昨天正確的粵語系：尋日定系岺日？

PaulChan

好似兩種都有人讀，請問正確的讀音系.....?

[此帖子已經被余OK於2006-10-14 0:33:47編輯過]

殺人王

因為兩種都係啱嘅

`~bao

乜吳係琴日咩？點解會係尋日？ 中有，係黑人憎定係乞人憎？

dada

《廣州話方言詞典》同《現代標準漢語與粵語對照資料庫》﹐都用「琴日」。 係「乞人憎」。「非洲和尚—黑人僧」係諧音（或懶音）。 有兩個字打錯﹐應該係「唔係」、「重有」。

highyun

非洲和尚—黑人僧 呢個歇後語係一個非常失敗而且非常有害嘅歇後語，佢誤導咗人講懶音。

`~bao

哦~~唔該晒啊……

machine

岺日？岑日？有人噉講嘅咩？定係琴日呀？

灰飞狼图腾

各位都是广东人吗？为什么回复帖子的全部都是用粤语回复的啊～

dada

我知道有一兩個外地朋友都係寫粵語。練習寫粵語﹐有錯嘅時候﹐會有人改。

dada

既然樓主寫正體﹐主題應該係﹕「昨天正確的粵語係：尋日定係岺日？」

殺人王

正音應是 「尋（tsam4）日」。 　　粵語把昨日說成 「尋（tsam4）日」，本字應是「昨暝日」。 「尋」是「 昨暝」的合音。 「暝」與「冥」通用，《廣韻》標「莫經切」，得ming4 音，解作昏暗，又解作日暮，夜晚。 　　「昨暝」 合成 「尋（tsam4）」：zok9 ming4 -> zom4 ->tsam4 　　原理是，前一字加強而後一字弱化，後一字弱化到只殘留聲母，拼入前字做韻尾，取代了 –k 而得 zom4。而且兩個字合成一個音，一般聲調依隨後字，故得陽平調。 　　而zom4變成tsam4的原因，乃因古濁音字在粵語中送氣或不送氣，是分成平上及去入兩組，平上送氣，去入不送氣。而韻母由 om 變成 am，乃因古代粵語是有om韻母的，在現代粵語中已轉為am。 雅虎香港知識網友 密瓜

夢星羽

沉日。 沉，隱沒、消失。 沉日者，已經消逝的日子。

dada

yahoo!知識+「最佳回答」http://hk.knowledge.yahoo.com/question/?qid=7006072703993﹕ 「其實本來係尋日..不過因為香港人既懶音..慢慢就變左做琴日.. 講下講下..依架d人又會講尋日，又會講琴日。 」 我唔係話「尋日」正確﹐因為所謂「最佳回答」嘅根據不過係「我呀ba講」。yahoo!知識+嘅權威性可想而知。 我淨係針對「不過因為香港人既懶音..慢慢就變左做琴日」呢句話。我父母幾十年前離開廣東﹐從未住過香港﹐又冇懶音﹐佢哋都係講「琴日」。

余OK

我細個嗰時周圍都係講「琴日」多，記憶所及好少人講「尋日」，不過世易時移，家陣啲人都係講「尋日」多，我同意dada睇法，「琴日」絕對唔係懶音嘅產物。。。

highyun

我都係講“琴日”嘅，呢個絕對唔係懶音，而應該係習慣嘅唔同。就如“頭先”同“求先”，任何一個都唔係懶音。 當然，“尋日”呢種講法都係正確嘅（寫法就唔肯定），但究竟係先有“尋日”再有“琴日”抑或先有“琴日”再有“尋日”，抑或兩個分別各自産生，就唔清楚喇。

superjill

沉日。 沉，隱沒、消失。 沉日者，已經消逝的日子。 本文僅代表作者[夢星羽]的觀點，版權屬作者與粵語協會論壇共同所有』 解得幾有意思 喺《廣州方言詞典》裏面“尋日”個“尋”字，都注明係同音字，至于正字係乜，佢都無寫

殺人王

yahoo知識我唔係話佢地實啱,不過有部分都有道理嘅.尤其是有reference嗰d 不過"尋日"或者"岑日"真係好難考究

吴广德

大洋网都讨论过呢个问题，同样冇结果。 http://club.dayoo.com/read.dy?b=cantonese&t=585405&i=585405

rugal

插一句，琴日個“琴”正寫應該係乜？

superjill

琴日 記得《廣州方言研究》裏面話：係尋日嘅尋字聲母弱化嘅結果 就好似有啲人講“頭先”講成“求先”