隔牆有耳：香港煲呔有個升呢(升level(升級))夢

Ψ丹尼王子

5-3-2010

香港《蘋果日報》

隔牆有耳：煲呔有個升呢夢

國家副主席習近平噚日喺北京接見港、澳政協，會議由香港前特首、政協副主席董建華主持，剛獲選為政協嘅澳門前特首何厚鏵都有到場，由此安排可見，鏵哥再上層樓做政協副主席、晉身國家領導人行列冇走雞。

鏵哥治澳 10年，澳門人對佢功過評價有目共睹，因此有人估計佢未必獲中央厚待，好似老董咁「升呢」，不過北京始終好睇鏵哥，點都預個好位畀佢，而近日港、澳多份左報開足馬力吹捧鏵哥治澳有功，係強勢特首，擺明為佢上位鳴鑼開道，讚揚佢喺改善治安、開放賭權同經濟增長三方面對澳門貢獻良多。

係政界公開秘密

可能自知有運行，八方聽聞鏵哥心情靚到不得了，日前喺北京傳媒聚會時，更高歌一曲鄭秀文《默契》，在場人士指鏵哥歌藝 OK o架，唱到「由始至終，只有你一位，難以代替……」時，情深款款，冧死人咁話。

睇見鏵哥如此風騷，家陣身在北京嘅煲呔可能感受良多，佢任期已過一半，擺在面前大事，只得政改方案，可以話在等收工狀態，佢「恨」升呢，希望有份做國家領導人已經係政界公開秘密，不過佢橫睇係港英餘孽，豎睇係英國爵士，因此好多愛國愛黨人士對佢與老董睇齊甚有意見。

睇唔過眼煲呔嘅左派人士指，如果凡係退任特首都做政協副主席，成為不成文慣例，日後可能出現好多「國家領導人」，係人都捧嘅話，徒令呢個身份貶值，所以只安排兩個特區首任特首上位，係較恰當做法，況且多年來港、澳都只係得一、兩位政協副主席，安排煲呔做呢個位，反而唔啱規定喎。



副主席唔係虛銜

近日親北京人士圈子再傳一個不利煲呔上位說法，有人指政協副主席唔係虛銜，老董因為同美國政商界關係深，在台灣亦有廣博人脈，擔任此職可肩負特使功能，鏵哥則與歐洲政要有交情，做政協副主席發揮聯繫作用，至於煲呔，身為英國爵士，若果位列中國國家領導人，可能好傷害廣大人民感情，領導人要三思啊！

pf_lee@appledaily.com






http://hk.apple.nextmedia.com/template/apple/art_main.php?iss_id=20100305&sec_id=4104&subsec_id=15333&art_id=13789083&cat_id=45&coln_id=20