日本國寶篆刻展（左丁山）

Lucciora

日本文化協會主席趙達榮係左丁山之師伯/師叔級人物，早年領取日本文部省獎學金往日本深造，得早稻田大學碩士學位，曾在日本NHK擔任報導員，標準日本通也。此日趙師叔來電，吩咐參加日本書法篆刻藝術泰斗小林斗盦作品展，當然不敢不從。作品於五月二十四日至二十九日於中環域多利皇后街三聯書店二樓及三樓展出，開幕式於五月二十四日下午四時舉行，由趙師叔、國際創價學會副會長李剛壽（又係左丁山師兄），小林大師嘅後人小林俊明及其他文化界要人主持。左丁山對書法篆刻藝術，屬文盲之類。據資料所述，小林斗盦（1916-2007）係日本國寶級大師，著有《中國篆刻史》、《中國璽印類編》等幾十部著作，與中國國寶饒宗頤大師有深厚交情，故此呢個作品展有饒先生親筆題字，並由大師女婿鄧偉雄致送另一幅題字予小林俊明先生。現場除展出小林大師嘅作品外，並展出佢歷年以「懷玉印室」名義收藏之中國名師大批印璽，如吳昌碩、趙之謙、丁敬、吳讓之等等作品。印章如何觀賞，左丁山向鄧偉雄師兄請教，又遇到另一位曾獲文部省獎學金留學京都大學嘅陳志誠師兄（教授），於是叫做識得睇吓。問多兩句，方知學問高深到極，令我「望章」興嘆。小林斗盦之兩個印章，杜甫「古柏行」，以及「五柳先生傳」（兩者皆為篆書，前者係八十二歲之作，後者係二十四歲之作）係精品中之精品也。在展覽廳內遊走一番，當係上一堂通識教育，學習之餘，銅臭氣味不除，問吓在場一位專家：「呢批展品之拍賣價格會係幾多？」專家伸吓舌頭：「無從估計，價值有兩個成份，一係印石，二係大師級作品，小林斗盦乃不世之高人，佢嘅作品售價難以估計。」睇睇吓，先至發覺在此展出之珍品全部係中文唔見日文，上一代嘅日本藝術家大都精通中國古文，與中國人無異，求諸今個世代日本人，恐不可得，慚愧嘅係連中國人亦未必懂得呢。

danielchai

好雅文。。讀喺身好舒服

阿森

日本国老辈汉学家嘅学问远非北佬可比