掹草

外外星人

呢度唔係講農村嘅田間勞作，係講城市人嘅「浪漫史」。

 

曾幾何時，廣州人住喺豆膶咁細嘅「七十二家房客」度，地方淺窄唔在講，連行街都唔知去得邊。 好多後生仔女想拍拖點算呀？咪唯有去公園囉！冇錢去公園嘅，廣場、江邊都殺。去得公園嘅，唔會就噉定佻佻坐係石凳度，都識得瓹入樹林、坐喺草皮度，喺嗰度「科sa」下，至少都會嘴返兩啖啦！ 海珠廣場雖然唔似得公園咁好環境，之但係一樣有樹有草，好多「老夫老妻」嘅拖友，喺未搵到竇口拉埋天窗之前，都會去嗰度解下「相思之苦」，嘴得、「科」得，甚至鋤得。 講出嚟唔好聽，但確係環境所迫，冇計啦！

 

皆由好多人都噉做，故此，佢哋所到之處，草都唔生，認真係滾死草， 故此，呢種情形就畀人叫做「掹草」。若果你畀人笑：「今晚去掹草呀？！」恭喜你，你有拖拍嘞！

 

聽講，而家啲大學生都好時興「掹草」嘅，校園草地一晚都唔知留低幾多「雨褸」。聖人都識得講：食、色，性也。啱嘅！

 

相關連結：http://bbs.cantonese.asia/thread-23206-1-1.html