潑亞運冷水(左丁山)

外外星人

2010年07月24日

中國足協想話申辦二○二六年或以後嘅世界盃，俾新華社大潑冷水，淋醒佢。香港去年主辦東亞運之後，也有人頭腦發熱，現在話要申辦亞運，點解冇人學新華社咁，淋吓冷水呢？照新華社思路，左丁山亦可以講，香港辦亞運，有三大困難：（一）難搵空地大興土木，興建運動場館；（二）亞運難為香港帶來經濟利益；（三）亞運難以振奮香港人心。還有一個不可能，就係亞運不可能提升香港人嘅長期運動興趣。既然如此，辦嚟做乜？不如將辦亞運啲錢慳番，增撥款項畀個別已做出成績來嘅運動項目，刺激不同運動之發展。
有好例子呀，例如最近香港殘疾人奧委會暨傷殘人士體育協會輪椅劍擊隊在波蘭華沙參加 IWAS輪椅劍擊世界盃賽，就取得一金二銀三銅嘅佳績。
余翠怡， A級女子花劍金牌、重劍銀牌。
吳舒婷， A級女子花劍銀牌、女子重劍銅牌。
范珮珊， A級女子花劍銅牌。
譚湜琛， B級男子重劍銅牌。
特區政府不宜勞民傷財，好大喜功，申辦亞運嘞，每年趣趣地向一啲機構如殘奧委增加撥款幾百以至一千萬，已經功德無量，好多殘疾青年人受惠。諗深一層，咁多人話樓價貴，供應量不足，特區政府難道有神奇法術，變啲土地出嚟興建體育場地而唔起樓？香港不必為一啲國際盛事而爭威風，讓晒俾內地城市去威威咪更好，廣州亞運之後，可以有鄭州亞運，杭州亞運，蘭州亞運……一百年後都未需要香港為國爭光。
香港辦體育，左丁山贊成（一）針對性向一啲金牌項目增加撥款（即香港有資格爭取、已攞過金牌嘅特殊體育項目），即發揮香港比較優勢；（二）為咗社會最大凝聚力，辦好足球。在東亞運呢啲丙級賽事攞金牌都有四萬人捧場，試想像香港足球隊可以恢復上世紀五十年代之亞洲第一排名，對年青人，整個社會之凝聚力有幾大？辦亞運要一百幾十億元，每年撥幾千萬元嚟訓練青年隊，逐步逐級而上，更有社會經濟效用。

（左丁山）