話唔得閒 謝志峰會後透露邀請咗六、七個民記中人，但個個都話唔得閒。民建聯黨團召集人葉國謙澄清佢冇杯葛《城市論壇》，相信個別黨員包括佢都係因為有要事而未能出席，強調日後若有合適主題，黨員定必出席，唔會嘥咗表態嘅機會。
mailto:pf_lee@appledaily.com 
| 
發表於 2010-9-7 20:54:41